Varumi 6 - KITABU KITAKATIFU

¹ Kunangwa ku la vola ndi? Ku menye mu bwoni, tsimbabasi tsi duke kukira?

² Ga ta va ndiyo. Kwinye kwa gwa avakudzu ku bwoni, ku nyala ndi kumenya mubwo?

³ Si mu manya kwinye kwosi ava kwa batidzwa mu Yesu Kristo kwa batidzwa mu likudza lilye?

⁴ Kunangwa kwa tebwa halala naye ku libatidzwa mu likudza: kuli Kristo ya simugukidzwa nobukumi bwa Dada kutwula mu vakudzu, kandi kwinye ku nyale kugenda mu buhya bwelivamwoyo.

⁵ Kigira ni ku va ni kwung'anywa naye mu lugano lwelikudza lilye, kandi ndiyo ku lung'anywa naye mu lugano lwelisimuguka lilye.

⁶ Ku manya yaga, mundu wetu wa kale ya bambwa halala naye, mubiri gwobwoni gwononywe, ku ta va kandi avatugwa vobwoni.

⁷ Kigira u kudzi a veye muboholole ku bwoni.

⁸ Navutswa kwinye ni ku va ni kwa kudza halala na Kristo, ku suuvira ku la va mwoyo halala naye kandi.

⁹ Ni ku manya ndi, Kristo ya simugukidzwa, si ya kudza kandi; likudza si lyameha kuye kandi.

¹⁰ Kigira likudza lya ya kudza, ya gwa mukudzu ku bwoni lulala: navutswa livamwoyo lya a veye mwoyo, a veye mwoyo ku Nyasaye.

¹¹ Kandi mwinye ndiyo mwevalidza mwinye avene mu veye ava gwiye avakudzu ku bwoni, navutswa mu veye ava veye mwoyo ku Nyasaye mu Kristo Yesu.

¹² Kunangwa mu ta bugirira bwoni kwameha mu mibiri gyenyu gyelikudza, mu duke kuhulira likayirwa lyabwo.

¹³ Kandi mu ta hila vivero vyenyu mu bwoni, kuli viju vyobwoneku; navutswa mwihile ku Nyasaye, kuli ava veye mwoyo kutwula mu vakudzu, ne vivero vyenyu vi ve kuli viju vyobulungi ku Nyasaye.

¹⁴ Kigira ubwoni si bu lameha ku mwinye mba: kigira si mu veye ku lilaga navutswa mu veye ku tsimbabasi.

¹⁵ Kunangwa ni kindu ki? Ku kole ubwoni kigira si ku veye ku lilaga, navutswa ku tsimbabasi? Ga ta va ndiyo.

¹⁶ Si mu manya, uyu wa mwihila kuye kuli avatugwa nokuhulira, mwinye mu veye avatugwa va uyu wa mu hulira; ni mu va ni mu veye ku bwoni kuduka likudza, naho ni mu veye ku lihulira kuduka ubulungi?

¹⁷ Navutswa Nyasaye a santidzwe, kigira kuli lwa mwa li avatugwa vobwoni mwa hulira nemyoyo gyenyu lugano lwelyegidza yilyo lya mwa vikwa mu;

¹⁸ ma lwa mwa gwa avaboholole ku bwoni, mwa gwa avatugwa vobulungi.

¹⁹ Mbola kuli mundu, kigira ubudedekere bwemibiri gyenyu. Kigira kuli mwa hila vivero vyenyu kugwa avatugwa vobudamano navekirage kuduka kirage kindi, ndiyo kandi kalunu mu hile vivero vyenyu vi gwe avatugwa vobulungi kuduka mu butakatifu.

²⁰ Kigira lwa mwa li avatugwa vobwoni, mwa li avaboholole ku bulungi.

²¹ Inyinga zana mwa li namakuyu ki mu vindu vya mu veye soni navyo kalunu? Kigira kiheri kyevindu yivyo ni likudza.

²² Navutswa kalunu, ni mu mali kukolwa ndi avaboholole kutwula ku bwoni kugwa avatugwa va Nyasaye, mu veye namakuyu kuduka ku butakatifu, nekiheri ki veye livamwoyo lyemihiga nemihiga.

²³ Kigira madanyi gobwoni ni likudza; navutswa kihaanwa kya Nyasaye ki veye livamwoyo lyemihiga nemihiga mu Kristo Yesu Mwami wetu.