Vakalagi 6 - KITABU KITAKATIFU

¹ Navana va Israeli va kola budamano kandi imbiri wa Yahova: na Yahova ya va vika mu makono ga Midiani mihiga gyitano na gyiviri.

² Mukono gwa Midiani gwa guuta Israeli, kandi kigira Midiani avana va Israeli velombera bogo mu vigulu, netsimbangaywa, netsimpinga.

³ Kunangwa ga li ndiyo, lwa Israeli va midza milimi gyavo, Vamidiani na Vaamaleki vanegira, navana vevugwi; vanegira kuvo;

⁴ na va singeridza mahema gavo, nokwononya ubunyingi bwekivala, kuduka ku here ku Gaza, na si va leka kyokuhonira mu Israeli, kali hakuzu, magondi, kinga igiriki, kinga isukiri.

⁵ Kigira vanegira netsing'ombe tsyavo namahema gavo; vingira mu kuli tsisigi ku bunyingi bwavo; yavo ne tsing'amia tsyavo tsya vula kuvalika: na vingira mu kivala yikyo ni va kyononnya.

⁶ Na Israeli ya gehidzwa ligali kigira Vamidiani; na avana va Israeli vanira Yahova.

⁷ Kunangwa, lwa avana va Israeli vanira Yahova kigira Vamidiani,

⁸ Yahova ya tuma muprofeti ku avana va Israeli: naye ya va volera, Yahova, Nyasaye wa Israeli, a vola ndina, Inze nda mu leta mwanegire kutwula Egepeti, nda mu twulidza mu inyumba yobutugwa;

⁹ na nda mu honnya mu makono ga Vaegepeti nokutwula ku makono ga vosi ava li ni va mu dambidzanga, na nda va kunga kutwula imbiri wenyu, na nda ha mwinye kivala kyavo;

¹⁰ na nda mu volera, Inze mbeye Yahova Nyasaye wenyu; si mu la tia avanyasaye va Vaamori, ava mu menyi mu kivala kyavo. Navutswa mwinye mwa vula kuhulira mwoyo gwange.

¹¹ Na ingelosi wa Yahova yadza, na yikala musi mwomusala gwa li mu Ofira, gwa li mu miyandu gya Joashu Mwabieziri: nomwana wewe wa langwa Gideoni wa huulanga ubuswage mu kyokuminira iwaini, kubuvisa, Vamidiani va vula kulola.

¹² Na ingelosi wa Yahova ya loleka kuye, na a mu volera, Yahova a veye halala nive, ive wetsingulu nobuluviriri.

¹³ Na Gideoni ya mu volera, Ive, mwami wange, Yahova na a va na a veye halala nekwinye, kigira ki inkuva yiyi i ku gwira? Hemiyinzi gyigye gyosi gyokugenya gyi veye haliha, gya vadada vetu va kwilwadzira, ni va vola, Yahova si ya ku leta kwanegire kutwula Egepeti? Navutswa kalunu Yahova u mali kukuta, na u ku viki mmakono ga Vamidiani.

¹⁴ Na Yahova ya mu henza, na a mu volera, U tsie netsingulu tsitsyo yitsi, kuhonnya Israeli ku mukono gwa Vamidiani: inze si nda ku tuma?

¹⁵ Naye ya mu volera, O, Mwami, inze nda honnya Israeli nekindu ki? Henza, aviko vange va veye avadaka ligali mu Manase, na inze mbeye mukekeke mu inyumba ya dada wange.

¹⁶ Yahova ya mu volera, Ligali inze nda va halala nive, na u la kuya Vamidiani kuli umundu mulala.

¹⁷ Naye ya mu volera, Ni mba ni nyoye liverererwa imbiri wowo, kalunu u mmannye kilolekidzu nduki kumanya nive u volerananga inze.

¹⁸ Nku saala u ta twula hano mba, mwadza, nduhe nduke ku ive, nokuleta kihaanwa kyange, nokukivika imbiri wowo. Naye ya mu volera, Nda linda kuduka lwa u duka kandi.

¹⁹ Na Gideoni yingira, na a mwiitira kimeme, nobukima bu ta li namamera na efa yobusie: nenyama zana ya gi vika mu kihinda, nomunyu ya gu vika mu inyingu, na ya mu letera kyova isi womusala, na a mu sundira.

²⁰ Ma ingelosi wa Nyasaye ya mu volera, Vugula inyama nobukima bu ta li namamera, u vi vike ku ligina yili, na u sundule munyu. Naye ya kola.

²¹ If ene yaho ingelosi wa Yahova ya nyira isonga yempimbo ya ya li nayo mmukono gwigwe, na a dira inyama noku bukima bu ta li namamera; nomuliru gwaaduka kutwula mu ligina, na gwa samba inyama nobukima bu ta li namamera; na ingelosi ya twula mu tsimoni tsitsye.

