Varumi 4 - KITABU KITAKATIFU

¹ Kunangwa ku la vola Abrahamu guga wetu, ya nyola ki ku luvega lyomubiri?

² Kigira Abrahamu na a va ni ya hebwa bulungi kigira miyinzi, a veye nagokwiidzominya; navutswa si ga veye imbiri wa Nyasaye.

³ Kigira Mang'oda ga vola ki? Abrahamu ya suuvira Nyasaye, kandi lisuuvira lilye lya volwa kuye li veye bulungi.

⁴ Navutswa ku uyu u yinziranga, madanyi gege si ga volwa ga veye getsimbabasi, navutswa ga veye kuli ligovi.

⁵ Navutswa uyu u ta yinzira, navutswa a suuviranga ku uyu u hedzanga avekirage ubulungi, lisuuvira lilye li validzwa li yeye buhlngi.

⁶ Kuli Daudi a vola ubugasu bu veye ku mundu uyu wa Nyasaye a vola a veye nobulungi bugira miyinzi,

⁷ Na a vola, Va veye nobugasu avamahyolo gavo ki sameheywi Kandi avobwoni bwavo bwa kunikirwa.

⁸ A veye nobugasu mundu uyu wo Mwami a ta validza kuye ubwoni.

⁹ Kunangwa ubugasu yibu bu veye ku yava ava kevwa veng'ine, naho ku yava ava vula kukevwa kandi? Kigira ku vola, Ku Abrahamu, lisuuvira lilye lya validzwa li veye bulungi.

¹⁰ Lya validzwa ndi? Lwa ya li mukeve, naho lwa ya li ni ya vula kukevwa? Si ga li lwa ya li mukeve navutswa lwa ya li ni ya vula kukevwa.

¹¹ Kandi ya bugirira likevwa li ve kiloleru, nu muhuri gwobulungi bwelisuuvira lya ya li nalyo na a kikiri kukevwa: a duke kuva ise wa vosi ava suuvira, ni va vula kukevwa, va duke kuvalidzwa va ve nobulungi.

¹² Kandi a ta va ise wavakeve ve ng'ine, navutswa wa yava ava genda mu tsinduvatiru tsyelisuuvira yilyo, lya guga wetu Abrahamu lya ya li nalyo na a kikiri kukevwa.

¹³ Kigira lisuuviridza lya Abrahamu ya hebwa nevisukululwi vivye, a la va u nyola miyandu gyelirova, si lya li kigira lilaga, navutswa kigira ubulungi bwelisuuvira.

¹⁴ Kigira yava avelilaga ni va va ava nyola miyandu lisuuvira lyoneki, kandi lisuuviridza li koleywi lyavutswa:

¹⁵ kigira lilaga li leta ubutima; navutswa inyinga lilaga li ta li ho, si ha li nelihyola.

¹⁶ Kigira yaga ubulungi bu twula mu lisuuvira, bu duke kuva kuli tsimbabasi; lisuuviridza li duke kuva netsi ngulu ku visukululwi vyosi; si li veye ku yivi vyelilaga vyeng'ine navutswa ku yivyo kandi vyelisuuvira lya Abrahamu, u veye dada wa kwinye kwosi

¹⁷ (kuli ga ng'odwa, Mmali kukola ive ise wetsihiri tsinyingi) imbiri wa uyu wa ya suuvira, naye ni Nyasaye, u hedza avakudzu livamwoyo, kandi u talanga vindu vi ta li ho, kuli vi veye ho.

¹⁸ Wa suuvira lwe lisuuvira li ta li ho, a duke kuva ise wetsihiri tsinyingi, kuli aga volwa, Ni ndiyo visukululwi vivye vi li va.

¹⁹ Bugira lidedekera mu lisuuvira ya lola mubiri gwigwe kuli gu kudzi (ya li ni yenya kuduka mihiga mia), nobugumba bwenda ya Sara.

²⁰ Yee, lwa ya henza lisuuviridza lya Nyasaye, si ya hayahayidza na a vula kusuuvira mba, navutswa ya kira kunyola tsingulu ku lisuuvira ni yidzominya Nyasaye,

²¹ kigira ya mannywa ligali kya Nyasaye a mali kulaga a la nyala kukola.

²² Kigira yaga lya validzwa kuye li veye ubulungi.

²³ Kunangwa si ga ng'odwa kuye yeng'ine, kuli wa ga validzwa kuye;

²⁴ navutswa ku kwinye kandi, ava li validzwa ndiyo, ava suuvira ku uyu wa simugukidza Yesu Mwami wetu kutwula mu vakudzu,

²⁵ wa haanwa kigira lihyola lyetu, kandi ya simugukidzwa kigira lilungekidzwa lyetu.