Varumi 11 - KITABU KITAKATIFU

¹ Kunangwa nteva, Nyasaye yesigana avandu veve? Ga ta va ndiyo ligali. Kigira inze mwene kandi mbeye Muisraeli, ku visukululwi vya Abrahamu, wehiri ya Benjamini.

² Nyasaye si yesigana avandu veve va ya tanga kumanya. Naho si mu manya aga mang'oda ga vola ku Elija? Kuli wa ya saala Nyasaye ku Vaisraeli:

³ na a rola, Mwami, viita avaprofeti vovo, ni va tigula bwali bubwo; na inze ntigaye tsyeng'ine, kandi venya livamwoyo lyange.

⁴ Navutswa litivula lya Nyasaye lya mbolera ki? Lya mu rolera, Ntigaye navandu tsieliu tsitano natsiviri ava vula kusigamira Baal.

⁵ Kunangwa na ndiyo kandi inyinga ya kalunu va veho avatigaye mulitovola lyetsimbabasi.

⁶ Navutswa ni li va ni li veye ku tsimbabasi, si li veye ku likola kandi: ni ga va ndiyo tsimbabasi si tsi veye tsimbabasi kandi.

⁷ Kunangwa ni kindu ki? Ikya Israeli ya li ni yenya, yiki si ya ki nyola; navutswa avatovole va ki nyola, navandi va kolwa avadinyu:

⁸ kuli wa ga ng'odwa, Nyasaye ya va ha mwoyo gwetsindolo tsinene, tsimoni tsi vula kulola, namatu ga vula kuhulira, kali kuduka lidiku lya lero.

⁹ Kandi Daudi a vola, Imeza yavo i gwe ubuliva, kandi mutego, Kandi i gwe kyokwikigitalidza, kandi amadanyi gavo:

¹⁰ Tsimoni tsyavo tsi vakulidzwe, va vule kulola, Winaminnye imigongo gyavo madiku gosi.

¹¹ Kunangwa nteva, Vikigitala va duke kugwa ligali? Ga ta va ndiyo ligali: navutswa ku lihyola lyavo ubuhonnyi bu duki ku Tsihiri kukendekidza Vaisraeli.

¹² Kunangwa, ligwa lyavo ni li va ni li veye ubutugi bwelirova, kandi ubugeheru bwavo ni bu va ni bu veye ubutugi bwe Tsihiri nasindi ubuhinda bwavo bu la va ndi?

¹³ Navutswa mbolera mwinye ave Tsihiri. Kunangwa kigira mbeye mutumwa we Tsihiri, nzidzominya ubutumwa bwange;

¹⁴ mbula nduke ku vyosi kukendekidza avolulera lulala ninze, nokuhonnya avalala kuvo.

¹⁵ Kigira lyeseganwa lyavo ni li va ni li veye kyokuhambanya lirova, libugirirwa lyavo li la va ki? Li la ra livamwoyo kutwula mu vakudzu.

¹⁶ Kandi ubuhya ni bu va ni bu veye butakatifu, lihumbi lyosi li veye ndiyo: kandi kitinya ni ki va ni ki veye kitakatifu, kandi tsisya tsi veye ndiyo.

¹⁷ Navutswa tsisya tsindi ni tsi vunanywa, nive u veye mzeituni gwomulitu wa hambanywa hagati havo, kandi wa sanga halala navo kitinya kyobunetu bwomzeituni;

¹⁸ u tiidzominya ku tsisya: navutswa nu u va nu wiidzominya, si a li ive u ginga kitinya, navutswa kitinya ki ginga ive.

¹⁹ Kunangwa u la vola, Tsisya tsya vunanywa, inze nduke kuhambanywa.

²⁰ Bulahi; tsyavu nanywa kigira livula kusuuvira lyavo nive u singira kigira lisuuvira lilyo. U tigingira, navutswa u tie:

²¹ kigira Nyasaye na a va na a ta vererera tsisya tsya kale, kandi si a li vererera ive.

²² U henze ubulahi nobululu bwa Nyasaye: ku yavo ava gwa ubululu; navutswa ku ive ubulahi bwa Nyasaye, nu u va nu u menya mu bulahi bwibwe: navutswa ni ga ta veye ndiyo ive kandi u leseganwa.

²³ Navo kandi ni va ta menya mu livula kusuuvira lyavo, va la hambanywa: kigira Nyasaye a nyala kuvahambannya kandi.

²⁴ Kigira ive nu u va nu u temagwa kutwulidzwa ku mzeituni gwomulitu gwa kale, nokuhambannywa ku mzeituni mu lahi ku miima gu ta li gwa kale; nasindi yitsi tsya kale tsyene tsi la vula ndi kuhambannywa?

²⁵ Kigira si nyenyi, mwinye avamitu, mu vule kumanya kya viswa yiki, gase mu la va nobugeeri bwenyu avene; ubudinyu bulala bu gwiriye Israeli, kuduka inyinga yobudukidza bwe Tsihiri bu duka kwingira;

²⁶ ndiyo Israeli yosi i la honnywa: kuli wa ga ng'odwa, Muhonnyi a la twula Zioni A la twulidza ku Yakobo livula kutia Nyasaye:

²⁷ Yili ni lilagana lyange kuvo Lwa ndi twulidza bwoni bwavo.

²⁸ Ku ivangeli va veye avasigu kigira mwinye: navutswa ku litovola va veye avayanze kigira vaguga.

²⁹ Kigira vihaanwa nelilanga lya Nyasaye si li veye neligirunkana.

³⁰ Kigira kuli mwinye kale mwa vula kutia Nyasaye, navutswa kalunu mu verereywi ku livula kutia lyavo,

³¹ na ndiya kandi kalunu yava va vula kutia, ku liverererwa lyenyu navo va duke kuverererwa.

³² Kigira Nyasaye u bohi vosi halala mu livula kutia, a duke kuvererera vosi.

³³ O ubunyingi bwobutugi bwobugeeri no bwelimanya bwa Nyasaye likalaga lilye li vula kumanyekana ndi, kandi tsinzira tsitsye tsi vula kunyoleka ndi

³⁴ Kigira ibwaha u manya tsiganagani tsya Nyasaye? Kandi ibwaha wa li mulungikidzi wewe?

³⁵ Kandi ibwaha wa tanga kumuha kindu, naye a liranyirwa?

³⁶ Kigira vindu vyosi vya twula muye, ni vidzira kuye; kandi virana kuye. A ve nobukum; mihiga nemi higa. Amini.