Varumi 13 - KITABU KITAKATIFU

¹ Avandu vosi ava veye mwoyo vegehidze ku yava ava veye netsingulu kuvo: kigira si ha veye nowameha u vula kutwula ku Nyasaye; kandi avameha ava veho, Nyasaye ya va vika.

² Kigira yaga, uyu u hing'ana ku avameha, a hing'ana namalago ga Nyasaye; kandi yava ava hing'ana va lenyolera likalagirwa avene.

³ Kigira avameha si va veye litihidza ku miyinzi milahi, navutswa ku midamano. Na ive wenya u vule kutia tsingulu? U kole malahi na ive u la nyola lidzominywa kuye:

⁴ kigira a veye mutumwa wa Nyasaye ku ive kigira ubulahi. Navutswa ive nu u kola ubudamano, u tie; kigira si a gendera vutswa kivavi: kigira a veye mutu mwa wa Nyasaye, uyu wa mala kisalya kyobutima ku uyu wa kola ubudamano.

⁵ Kunangwa nu bu lahi mwegehidze ku tsingulu, si ga li ku butima bweng'ine, navutswa mu mwoyo kandi.

⁶ Kandi yiki ni kigira mu tunganga ubushutu: kigira va veye avatumwa va Nyasaye, ava menya madiku gosi mu inkuva yene yiyi.

⁷ Mu he vosi kya va dukana nakyo; kodi ku yava ava dukani nekodi; ubushutu ku yava ava dukani nobushutu; ubutii ku yava ava dukani nelitibwa; lidzominya ku yava ava dukani nelidzominywa.

⁸ Mu ta va neligovi lyomundu kali mulala, navutswa lyokuyanzana avene navene mu veye nalyo: kigira uyu u yanza wundi u mali kwizulitsa lilaga.

⁹ Kigira amalago yaga, U ta heya mba, U tiita mba, U tiba mba, U ta kayirwa mba kindu kyowundi, kandi ni ga veyeho lilaga lindi li tsukanyeywi mu likuva yili, nalyo ni yili, U yanze mutende wowo kuli weyanza.

¹⁰ Ubuyanzi si bu kola ubudamano ku mutende: kunangwa ubuyanzi bu veye kyokwizulitsira lilaga.

¹¹ Kandi yaga, ku manya inyinga, kalunu ni inyinga yenyu yokuvuka mu tsindolo: kigira kalunu buhonnyi bwetu bu veye himbi ku kwinye kuvita lwa kwa tanga kusuuvira.

¹² Ubudiku bu vitanga ligali, kandi mbasu gu veye himbi: kunangwa ku twulidza miyinzi gyekisundi, na kwivike vyuma vyobulavu.

¹³ Ku gende nobuhokya, kuli mbasu; si ga li mu bukinu nomu lihambika, kandi si ga li mu buheyi nomu livolidza, si ga li mu mahangali nembodoka.

¹⁴ Nawtswa mwevike Mwami Yesu Kristo, kandi mu ta lombera liva lyomubiri lyokudukidza likayirwa lyalyo mba.