Vikolwa 13 - KITABU KITAKATIFU

¹ Va li ho mu livugana lya li mu Antiokia, avaprofeti navegidzi, Baranaba na Simeoni wa li na a langwa Nigeri, na Lukio wa Kurene, na Manaeni wa nyunnywa na Herodi mwami u kola vavaka, kandi Saulo.

² Navo lwa va li ni va tumekira Mwami, ni va honga lilia, Roho Mutakatifu ya va volera, Mu ntwulidzire Baranaba na Saulo kigira miyinzi gya mba langira.

³ Hene yaho lwa va mala kuhonga lilia, ni va saala, ni va vika kuvo makono gavo, va va tuma va tsie.

⁴ Kunangwa navo, va tumwa na Roho Mutakatifu va sulunguta kuduka Seleukia; na kutwula yaho va nina mu bwato va tsia Kuporo.

⁵ Kandi lwa va li mu Salamisi vilwadza likuva lya Nyasaye mu masomero ga Vayuda: navo va li na Yohana mutumekiri wavo.

⁶ Kandi lwa va mala kuvita kisulu kyosi kuduka Pafo, va nyola musegetiri mulala, muprofeti wobubehi, Muyuda, lieta lilye lya langwa Bar-Yesu.

⁷ Uyu ya li halala nomunyampara, Serigio Paulo, mundu wobugeeri. Uyu ya langa Baranaba na Saulo va tsie kuye, yenya kuhulira likuva lya Nyasaye.

⁸ Navutswa Elirna, musegetiri (kigira lieta lilye li veye ndiyo kugirunkanywa) ya hangalidzana navo, yenya kutwulidza munyampara ku lisuuvira.

⁹ Navutswa Saulo, wa langwa Paulo, yizula Roho Mutakatifu, ya mwumika,

¹⁰ na a vola, E ive wizula ubugadi nekirage kyosi, mwana wa setani, musigu wobulungi bwosi, si u leka kukyaminya tsinzira tsinungi tsyo Mwami?

¹¹ Kalunu henza mukono gwo Mwami gu veye ku ive na ive u la vakula, u ta lola liuva inyinga i duki. Nonoho amatsengeri nekisundi kya duka kuye, ni yenya avandu kumugumira mukono kumwimirira.

¹² Hene yaho munyampara, lwa ya lola aga kolwa, ya suuvira na a genya ku amegidzo go Mwami.

¹³ Paulo navakye veve va nina mu bwato kutwula Pafo, ni va duka Periga lya Pamfulia. Kandi Yohana ya va leka ni yirana Yerusalemi.

¹⁴ Navutswa navo va vita kutwula Periga, ni va duka Antiokia lya Pisidia. Kandi vingira mu lisomero lidiku lyelisabato ni vikala

¹⁵ Inyima yelisoma amalago navaprofeti, avanene velivugana va tuma mundu kuvo, ni va vola, Avamitu, ni mu veye nelikuva lyokweganehidza avandu, mu vole.

¹⁶ Paulo ya singira na a va sima nomukono na a vola. Avasatsa va Israeli, na mwinye ava tia Nyasaye, mu huliridze:

¹⁷ Nyasaye wa vandu yava Israeli ya tovola vaguga vetu na a va nenehidza lwa va menya mu kivala kya Egepeti, na a vimirira na a va twulidza nomukono gwetsingulu.

¹⁸ Kandi ya va ha vyokulia kuli ise a lera, kuduka mbula mihiga amakumi gane, mu kyangalangwi.

¹⁹ Kandi lwa ya mala kwononnya tsihiri tsitanu na tsiviri mu kivala kya Kanani, ya ra ha kivala kyavo ki ve mwandu kuduka imihiga tsimia tsine na makumi gatanu.

²⁰ Inyima yevindu yivi ya va ha avakalagi kuduka madiku ga Samweli muprofeti.

²¹ Lwanyima va saava va hebwe mwami: na Nyasaye ya va ha Saulo mwana wa Kishi, mundu wehiri ya Benjamini, kuduka inyinga yemihiga amakumi gane.

²² Lwa ya mala kutwulidza uyu, ya singeridza Daudi a ve mwami wavo; wa ya lolekidza na a vola, Nyoye Daudi mwana wa Jesse, a veye mundu ku lugano lwomwoyo gwange, u li kola ubulaliri bwange bwosi.

²³ Ku likula lyomundu uyu, kuli lilagana lilye, Nyasaye ya letera Israeli Muhonnyi, naye ni Yesu.

²⁴ Inyinga ya li na a kikiri kuduka, Yohana ya mala kwilwadzira avandu vosi va Israeli, libatidza lyokweganira.

²⁵ Yohana lwa ya li ni yenya kumala ulugendo lwilwe, ya vola, Mwinye mu ganagana inze mbeye ibwaha? Inze si a li iye mba. Navutswa uyu mulala yadzanga inyima wange, si ndukana kumubohololira vilatu vyevirenge vivye.

