Vikolwa 25 - KITABU KITAKATIFU

¹ Festo ya duka mu provinse; lwa ya menya madiku gavaka yanegira Yerusalemi kutwula Kaisaria.

² Avasalisi vanene navandu vanene va Vayuda va mu volera amakuva ga Paulo; kandi va mu goonya,

³ venya a va vere kuye, a letwe Yerusalemi; venya kumugoneka va mwiitire ku inzira.

⁴ Navutswa Festo ya tivula, Paulo u lindeywi Kaisaria, kandi mwene yenya kutsia vola, bwangu.

⁵ Kandi kigira yaga ya vola, Yava va veye netsingulu ku mwinye va sulungute halala ninze, mundu uyu na a va na a veye nekindu, va mu yale.

⁶ Kandi lwa ya menya navo madiku ga kikiri kuvita gatanu na gavaka kinga likumi, ya sulunguta Kaisaria; na mugamba yikala ku kisako kyokukalagira amakuva, na a haana munwn Paulo a letwe.

⁷ Kandi lwa yika, Avayuda ava twula Yerusalemi va mu kumbindza ni va leta viyalo vidamnno vinyingi kuye vya va ta nyala kulungika;

⁸ kandi Paulo ya tivula, Si nzononnya lilaga lya Vayuda, kali litempeli, kali mu nwa gwa Kaisari.

⁹ Navutswa Festo kigira yenya kukolera Avayuda kindu kya va mu yanzira, ya tivulira Paulo na a vola, Wenya kutsia Yerusalemi u kalagirwe yo vindu yivi imbiri wange?

¹⁰ Navutswa Paulo ya vola, Ni singiye imbiri wekisako kyokukalagira kya Kaisari, niho ha ndukira kukala girwa ho: ku Vayuda si nda kola kindu kidamano kuli ive mwene u manya bulahi.

¹¹ Ni mba ni ndona, kinga ni nkola kindu kya nduka kwiitwa, si nda sula kukudza; naw tswa vindu yivi vya va nzalira ni va ta li vyeligali, si ha veye nomundu u nyala kumbika mu makono gavo. Nzanira ku Kaisari.

¹² Hene yaho Festo lwa ya mala kuvolerana ne kyina, ya tivula, Wanira ku Kaisari, u la tsia Kaisari.

¹³ Madiku malala lwa ga vita, Agiripa, mwami na Berinike va duka Kaisaria ni va chelidza Festo.

¹⁴ Lwa va menya yo madiku ma nyingi, Festo ya volera mwami amakuva ga Paulo, na a vola, Mundu mulala a veye hano wa Felike ya leka, muhambe;

¹⁵ wa vasalisi vanene navakulundu va Vayuda va mbolera amakuva gege, lwa nda li mu Yeru salemi, ni venya nkalage amakuva gege.

¹⁶ Inze nda va tivulira, Si gyi li miima gya Varomi kutwulidza mundu u yalwa na a kikiri kuhenzana na va mu yala, na a nyola ubwiyangu kutivula ku vindu vya va mu yalira.

¹⁷ Kunangwa, lwa va vugana hano, si nda linda, navutswa mugamba ndikala ku kisako kyokuka laga, ni mbaana munwa mundu a letwe.

¹⁸ Navo ava mu yalalwa va singira si va leta vindu vidamano kuye kali kilala, kuli inze nda vola va la leta;

¹⁹ navutswa va li namakuva luganolugano ku miluka gyavo, noku mundu mulala Yesu wa kudza wa Paulo ya vola a veye mwoyo.

²⁰ Na inze nda hayahayidza kuli wa ndi teva ku vindu yivi, ni mmu teva yenya kutsia Yerusalemi, a kalagirwe yo ku vindu yivi.

²¹ Navutswa Paulo lwa yenya a hilwe kukalagirwa womwami munene, nda haana munwa a lindwe nda ka mu hile wa Kaisari.

²² Agiripa ya volera Festo, Kali inze mwene nda li ni nyenya kuhulira mundu uyu. Ya mu volera, Mugamba u la mu hulira.

²³ Kunangwa mugamba, Agiripa lwa ya duka, na Berinike, nobwami bunene ni vingira hokuhulira amakuva, halala navanyampara vanene navandu vanene velidala, Paulo ya letwa nomunwa gwa Festo.

²⁴ Festo ya vola, Mwami Agiripa, ive navandu vosi ava ku veye navo hano, mu lola mundu uyu, wekiduma kya Vayuda kyosi Yerusalemi na hano va ngoonya kigira iye ni va gamba si bu li bulahi a ve mwoyo.

²⁵ Navutswa inze nda lola si ya kola kindu kali kilala kya a duka kwiitirwa: kandi kigira mwene yanira mwami munene, inze nda saavira kumuhila.

²⁶ Narutswa kuye si mbeye nekindu kyeligali kung'odira mwami wange, Kigira yiki mmali kumuleta imbiri wenyu, ligali imbiri wowo, mwami Agiripa, nyenya na a mali kwizodzwa, nyole likuva lyokung'oda.

²⁷ Kigira ndoli si bu li bulahi kuhila muhambe ni nta vuula vindu vi veye kuye.