Vikolwa 20 - KITABU KITAKATIFU

¹ Inyima wekivihiri kya kiring'ana, Paulo ya langa avegidzwi na a veganehidza na a va siivula, na a twula kutsia Makedonia.

² Lwa ya mala kuvita tsimbega yitsyo, na a veganehidza namakuva manyingi, ya duka Ebugreki.

³ Lwa ya mala kumenya yo myeli gyivaka, na Vayuda venya kumugoneka tsiluku inyinga yenya kunina mu bwato kutsia Siria, ya manya ni yirana ku inzira ya Makedonia.

⁴ Kandi va tsia halala naye kuduka Asia, Sopatro wa Berea muana wa Puro; na ku Vatesalonike, Aristarko na Sekundo; na Gaio wa Derbe, na Timoteo; na ku va Asia, Tukiko na Terofimo.

⁵ Navutswa yava va li ni va mali kwimira ni va ku lindira Troa.

⁶ Kandi kwa nina mu bwato kutwula Filipi inyima yamadiku gobukima bu ta li namamera, ni ku duka kuvo mu Troa madiku gatanu; ni ku menya ho madiku gatanu na gaviri.

⁷ Ku lidiku lyokutanga lisidza, lwa kwa vugana halala kumegannya ubukima, Paulo ya vilwadzira, ya li ni yenya kutsia mugamba; kandi ya hongera lilwadza lilye kuduka ubudiku hagati.

⁸ Tsitaya tsinyingi tsya li mu inyumba ye igulu ya kwa vuganira mu.

⁹ Kandi mundu musoleli wa langwa Eutuchio ya li ni yikaye mwidirisha, tsindolo tsya mu vuha ligali; kandi Paulo lwa ya hongera kudasa lilwadza lilye, uyu ya kirwa netsindolo, yaguluka na a gwa kutwula mu inyumba ye igulu i kola tsivaka, na a vugulwa u kudzi.

¹⁰ Paulo yika na a mu gwira na a mu kumberera, na a vola, Mu ta kola liyoga; kigira mwoyo gwigwe gu veye muye.

¹¹ Kandi lwa ya mala kunina igulu nokumegannya ubukima, nokulagira nokuvavolera manyingi, kuduka inyinga ya bwa kya, ya tsia.

¹² Ni va leta muyai a kiri mwoyo, ni va yanza ligali.

¹³ Navutswa kwinye kwekolerera mu bwato, ni ku tsia Aso, kwa vola ku la vugulira yo Paulo: kigira ya laga ndiyo, mwene yenya kugenda nevirenge.

¹⁴ Kandi lwa ya duka ku kwinye Aso, kwa mu vugula, ma kwa duka Mitulene.

¹⁵ Kwa tsia mu bwato kutwula yo, na mugamba kwa vita ku luvega lwa Chio, kandi mugamba gundi kwa duka Samo; kandi mugamba gundi kwa duka Mileto.

¹⁶ Kigira Paulo yenya kuvita Efeso, a ta gunza mu Asia mba; kigira ya li na a genda bwangu, na a nyala a duke kuva mu Yerusalemi lidiku lya Pentekote.

¹⁷ Kandi kutwula Mileto ya tuma mundu Efeso na a langa avakulundu velivugana.

¹⁸ Kandi lwa va duka kuye, ya va volera. Mwinye avene mu manya kuli nda menya na mwinye halala tsinyinga tsyosi kutwula lidiku lya nda tanga kuluvata Asia,

¹⁹ ni ntumekira Mwami nobuhokya bwosi bwomwoyo, kandi namaliga nobugeridzwi bwa ngwira kigira tsiluku tsya Vayuda;

²⁰ kuli wa nda vula kuvaasa amakuva kumuvolera gosi aga nyala kumukonya, ni mmwegidza imbiri wavandu vosi, kandi inyumba nenyumba,

²¹ nda loleki dzira Avayuda na Vagreki, lyeganira ku Nyasaye, nelisuuvira Mwami wetu Yesu Kristo.

²² Kandi kalunu, henza, inze ntsitsanga Yerusalemi, nnigwa mu mwoyo gwange na inze si mmanya ga li ngwira yo

²³ navutswa Roho Mutakatifu a ndolekidza mu madala gosi, a vola libofwa nekivi vi ninda.

²⁴ Navutswa si mbalidza livamwoyo lyange kuva kindu ku inze, nyole kudukidza ulugendo lwange, nobutumekiri bwa nda vugula ku Mwami Yesu, kulolekidza ivangeli yetsimbabasi tsya Nyasaye.

²⁵ Kandi kalunu henza, mmanya mwinye mwosi ava mbo donkana mu ni nzilwadza ubwami si mu li ndola kandi tsimoni tsyange.

²⁶ Kigira yaga ndolekidzira mwinye lero ndi, inze si mbeye namasahi ga vandu vosi ku inze kali mulala.

²⁷ Kigira si nda vaasa amakuva kumuvolera ubusaaviri bwosi bwa Nyasaye.

²⁸ Mwelinde kandi mu linde kyayo kyosi, kya Roho Mutakatifu a mu kola mu ve avalolekidzi, mu duke kulageridza livugana lya Nyasaye lya yegulira namasahi gege mwene.

²⁹ Inze mmanya inyima yokutwula kwange ivisalang'ongo vilulu vi lingira mu mwinye vi ta vererera kyayo;

³⁰ kandi ku mwinye avandu va la twula, va vola amahangali, va duke kung'usa avegidzwi va va londe.

³¹ Ku yaga mu linde, mwidzulitse inze inyinga yemihiga gyivaka si nda leka kweganehidza mundu namaliga, kali mulala ubudiku nombasu.

³² Kandi kalunu mmu vika ku Nyasaye kandi ku likuva lyetsimbabasi tsitsye, li nyala kumwombaka nokumuha miyandu halala na vosi ava takaswa.

³³ Si nda kayirwa ifetha yomundu kinga thahabu kinga tsingubo.

³⁴ Mwinye avene mu manya amakono gange ga tumekira ku lyenya lyange, nelyavo ava li halala ninze.

³⁵ Inze mmali kumugerera ku vindu vyosi, nu bulahi mu didikane ndi mu konye avadekerana, nokwidzulitsa amakuva go Mwami Yesu kuli ya vola, Lihaana li veye nobugasu kuvita livugula.

³⁶ Lwa ya mala kuvola ndi, ya sigama na a saala halala navo vosi.

³⁷ Navo vosi va lira ligali ni va gwira Paulo mu ligoti, ni va mu busa,

³⁸ va verera ligali kigira likuva lya ya vola, si mu li ndola mu tsimoni tsyange kandi. Kandi va mu hereka kuduka mu bwato.