²² Na Gideoni ya lola uyu a veye ingelosi wa Yahova; Gideoni ya vola, Bayaye O Yahova Nyasaye kigira ndoli ingelosi wa Yahova moni namoni.

²³ Na Yahova ya mu volera, Mirembe gyi veye ku ive; u ta tia mba: si u la kudza mba.

²⁴ Hene yaho Gideoni yombakira Yahova ubwali ha zana, na ya gulika ha zana Yahova-shalom: kuduka lero ha veye mu Ofira lya Vaabieziri.

²⁵ Na ga duka ku ubudiku yibwo, Yahova ya mu volera, Vugula ing'ombe ya dada wowo, ing'ombe ya kaviri yemihiga gyitano ne gyiviri, u tsome hasi ubwali bwa Baal bwa dada wowo ya li nabwo, na u temage misala gyemisambwa gyi veye himbi nabwo:

²⁶ na wombakire Yahova Nyasaye wowo ubwali igulu wolwanda yilu, ku lilohidzwa lyabwo lyosi, na u vugule ing'ombe ya kaviri, kukihaana kihaanwa kyokusambwa, na tsinku tsyemisala gyemisambwa gya u li temaga.

²⁷ Hene yaho Gideoni ya wgula avandu avasatsa likumi mu vatumekiri veve, na ya kola kuli Yahova ya mu volera: kunangwa, kigira ya tia avandu avenyumba ya dada wewe, na vasatsa velidala, si a nyala kukola mbasu, ya kola ubudiku.

²⁸ Ma lwa avasatsa velidala yilyo va vuka mabwebwe, henza, ubwali bwa Baal bu gwiye hasi, nemisala gyemisambwa gyi vedzanga himbi gyi temageywi, ne ing'ombe ya kaviri i haaneywi ku bwali bwombakeywi.

²⁹ Na va volerana avene navene, Ni bwaha u kola inkuva yiyi? Lwa va li ni venya nokuteva, va vola, Ni Gideoni mwana wa Joashu u koli inkuva yiyi.

³⁰ Hene yaho avasatsa velidala yilyo va volera Joashu, U lete mwana wowo, a kudze, kigira u tsomi hasi ubwali bwa Baal, kandi kigira u temagi misala gyemisambwa gya li himbi nabwo.

³¹ Na Joashu ya volera yavo vosi ava singira kuye, Mwinye mu la sola Baal? Kinga mwinye mu la mu honnye? Uyu wenya kumusola, yiitwe ni gu kikiri mugamba: na a va na a veye nyasaye, yesole mwene, kigira mulala ya tsoma hasi ubwali bwibwe.

³² Kigira yaga ya mu gulika ku lidiku yilyo Jerubaal, na a vola, Baal uyu a lwane naye, kigira u tsomi hasi ubwali bwibwe.

³³ Inyinga yeyo Vamidiani na Vaamaleki navana vevugwi va vugana halala: na vambuka, noku singeridza mahema gavo mwivona lya Jezireeli.

³⁴ Navutswa Roho wa Yahova yadza ku Gideoni; na ya kupa kisiliva: na Abiezeru va vugana halala inyima wewe.

³⁵ Ma ya tuma avatumwa va tsie Manase hosi, navo kandi va vugana halala inyima wewe: ma ya tuma avatumwa va tsie ku Asheri, noku Zebuloni, noku Nafitali; navo vanegira kuvugana naye.

³⁶ Na Gideoni ya volera Nyasaye, na a vola, Nu u va nu wenya kuhonnya Israeli nomukono gwange, kuli wa vola,

³⁷ henza nda vika ingubo yobwoya yeligondi ku lodze; lime ni li va ni li loleka ku bwoya yibu bweng'ine, na marova gosi ga ve amumu, hene yaho nda manya u la honnya Israeli nomukono gwange, kuli wa vola.

³⁸ Ma ga duka ndiyo; kigira ya vuka mabwebwe mugamba, na a linga ubwoya na a kama, lime lya twula mu bwoya, kuduka kituva kyosi kya madzi.

³⁹ Na Gideoni ya volera Nyasaye, na a vola, U ta leka ubutima bubwo bwaake ku inze mba, nda vola lulala lweng'ine: ngeridzanga, nku goonya, lulala vutswa ku bwoya; bu ve bwumu kalunu ku bwoya bweng'ine, na lime li ve ku marova gosi.

⁴⁰ Na Nyasaye ya kola ndiyo ubudiku yibwo: kigira lya li Iyuma ku bwoya bweng'ine, nelime lya li ku marova gosi.