Vikolwa 2 - KITABU KITAKATIFU

¹ Lwa lya duka lidiku lya Pente kote, va li halala vosi nomwoyo mulala.

² Kandi nonoho muhuma gwa twula migulu kuli muhuma gwembuudza inene, i genda ni yizula inyumba yosi ha va li ni vikaye.

³ Kandi tsya loleka kuvo tsinimi tsyavukani kuli muliru; tsikala kuvo sa mulala sa mulala.

⁴ Kandi vizula vosi Roho Mutakatifu ni va tanga kuvola netsinimi lugano lugano, kuli Roho ya va ha livola.

⁵ Ha li ho Vayuda ava tia Nyasaye, va menya mu Yerusalemi, va twula mu tsihiri tsyosi isi weligulu.

⁶ Ku, mwoyo yigwo lwa gwa hulirwa, kiduma kya vugana, ni va gumirwa nelihuga, kigira mundu sa mulala ya hulira ni va vola ululimi lwilwe.

⁷ Kandi va huga nokugenya vosi, ni va vola, Henzi, yava vosi ava vola si va veye Vagalilaya?

⁸ Ga li ndi kwinye sa mulala a hulira ululimi lwa yivulwa mulwo?

⁹ Avaparthi, na Vamedi, na Vaelam, navo va menya Mesopotamia, na Buyuda, na Kapadokia, Ponto, na Asia,

¹⁰ na Frigia, na Pamfulia, na Egepeti, ne tsimbega tsya Libua himbi Kurene, navageni va twula Romi, Avayuda navizamiri,

¹¹ kandi Vakirete, na Vaarabu, ku va hulira va vola mu lulimi lwetu vikolwa vinene gya Nyasaye.

¹² Kandi va genya ni va huga, ni va volerana, Ni kindu ki yiki?

¹³ Navutswa avandi va kola kihenyahenye, ni va vola, Va hambiki namalwa mahya.

¹⁴ Navutswa Petro ya singira halala nava li likumi na mulala, na a gamba, na a vola, Mwinye avandu ve Buyuda, na mwinye ava menya mu Yerusalemi, yaga ga manyekane ku mwinye, kandi mu huliridze amakuva gange.

¹⁵ Kigira yava si va ha mbiki kuli mu vola; kigira ni isaa yetsivaka vutswa yombasu;

¹⁶ navutswa yaga na ga volwa nomprofeti Joeli:

¹⁷ Nyasaye a vola, ku madiku gekiheri, Nda tsuka Roho wange ku vandu vosi: Navayai navakana venyu va la profeta Navasoleii venyu va la lola malola Navasakulu venyu va la lota maloto:

¹⁸ Yee, ku vatugwa vange avayai navakana mu madiku yago Nda tsuka ku Roho wange; kandi va la profeta.

¹⁹ Nda leta vyokugenya igulu migulu, Nevilolekidzu mu lirova hasi; Amasahi, nomuliru, nelilumbe lyomwoki:

²⁰ Liuva li la girunkanywa li gwe kisundi, Kandi mweli gu la girunkanywa gu gwe masahi Li kikiri kuduka lidiku lyo Mwami, Li veye linene nokumanyekana:

²¹ Kandi ga la va, ku vandu vosi u lyanira ku lieta lyo Mwami a la honnywa.

²² Mwinye avasatsa va Israeli, mu huliridze amakuva yaga: Yesu wa Nazareti, mundu wa Nyasaye a langaminyi ku mwinye ku vikolwa vyetsingulu nevyokugenya nevilolekidzu, vya Nyasaye ya kola hagati henyu naye, kuli mwinye avene mu manya;

²³ uyu wa hebwa nelitovola nelisaavira lya Nyasaye lya ya manya imbiri, mwinye mwa mbamba ni mu mwiita namakono gavandu vekirage:

²⁴ wa Nyasaye ya simugukidza, na a mu boholola mu busaliri bwelikudza: kigira si lya nyalika likudza kudinya kuye.