²⁶ Mwinye avamitu, avana velikula lya Abrahamu, navo ku mwinye ava tia Nyasaye, likuva lyobuhonnyi yibu li letwa ku kwinye.

²⁷ Kigira yava ava menya Yerusalemi, navanene vavo, kigira si va mu manya, kandi si va manya myoyo gyavaprofeti ava somangwa amasabato gosi va va dukidza ku limukalagira.

²⁸ Kandi kali va vula kulola kuye kindu kyokumwiitira va saava Pilatu, yiitwe.

²⁹ Kand; lwa va mala kukola amakuva gosi ga ng'odwa kuye, va mu twulidza ku musala, ni va mu vika mu kilindwa.

³⁰ Navutswa Nyasaye ya mu simugukidza kutwula mu vakudzi:

³¹ naye ya loleka madiku manyingi ku yava avanegira kutsia Yerusalemi halala naye kutwula Galilaya, yava nivo avalolekidzi veve imbiri wavandu kalunu.

³² Kandi kwinye ku letera mwinye amakuva malahi, agelisuuviridza lya vaguga va hebwa,

³³ kuli Nyasaye ya dukidza lisuuriridza zana ku vana vetu, ku lisimugukidza lya Yesu; kuli ga ng'odwa kandi mu zaburi yetsiviri, Ive u veye Mwana wange, lero mmali kukwivula.

³⁴ Kandi ku makuva ga ya simugukidza mu vakudzi, a tirana kandi kwoneka, a vola ndi, Nda mu ha ubugasu bwa Daudi butakatifu nobusuuviridzi.

³⁵ Kigira a vola mu zaburi yindi, Si u nyala kuhaana Mutakatifu wowo a lole ubwoneku.

³⁶ Kigira Daudi, lwa ya mala kutumekira mu likula lilye ku makuva ga Nyasaye, ya gona tsindolo, na a daswa ku vaguga veve na a lola ubwoneku:

³⁷ navutswa uyu wa Nyasaye ya simugukidza si ya lola ubwoneku mba.

³⁸ Kigira yaga, ga manyekane ku mwinye, avamitu, ku mundu uyu mwilwadzwa lisameha lyobwoni:

³⁹ kandi ku uyu, vosi va mu suuvira va hebwa ubulungi ku litwulidzwa lya vyosi vyelilaga lya Musa li ta nyala kutwulidza.

⁴⁰ Kunangwa mu henze bulahi gase ga ladza ku mwinye agavaprofeti va vola:

⁴¹ Henzi, mwinye avalegi, mu genye mu kame; Kigira nda kola muyinzi mu madiku genyu, Muyinzi gwa mwinye mu ta nyala ligali kusuuvira, mulala na a va na a mbuulira.

⁴² Lwa Avayuda va li ni va twula, Avetsihiri va saava va volerwe amakuva yaga ku lisabato lindi.

⁴³ Livugana lwa lyavukana, Avayuda vanyingi navizamiri valahi va londa Paulo na Baranaba; ava volerana navo ni va veganehidza va menye mu tsimbabasi tsya Nyasaye.

⁴⁴ Ku lisabato lindi fwana lidala lvosi va vugana kuhulira likuva lya Nyasaye.

⁴⁵ Navutswa Avayuda vizula imbodoka lwa va lola viduma, ni va hangala ku vindu vya Paulo ya vola, ni va nyega.

⁴⁶ Paulo na Baranaba va luvirira ni va vola, Li nigwa likuva lya Nyasaye li tanga kuvolwa ku mwinye, navutswa kigi ra mu li luguta ihale, kandi si mwelola mu veye avalahi kuduka livamwoyo li ta hera mba, mu henze, kwinye ku girunkanira Tsihiri.

⁴⁷ Kigira Mwami ya ku laga ndiyo, na a vola, Mmali kukuvika u ve ubulavu bwe Tsihiri, U ve nobuhonnyi kuduka ku kiheri kyelirova.

⁴⁸ Avetshihri lwa va hulira yaga va tsantsalika ni vidzominya likuva lya Nyasaye: ni va suuvira vosi ava vikwa ku livamwoyo li ta hera mba.

⁴⁹ Likuva lyo Mwami lya landa mu kivala yikyo kyosi.

⁵⁰ Navutswa Avayuda va gemehidza avakali ava tia Nyasaye navalahi, kandi avasatsa avanene velidala, na va vukidza lidambidza ku Paulo na Baranaba ni va va kunga mu tsinzako tsyavo.

⁵¹ Navutswa navo va veyera ulugukyi lwevirenge, ni va tsia Ikonio.

⁵² Kandi avegidzwi vizula ubuyanzi na Roho Mutakatifu.