Vakalagi 5 - KITABU KITAKATIFU

¹ Hene yaho Debora na Baraka mwana wa Abinoam vimba ku lidiku yili, ni va vola,

² Kigira avanene avimiri mu Israeli, Kigira avandu ave haana avene nobulaliri, Mu gasidze Yahova.

³ Mu hulire, O mwinye avami; mu tegidze amatu, O mwinye avanene; Inze, yee inze, ndimbira Yahova; Inze ndimbira Yahova lidzominywa, Nyasaye wa Israeli.

⁴ Yahova, lwa ive u twula mu Seiru, Lwa u genda kutwula mu mulimi gwa Edom Lirova lya degera, neligulu lya tonyatonya, Yee, malesi ga tonya amadzi.

⁵ Vigulu vya degera imbiri wa Yahova, Yee, kuduka Sinai zana kya degera imbiri wa Yahova, Nyasaye wa Israeli.

⁶ Mu madiku ga Shamigari mwana wa Anathu Mu madiku ga Jaeli, tsinzira tsinene tsya li bugira avandu, Na vagendi va genda ku tsinzira tsya haluvega.

⁷ Avameha va gota mu Israeli, va gota, Kuduka lwa inze Debora nda vuka, Lwa inze nda vuka, mama mu Israeli.

⁸ Va tovola avanyasaye avahya; Hene yaho ha li nobulwani ha kiliango: Ingavo kinga litimu vya loleka Mu avandu tsielfu makumi gane tsya Israeli?

⁹ Mwoyo gwange gu yeki ku vamehanga va Israeli, Avehaana avene nobulaliri mu avandu: Mu gasidze Yahova.

¹⁰ Mu landidze makuva, mwinye ava ninange ku tsisukiri tsindavu, Mwinye avikalanga ku visero Nomwinye ava gendanga ku inzira.

¹¹ Ihale ligali ku lioga lya yava avalasanga mibano, ha va dahanga amadzi, Ha zana va la landidza amakuva gevikolwa vyobulungi vya Yahova, Vikolwa vyobulungi vyelyameha lilye mu Israeli. Hene yaho avandu va Yahova va sulunguta kuduka ha viribwa.

¹² Vuka, vuka, Debora; Vuka, vuka, wimbe lwimbu; Singira, Baraka, u hile avelilanya lilyo, ive umwana wa Abinoam.

¹³ Hene yaho lya sulunguta litigala lyavanene navandu; Yahova ya sulunguta kigira inze ku vetsingulu.

¹⁴ Kutwula mu Efiraim va sulunguta avekitinya kyavo ki veye mu Amaleki Na Benjamini, a londanga hagati ha vandu vovo Kutwula Makiru avamehanga va sulunguta, Nokutwula Zebuloni, ava gumiranga impimbo yomung'odi.

¹⁵ Avanene va Isakari va li halala na Debora; Kuli Isakari ya li, Baraka a veye ndiyo; Va nyagula kwingira mwivona ha virenge vivye. Himbi ku migera gya Rubeni Lya li ho lisaavira ligali lyemyoyo.

¹⁶ Kigira ki wikala mu vigo vyamagondi, Kuhuliridza amalele ga kupirangwa vyayo? Himbi ku migera gya Rubeni Lya li ho lisaavira linene lye myoyo.

¹⁷ Gileadi ya menya engereka ya Yordani: Na Dan, kigira ki ya menya mu amato? Asheri yikala vutswa ha nyambuko yenyanza, Naye ya menya ha migera gyigye.

¹⁸ Zebuloni va li avandu ava vika livamwoyo lyavo mbuhimwa kuduka ku likudza Na Nafitali, ha diguiuku ho mulimi.

¹⁹ Avami va tsia kulwana ubulwani; Va lwana navami va Kanani Mu Taanaka himbi na madzi ga Megido: Si va nyola faida ya ifetha.

²⁰ Va lwana kutwula migulu, Tsing'ereng'ani ku tsinzira tsyatsyo tsinene tsya lwana na Sisera.

²¹ Mugera gwa Kishon gwa va vugula ni gu va hila, Mugera yigu gwa kale, mugera gwa Kishon. O mwoyo gwange, u gende netsingulu.

²² Hene yaho tsimbagayu tsyetsiparasi tsya duvaga nomuliviti, Kigira litumatuma lyatsyo tsyetsingulu kutsyo.

²³ U laame Merozu, engelosi ya Yahova a vola, U, laame nobululu avamenyi mulyo, Kigira va vula kuudza kukonya Yahova, Kukonya Yahova ku avetsingulu.

²⁴ Jaeli a la gasidzwa kuvita avakali, Mukali wa Heberi Mukeni; A la gasidzwa kuvita avakali mu lihema.

²⁵ Ya teva amadzi, na ya mu ha amaveere Ya mu letera amaguta mu kituva kilahi

²⁶ Ya nyira mukono na a gumira kivambo, Mukono gwigwe mulungi gwa gumira inyundu yomusidza; Na ya kupa Sisera nenyundu, ya kupa kuhudula tsimbega tsyombi tsyomutwe gwigwe; Yee, ya hudula na a tumita tsinyanyiru tsitsye.

²⁷ Yinama ha virenge vivye, ya gwa, na ya gona ho; Ha virenge vivye yinama, na a gwa: Ha yinama, ni ho ha ya gwa na a kudzi.

²⁸ Mama wa Sisera ya henzera mu mwanzu, Na a lilira mu vidonye vyomwanzu, Kigira ki ligari lilye li lindagira kuduka? Kigira ki tsingida tsya magari gege tsi lindanga ndi?

²⁹ Avekikali veve avobugeeri va mu tivulira Yee, kali mwene yenyolera litivula,

³⁰ Va kikiri kunyola kindu, va kikiri kugavula vilanye? Ku sa mulala, mukana mutugwa mulala, kinga vaviri; Ku Sisera vilanye vyetsingubo tsyamagondo lugano lugano, Vilanye vyamagondo lugano lugano gamaradadi, Tsingubo tsyamaradadi tsimbega tsyombi, ku magoti ga avalanywa?

³¹ Avasigu vovo vosi va dive ndiyo, O Yahova: Navutswa yava ava mu yanzanga va ve kuli liuva li tonganga netsingulu tsalyo. Na kivala kya li nemirembe mihiga makumi gane.