Vikolwa 10 - KITABU KITAKATIFU

¹ Ya li mu Kaisaria mundu mulala wa langwa Kornilyo, munyampara wo mugaanda gwavasikari gwa langwa Vaitalia,

² ya li mulahi wa tia Nyasaye, halala navenyumba yeye vosi, na a ha avandu tsisadaka tsinyingi, na a saala Nyasaye madiku gosi.

³ Ya lola mu maloto habulavu, kuli isaa i kola tsitanu na tsine tsyombasu, ingelosi wa Nyasaye yadza kuye na a mu volera, Kornilyo.

⁴ Naye ya mwumika tsimoni tsitsye na a tia na a vola, Ni kindu ki, Mwamii Na a mu volera, Lisaala lilyo netsisadaka tsitsyo vi duki igulu vi ve kyokwidzulitsa imbiri wa Nyasaye.

⁵ Kalunu u tume avandu va tsie Yopa, va lange mulala u langura Simoni welieta lindi Petro:

⁶ naye a veye mugeni womundu u langwa Simoni musidza wamasero, wenyumba yeye i veye ku luginga lwenyaanza.

⁷ Ingelosi wa volerana naye lwa ya mala kutsia, ya langa avatumekiri veve vaviri venyumba nomusikari mulala wa tia Nyasaye, kuvo va mu linda kazozo

⁸ kandi lwa ya mala kuvavolera vindu yivi vyosi, ya va tuma va tsie Yopa.

⁹ Mugamba lwa va li mu lugendo lwavo, va li venya kuduka mu lidala, Petro ya nina ku inyurnba igulu a saale, kuli isaa i kola tsitanu na indala.

¹⁰ Ma ya lola inzala ni yenya kulia: navutswa lwa va li ni va lomba vyokulia, ya girunkanywa mu mwoyo,

¹¹ na a lola ligulu li kunuka, nekindu kika ki fwana ingubo inene, yikidzwa netsinziga tsine kuduka hasi.

¹² Musi mwakyo tsya li mu tsing'ano tsyosi tsyetsinyama tsyevirenge vine, nevya mola hasi, namanvonyi gegulu.

¹³ Kandi mwoyo gwadza kuye, Singira, Petro; wiite u lie.

¹⁴ Navutswa Petro ya vola, Auwa, Mwami; kigira nkikiri kulia kindu kivi nekidamano.

¹⁵ Kandi mwoyo gwadza kuye hali kaviri, Kya Nyasaye ya takasa, ive u ta ki kola kidamano.

¹⁶ Yiki kya kolwa hali kavaka: nonoho kindu zana kingiridzwa kandi migulu.

¹⁷ Petro lwa ya ganagana munonono mu mwoyo gwigwe kivune kyamaloto ga ya lola, ni kindu ki henza avandu yavo ava Kornilyo ya tuma, va mala kuteva inyumba ya Simoni, va singira ha kiribwa,

¹⁸ ni va langa ni va teva, Simoni welieta lindi Petro, a menya mu naho mba.

¹⁹ Kandi Petro lwa ya ganagana maloto, Roho ya mu volera, Henza, avandu vavaka va kwenya.

²⁰ Kunangwa singira wike, u tsie halala navo, u ta hayahayidza: kigira inze nda va tuma.

²¹ Petro yika na a vola, Mbeye hano wa mwenya: mwidzi kigira ki?

²² Ni va vola, Kornilyo, munyampara, mundu mulungi, wa tia Nyasaye, kandi u veye nelidzominywa ku ihiri yosi ya Vayuda, wa Nyasaye ya mannya nengelosi mutakatifu a tume kulanga ive u tsie mu inyumba yeye, a duke kuhulira amakuva ku ive.

²³ Kunangwa ya vingiridza mu inyumba, na a va ha hokugona. Mugamba ya twula na a tsia halala navo, navandu vandi ku vamitu velidala lya Yopa va tsia halala naye.

²⁴ Mugamba vingira mu Kaisaria. Kornilyo ya va linda, naye ya mala kuvuganya avandu aviko veve, kandi ava li avalina veve ve ligali.

²⁵ Lwa Petro yingira, Kornilyo ya mwaganira na a mu gwira ha virenge, na a mu sigamira.

