Vikolwa 22 - KITABU KITAKATIFU

¹ Avamitu navadada, mu huliridze litivula lyange lya mmu tivulira kalunu.

² Lwa va hulira a vola mu lulimi lwa Vahebraina, va kiring'ana ligali: na a vola.

³ Inze mbeye Muyuda, ndivulwa mu Tariso lya Kilikia, navutswa nda virukira mu lidala yili, ni nzegidzwa ha virenge vya Gamalieli, mu miima gyeligali gyavaguga vetu, nda li nobugulu muno ku Nyasaye, kuli mwinye vosi lero.

⁴ Na inze nda dambidza avandu re Nzira yiyi va duke ku likudza, ni mba boha, ni mba vika mu inyumba yavahambe, avasatsa navakali.

⁵ Kuli musalisi munene kandi a ndolekidza ndiyo, na kyina kyosi kyavakulundu: ava nda vugula kuvo tsibaruwa tsyokuhilira avamitu, ni ntsia Damasko kuleta yavo ava veye yo va duke Yerusalemi va boheywi va hebwe amageli.

⁶ Kunangwa lwa nda li ni nzidzanga himbi Damasko, yenya kuduka mbasu hagati, nonoho bwangu ubulavu bunene bwa twula mu ligulu ni bu ng'ereng'ana ku tsimbega tsyange tsyosi.

⁷ Kandi nda gwa hasi ni mbulira mwoyo ni gu mbolera, Saulo, Saulo, kigira ki u ndambidza?

⁸ Kandi nda tivula, U veye ibwaha, Mwami? Kandi ya mbolera, Inze ni Yesu wa Nazareti wa ive u dambidza.

⁹ Navo ava li halala ninze va lola bulavu yibwo navutswa si va hulira mwoyo gwa uyu a volerana ninze.

¹⁰ Na inze nda vola, Nkola ki, Mwami? Kandi Mwami ya mbolera, Vuka, u tsie Damasko; u la volerwa yo amakuva gevindu vyosi aga lagwa u kole.

¹¹ Lwa nda vula kulola kigira tsingulu tsyobulavu yibwo, ava li halala ninze va nzimirira va ngumira mukono, ni nzingira Damasko.

¹² Kandi mulala u la ngwa Anania, wa tia Nyasaye kuli lilaga, wa Vayuda vosi va menya yo, va lolekidza kuva mulahi,

¹³ yadza ku inze na a singira himbi ninze na a mbolera, Saulo Amitu, lola. Na inze nda mu henza netsimoni tsyange isaa zana yeyo.

¹⁴ Kandi ya vola, Nyasaye wavaguga vetu u mali kukutovola u duke kumanya ubulaliri bwibwe, nokulola Mulungi, nokuhulira mwoyo gu twula mmunwa gwigwe.

¹⁵ Kigira u la va mulolekidzi wewe ku vandu vosi wevindu yivyo vya wa lola na vya wa hulira.

¹⁶ Kalunu u linda ki? Singira u batidzwe, wisinge ubwoni bubwo, wanire lieta lilye.

¹⁷ Lwa nda li ni mmali kwirana Yerusalemi, kandi lwa nda li ni nsaala mu litempeli, nda girunkana mu mwoyo,

¹⁸ kandi nda mu lola na a mbolera, Bwangu, u twule mu Yerusalemi tsimbiru kigira si va li vugula lilolekidza lilyo ku inze.

¹⁹ Na inze nda vola, Mwami, avene va manya inze nda boha ava suuvira ive, mu inyumba yavahambe kandi nda va kuya mu masomero gosi:

²⁰ kandi amasahi ga Stefano mulolekidzi wowo, lwa ga sundulwa, inze nda singira navo, ni mbugirira, ni ninda tsingubo tsya yavo ava mwiita.

²¹ Navutswa ya mbolera, Tsia: kigira nda ku tuma u tsie hale kuduka ku Tsihiri.

²² Kandi va huliridza kuduka ku likuva yilyo; ma va ginga myoyo gyavo ni va vola, Twulidza uyu mu lirova: si bu li bulahi a ve mwoyo.

²³ Lwa va hanzuka ni va ta tsingubo tsyavo ni va duminya lugukyi,

²⁴ munyampara munene ya haana munwa a letwe mu lugaga lwavasikari, na a va ha munwa kumuteva nelikuya, a duke kumanya kya va mu kolera liyoga ndi.

²⁵ Navutswa lwa va mali kumuboha netsinkova, Paulo ya teva munyampara wavasikari wa singira himbi, Nu mwima gwenyu kukuya mundu Muromi na a kikiri kukalagirwa ubwoni?

²⁶ Munyampara lwa ya hulira yaga, ya tsia hu munyampara munene na a mu volera, U lenya kukola ki? Kigira mundu uyu a veye Muromi.

²⁷ Munyampara munene yadza na a mu volera, U mbolere, hene u veye Muromi? Naye ya vola, Yee.

²⁸ Munyampara munene ya tivula, Inze nda nyola Luromi yilu ni vindu vinyingi. Kandi Paulo ya yola, Navutswa inze ndivulwa Muromi.

²⁹ Hene yaho yavo avenya kumuteva va mweleha ni va mu leka nonoho: kandi munyampara munene, lwa ya manya a veye Muromi, ya tia, kigira ya mu boha.

³⁰ Navutswa mugamba, yenya kumanya ligali kya Vayuda venya kumuyalira, ya mu boholola, na a laga avasalisi vanene nekyina kyosi, kuvugana, ya leta Paulo na a mu vika imbiri wavo.