Varumi 9 - KITABU KITAKATIFU

¹ Mbola ageligali mu Kristo, si mbehanga mba, mwoyo gwange gu ndolekidza mu Roho Mutakatifu,

² mbeye neliverera linene nobusaliri obu ta hera mu mwoyo gwange

³ Kigira nyala kuyanza inze mwene mbe wa laamwa kutwulidzwa ku Kristo kigira avamwavo vange, avika ku lugano lwomubiri;

⁴ ava veye Israeli, likolwaavana ni lyavo, nobukumi, namalago, kandi lihaanwa lyelilaga, nelitumekira Nyasaye, neli suuviridzwa, vi veye vyavo:

⁵ na vaguga va veye vavo, avn Kristo ya twula kuvo ku lugano lwomubiri, u veye igulu ku vyosi, Nyasaye u veye nobugasu mihiga nemihiga. Amini.

⁶ Navutswa si ga li kuli likuva lya Nyasaye lya diva. Kigira vosi avi vula ku Israeli si va li Avaisraeli vosi

⁷ kandi si va li vosi avana kigira va veye kisukululwi kya Abrahamu: navutswa, Mu Isaka ki la langwa kisukululwi kikyo.

⁸ Si va li avana vomubiri ava veye avana va Nyasaye; navutswa avana velisuuviridzwa yava va volangwa va veye visukululwi.

⁹ Kigira likuva yili ni likuva lyelisuuviridzwa, Kuli inyinga yiyi ndadza, na Sara a la nyola mwana mwikula.

¹⁰ Kandi si ga li yaga geng'ine, navutswa Rebeka lwa ya mala kuvereka inda yomulala, naye ni Isaka guga wetu

¹¹ kigira avana lwa va li ni va kikiri kwivulwa, kandi inyinga va kikiri kukola kindu kilahi kinga kidamano, ubulaliri bwa Nyasaye mu litovola bu duke kusingira, si bwa li bwemiyinzi, navutswa bwa uyu u langa,

¹² uyu Rebeka ya volerwa Uyu munene a la tumekira mke.

¹³ Kuli ga ng'odwa, Nda yanza Yakobo, navutswa Esau nda mbihirirwa.

¹⁴ Kunangwa ku vola ki? Ha veye nobukyamu ku Nyasaye? Ga ta va ndiyo.

¹⁵ Kigira ya volera Musa, Nda vererera uyu wa nda vererera, kandi nda kolera uyu tsimbabasi wa nda kolera tsimbabasi.

¹⁶ Kunangwa si ga li ga uyu wenya, kinga ga uyu u nyagula, navutswa aga Nyasaye u vererera.

¹⁷ Kigira ma ng'oda ga volera Farao, Nda vika ive kigira ubulaliri yibu, nduke kuku lang'aminyira tsingulu tsyange, kandi lieta lyange li duke kulandidzwa mu lirova lyosi.

¹⁸ Kunangwa a vererera uyu wa a yanza, kandi wa a yanza a mu dinyiridza.

¹⁹ Kunangwa u la nteva, Ga li ndi mwene na a lola ubwoni bu veye kuvo? Kigira ibwaha a nyala kusula ubulaliri bwibwe?

²⁰ Ga ta va ndiyo, navutswa, ive mundu, u veye ibwaha u tivulira Nyasaye? Kindu kya lombwa ki nyala kuvolera uyu wa ki lomba, Kigira ki wa nomba ndi?

²¹ Naho mulongi si a li netsingulu ku lidohi, ku lihumbi lilala a longe kidonye kilala ki ve kiju kyelidzominywa, nekidonye ki ndi ki ve kiju ki ta li nelidzominywa?

²² Ki la va ki, ni i va Nyasaye yikudzira nobwikudziri bunyingi ku viju vyobutima vya tegekirwa ubwoneku, kigira yenya kulang'aminya ubutima bwibwe, nokumannya tsingulu tsitsye:

²³ kandi a duke kumannya ubutugi bwetsimbabasi tsitsye ku viju vyetsimbabasi, vya ya tanga kulomba kuduka mu bukumi,

²⁴ ga veye ku kwinye ava ya langa, si va li ava twula mu Vayuda ve ng'ine, navutswa ava twula mu Tsihiri tsindi?

²⁵ Kandi kuli a vola mu kitabu kya Hosea, Nda langa yava avandu vange ava vula kuva avandu vange; Kandi u vula kulangwa muyanze, nda mu langa muyanze.

²⁶ Kandi ga la va, ha va volerwa, Si mu veye avandu vange Va la langirwa ho avana avikula va Nyasaye welivamwoyo.

²⁷ Kandi Isaya a kupa lwanga ku Vaisraeli ndi, Hesabu ya vana va Israeli ni i va ni i veye kuli muyeke gwomu inyanza, li veye litigala lyavo li li honnywa:

²⁸ kigira Mwami a la kola makuva gege ku lirova, a li malilidza nokugakalaga.

²⁹ Kandi kuli Isaya ya tanga kuvola, Umwami wa Mahe a vula kukulekera kisukululwi, Nkano kwa ka va kuli Sodoma, kandi nkano kwa ka fwana nnywa na Gomora.

³⁰ Kunangwa ku vola ndi? Avandu ve Tsihiri ava ta londa ubulungi, va duka ku bulungi, yibu nobulungi bwelisuuvira;

³¹ navutswa Avaisraeli lwa va londa lilaga lyobulungi si va duka ku lilaga zana.

³² Kigira ki? Kigira si va gi londa nelisuuvira, navutswa kuli va londa nelikola. Vikigitala ku ligina lyokwikigitalidza;

³³ kuli wa ga ng'odwa, Henza, mbika ku Zioni iigina lyokwikigitalidza, nolwanda lwokuvihiriridza: Noyu u mu suuvira si a li va soni.