Vikolwa 1 - KITABU KITAKATIFU

¹ Kitabu kyokutanga kya nda lomba, O Theofilo, kya vyosi vya Yesu ya tanga kukola nokwegidza,

² kuduka ku lidiku lya yingiridzwa migulu, inyima ya ya mala kuheera avatumwa ava ya tovola, lilaga ku Roho Mutakatifu.

³ Kandi ya loleka kuvo mwene a veye mwoyo, ku vilolekidzu vyeligali vinyingi, inyima yobusaliri bwibwe, na a loleka kuvo inyinga yamadiku makumi gane, na a va volera amakuva gobwami bwa Nyasaye.

⁴ Kandi, lwa ya vugana navo ya veganehidza va ta twula Yerusalemi, navutswa va linde lisuuviridza lya Dada, lya ya rola, mwa hulira ku inze:

⁵ kigira Yohana ya batidza na madzi; navutswa mwinye mu la batidzwa mu Roho Mutakatifu inyima ya madiku makekeke.

⁶ Lwa va vugana halala va mu teva, ni va vola, Mwami, u lirannyira Israeli ubwami inyinga yiyi?

⁷ Ya va volera, Si tsi li tsyenyu kumanya tsinyinga nemihiga gya Dada ya laga mu tsingulu tsitsye.

⁸ Navutswa mwinye mu la nyola tsingulu lwa Roho Mutakatifu a lidza ku mwinye: mu la va avalolekidzi vange mu Yerusalemi, kandi mu Buyuda bwosi kandi mu Samaria, kandi kuduka ku kiheri kyelirova.

⁹ Kandi lwa ya mala kuvola yaga inyinga ya va henza, ya gingwa igulu: nelilesi lya mu vugula ni li mu twulidza mu tsimoni tsyavo.

¹⁰ Lwa vumika migulu, inyinga ya li na a tsia, henza, avandu vaviri avivika tsingubo tsindavu, va singira navo;

¹¹ ni va va volera, Mwinye avandu ve Galilaya, kigira ki mu singira mu henza migulu? Yesu uyu wingeridzeywi migulu kutwula ku mwinye, a lirana kandi kuli mwinye mu mu loli na a tsia migulu.

¹² Kunangwa virana Yerusalemi kutwula mu kigulu kya langwa Mizeituni, kya li himbi ne Yerusalemi, ulugendo lwelidiku lyelisabato.

¹³ Lwa va mala kwingira mu, va nina mu inyumba yigulu, ya va menya mu, Petro, na Yohana, na Yakobo, na Andreya, na Filipu, na Tomasi, na Bartlomeyo, na Matayo, na Yakobo wa Alfayo, na Simoni Zelote, na Yuda wa Yakobo.

¹⁴ Yava vosi va menya nomwoyo mulala mu lisaala, halala navakali valala, na Maria mama wa Yesu, navamwavo veve.

¹⁵ Mu madiku yago Petro ya singira mu vamwavo hagati (va li avandu vosi halala va duka mia indala na makumi gaviri), na a vola,

¹⁶ Avamitu, bwa li bulahi amang'oda ga dukidzwe, aga Roho Mutakatifu ya vola nomunwa gwa Daudi, ku Yuda wimirira ava gumira Yesu

¹⁷ u Kigira ya validzwa halala na kwinye, na a sanga na kwi nye mu butumwa yibu.

¹⁸ (Mundu uyu ya gula mulimi namadanyi gobwoni bwibwe; na a gwa mammama na a huduka hagati, namala gege gosi ga salika.

¹⁹ Kandi ga duka kumanyekana ku vandu vosi ava menya Yerusalemi; kuli mulimi yigwo gwa langwa mu lulimi lwavo Akelidama, livola lyago li veye, Mulimi gwamasahi.)

²⁰ Kigira ga ng'odwa mu kitabu kya Zaburi, Hango hehe ha lekwe, Kandi mundu a ta menya ho: kandi, Ubutumiki bwibwe, wundi a hile.

²¹ Ku vandu ava hambana na kwinye madiku gosi go Mwami Yesu yingira na a twula hagati hetu,

²² kutwula ku libatidza lya Yohana, kuduka inyinga ya yingiridzwa migulu kutwula ku kwinye nu bulahi mulala a veye mulolekidzi welisimuguka lilye, halala na kwinye

²³ Ma va vika avandu vaviri, Yosefa wa langwa Barasaba kandi ya langwa Yusito, na wundi Mathia.

²⁴ Kandi va saala ni va vola, Ive, Mwami, u manya myoyo gyavandu vosi, u ku mannye wa u tovoye ku vandu vaviri yava,

²⁵ a gumire ubutumiki nobutumwa yibu bwa Yuda ya lega, a tsie hehe mwene.

²⁶ Ma va kola ikura kuvo; ikura ya gwira Mathia; naye ya validzwa halala navatumwa likumi na mulala.