²⁶ Navutswa Petro ya mu singeridza, na a mu volera, Singira; inze mwene mbeye mundu.

²⁷ Kandi ya manya na a volerana naye, ni yingira, na a nyola vanyingi va vugani:

²⁸ na a va volera, Mwinye avene mu manya, si bu li bulahi mundu Muyuda kuhambana nokuvolerana nowundi wehiri yindi; navutswa Nyasaye u mali kummannya nta langa mundu mutwa kinga mudamano:

²⁹ kunangwa inze ntsidzi inyinga ya nangeywi, si nda hangala. Kigira yaga mmu teva ni kivune ki kya mu nangira.

³⁰ Kornilyo ya mu tivulira, Nda li ni nsaala mu inyumba yange, isaa i kola tsitanu na tsine, kutwula inyinga yeyo lero ni kane, henza, mundu ya singira imbiri wange wiviki tsingubo tsing'ereng'anu,

³¹ naye ya mbolera, Kornilyo, lisaala lilyo li hulirwa, netsisadaka tsitsyo tsidzulitswa imbiri wa Nyasaye.

³² U tume avandu va tsie Yopa, u lange Simoni welieta lindi Petro, yadze ku ive; a veye mugeni mu inyumba ya Simoni, musidza wamasero, a himbi nenyanza.

³³ Nonoho nda tuma avandu ku ive; na ive u koli bulahi udzi. Kalunu kwinye kwosi ku veye hano imbiri wa Nyasaye, kuhulira gosi go Mwami a ku laga.

³⁴ Kandi Petro ya kunula munwa na a vola. Ligali ndola Nyasaye si a suvidza avandu:

³⁵ navutswa mu tsihiri tsyosi wa mu tia na a kola bulungi a mu bugirira.

³⁶ Likuva lya ya hilira avana va Israeli, ni yilwadza ivangeli yemirembe i twula ku Yesu Kristo, (naye ni Mwami wa vosi)

³⁷ inkuva yiyi mwinye avene mu manya, ya landidzwa mu Buyuda bwosi, ya tanga kutwula Galilaya, inyima yelibatidza lya Yohana yilwadza;

³⁸ Yesu wa Nazareti kuli Nyasaye ya mu vaka Roho Mutakatifu netsingulu: wa vodonkana na a kola bulahi, na a honnya vosi ava Setani a legerera, kigira Nyasaye ya li halala naye.

³⁹ Kandi kwinye ku veye avalolekidzi vamakuva gosi ga ya kola mu kivala kye Buyuda nomu Yerusalemi; naye niye wa viita ni va mu sunga ku musala.

⁴⁰ Uyu Nyasaye ya mu simugukidza ku lidiku lya kola kavaka, na a mu lolekidza habulavu,

⁴¹ si ya mu lolekidza ku vandu vosi navutswa ku valolekidzi ava Nyasaye ya tanga kutovola, ku kwinye, va kwa lagira ni ku nwa naye inyima yelisimuguka lilye kutwula mu vakudzi.

⁴² Kandi ya ku laga kwilwadzire avandu, nokulolekidza uyu niye wa Nyasaye ya kola a ve Mukalagi wa va veye mwoyo na vakudzi.

⁴³ Avaprofeti vosi va lolekidza uyu, ku lieta lilye vosi ava mu suuvira va la nyola lisamefwa lyobwoni.

⁴⁴ Petro lwa ya vola amakuva yaga, Roho Mutakatifu yika kuvo vosi ava hulira likuva.

⁴⁵ Yava ava kevwa, ava suuvira, vosi avadza halala na Petro, va genya, kigira kihaanwa kya Roho Mutakatifu kya tsukwa ku vandu ve Tsihiri.

⁴⁶ Kigira va va hulira va vola netsinimi tsing'ano tsing'ano, ni vidzominya Nyasaye. Hene yaho Petro ya tivula,

⁴⁷ Ibwaha a nyala kwambakannya amadzi va ta batidzwa avandu yava ava hebwa Roho Mutakatifu kuli kwinye?

⁴⁸ Ku, ya haana munwa va batidzwe ku lieta lya Yesu Kristo. Kandi va mu goonya a menye navo madiku ga duki.