²⁵ Kigira Daudi ya vola kuye, Nda lola Mwami imbiri wange kazozo; Kigira a veye ku mukono mulungi, mbule kutengidzwa:

²⁶ Ku yaga mwoyo gwange gwa yanza, nolulimi lwange lwa sangala; Kandi inyama yomubiri gwange i la menya mu lisuuvira.

²⁷ Si u li leka mwoyo gwange mu kihadisi, Kandi si u li bugirira Mutakatifu wowo a lole ligunda.

²⁸ Wa mmannya tsinzira tsyelivamwoyo; U la nzizulitsa ubuyanzi nomumoni mumwo.

²⁹ Avamitu vange, nyala kumuvolera habulavu ga guga wetu Daudi, ya kudza na a tebwa, kandi kilindwa kikye ki veye mu kwinye kali kalunu.

³⁰ Kigira ya li muprofeti, na a manya Nyasaye u mali kumwisuhira lisuha, ku lwivulo lwilwe lwomubiri gwigwe, a la mwikalidza mulala ku kisako kikye kyobwami.

³¹ Naye, kigira ya tanga kulola yaga imbiri, ya vola ku lisimuguka lya Kristo, si ya lekwa mu kihadisi, kandi inyama yomubiri gwigwe si ya gunda mba.

³² Yesu uyu, Nyasaye ya mu simugukidza, kandi, ku yili kwinye kwosi ku veye avalolekidzi.

³³ Kunangwa naye u mali kunenehidzwa kuduka ha mukono mulungi gwa Nyasaye, kandi u vuguye ku Dada lisuuviridza lya Roho Mutakatifu, u tsuki yiki kya mu lola nekya mu hulira.

³⁴ Kigira Daudi si yanegira migulu: navutswa mwene a vola Mwami ya volera Mwami wange, Wikala ha mukono gwange mulungi,

³⁵ Nduke kukola avasigu vovo va ve kisako kyevirenge vivyo.

³⁶ Kigira yaga avenyumba yosi ya Israeli va manye ligali, Nyasaye u mali kukola Yesu uyu wa mwa bamba, a ve Mwami kandi a ve Kristo.

³⁷ Lwa va hulira yaga, va tumitwa mu myoyo gyavo, ni va volera Petro navatumwa avandi, Avamitu, ku kola ndi?

³⁸ Petro ya va rolera, Mweganire, mu batdziwe mwosi mu lieta lya Yesu Kristo, mu nyole ubusamehi bwobwoni bwenyu; kandi mu la vugula kihaanwa kya Roho Mutakatifu.

³⁹ Kigira lisuuviridza yili li veye ku mwinye, noku vana venyu, noku vosi ava veye hale, ku vosi vo Mwami Nyasaye wetu a la langa vadze kuye.

⁴⁰ Na a va mannya amakuva gandi manyingi, na a veganehidza, na a vola, Mwehonnye ku likula yili likyamu.

⁴¹ Yavo ava vugula likuva lilye, va batidzwa: kandi lidiku yilyo va daswa avandu kuduka himbi tsielfu tsivaka.

⁴² Ni va hongera mu megidzo gavatumwa nomu lisanga, nomu limegannya ubukima, nomu lisaala.

⁴³ Ubutii bwa gumira myoyo gya vosi: kandi vyokugenya vinyingi nevilolekidzu vinyingi vya kolwa navatumwa.

⁴⁴ Kandi vosi ava suuvira va li halala ni va sannya vindu vyavo vyosi;

⁴⁵ ni va gula ubu tugi bwavo nevindu vyavo ni va gavulira vosi, vandu vosi sa mulala kuli wa a daka.

⁴⁶ Kandi madiku gosi va hongera mu litempeli, nomwoyo mulala nokumegannya ubukima hango, ni va vugula vyokulia vyavo nobuyanzi kandi nemyoyo gyi ta li nobugadi,

⁴⁷ vidzominya Nyasaye, ni va yanzeka ku vandu vosi. Kandi Mwami ya va dasira madiku na madiku ava li ni va honnywa.