Vikolwa 12 - KITABU KITAKATIFU

¹ Inyinga yeyo mwami Herodi ya nyira makono gege kudambidza avalala ku avelivugana.

² Yiita Yakobo amwavo Yohana nekivavi.

³ Kandi lwa ya lola ga yanzidza Avayuda, ya dasa na a gumira Petro kandi. Amadiku vayo ga li gobukima bu ta li namamera.

⁴ Kandi lwa ya mala kumugumira, ya mu vika mu inyumba vavahambe, na a mu vika mu makono gavasikari vane hali kane va mu linde; yenya kumutwulidza a mu vike imbiri wa vandu inyima we Lipasaka.

⁵ Kunangwa Petro Ya lindwa mu inyumba yavahambe: navutswa livugana lya saala Nyasaye netsingulu kigira iye.

⁶ Hene yaho Herodi lwa yenya kumu twulidza, ubudiku zana yibwo, Petro ya li na a gona hagati havasikari vaviri na a boheywi neminyororo gyiviri: kandi mu kiliango kya li navalindi va linda inyumba yavahambe.

⁷ Kandi henza, ingelosi wo Mwami ya singira himbi naye, ubu lavu bwa ng'ereng'ana mu inyumba: na a dira Petro mu tsimbalu, na a mu vukidza, na a mu volera, Singira bwangu. Neminyororo gyigye gya tonya ni gyi twula ku makono gege.

⁸ Kandi ingelosi ya mu volera, Wivike ingubo nevilatu vivyo. Naye ya kola. Kandi ya mu volera, Wiyuhire ingubo yoyo, u nonde.

⁹ Ya tsia kyova na a mu londa; navutswa si ya manya nageligali agengelosi ya kola, navutswa ya ganagana ya lola maloto.

¹⁰ Lwa va mala kuvita kilindiru kilala nekya kaviri, va duka ku kiribwa kyekivya kyokwingira mu lidala: kya vigulikira kyene: kandi va tsia kyova, ni va tsia imbiri ku inzira indala, nonoho ingelosi ya mu leka.

¹¹ Kandi Petro lwa ya duka kumanya, ya vola, Kalunu mmanya ligali Mwami u tumi ingelosi wewe kuntwulidza mu makono ga Herodi nomu tsiganagani tsyavandu va Vayuda.

¹² Lwa ya ganagana inkuva yiyi ya duka ha inyumba ya Maria, mama wa Yohana wa li nelieta lindi, Marko; ha vanyingi va vugana ni va saala.

¹³ Kandi lwa yigulihidza ku lwizi lwekiribwa mukana wa langwa lieta lilye Rhoda, yadza kuhuliridza.

¹⁴ Kandi lwa ya manya mwoyo gwa Petro, si yigula muliango kigira ubuyanzi, navutswa ya nyagula na a tsia mu kuvola, Petro u singiye imbiri wekiribwa.

¹⁵ Va mu volera, U laluki. Navutswa ya kira kuvola, ga veye ndiyo. Ku, va vola, ni ingelosi wewe.

¹⁶ Navutswa Petro ya hongera kwigulihidza: navo lwa va mala kumwigulira va mu lola ni va genya.

¹⁷ Navutswa ya va sima nomukono va kiring'ane, na a va volera kuli Mwami ya mu twulidza mu inyumba yavahambe. Na a va volera, Mu voiere Yakobo amakuva yaga navamitu vosi. Naye ya twula na a tsia ahandi.

¹⁸ Lwa bwa kya avasikari va li nekihenda mwoyo ligali, Petro ya li ndi.

¹⁹ Kandi Herodi lwa ya mwenya na a vula kumulola, ya teva avalindi, kandi ya haana munwa va hilwe kwiitwa. Na mwene ya twula Ebuyuda na a tsia Kaisaria na a menya yo.

²⁰ Ku Herodi ya dunyira ligali avandu va Turo na va Sidone: kandi va tsia kuye nomwoyo mulala, lwa va nyola Blasito, mulindi wenyumba yomwami a gona mu, a ve mulina wavo, venya kwisayasaya, kigira avekivala kyavo va suma mu kivala kyomwami.

²¹ Kunangwa ku lidiku lya va lagana, Herodi yivika tsingubo tsyobwami, ni yikala ku intebe yekyina na a twulidza ami lwadzo.

²² Kandi avandu va hanzuka, ni va vola, Ni mwoyo gwanyasaye, si gwa li mwoyo gwomundu.

²³ Kandi nonoho ingelosi wo Mwami ya mu duya, kigira si ya ha Nyasaye ubukumi: tsing'ende tsya mu lia na a kudza.

²⁴ Navutswa likuva lya Nyasaye lya landa ni li neneha.

²⁵ Kandi Baranaba na Saulo virana kutwula Yerusalemi, lwa va mala ubutumiki bwavo, ni va leta halala navo Yohana welieta lindi Marko.