Vakalagi 4 - KITABU KITAKATIFU

¹ Navana va Israeli va kola ubwoni kandi imbiri wa Yahova, lwa Ehudu ya mala kukudza.

² Na Yahova ya va gulidza na a va vika mmukono gwa Jabin mwami wa Kanani, wameha mu Hazoru; womunene welihe lilye ya li Sisera, wa menya mu Haroshethu lye Tsihiri.

³ Navana va Israeli vanira Yahova: kigira sisera ya li namagari tsimia tsitano na tsine gekivya; na ya kupidza avana va Israeli kivi kinene mihiga makumi gaviri.

⁴ Inyinga yeyo Debora, muprofeti, mukali wa Lapidothu, niye ya kalagira Israeli inyinga yeyo.

⁵ Naye ya menya isi welikindu lya Debora hagati ha Rama ha Betheli mu kivala kyevigulu kya Efiraim: navana va Israeli vanegira kutsia ku Debora kukalagirwa.

⁶ Naye ya tuma mundu kulanga Baraka mwana wa Abinoam kutwula Kedesh-nafitali, na a mbolera, Yahova, Nyasaye wa Israeli, si ya haana munwa, na a vola, U tsie ku kigulu kya Taboru, na u hile halala nive avandu tsielfu likumi tsyavana va Nafitali natsyavana va Zebuloni?

⁷ Na inze nda ku sundira, ha mugera gwa Kishon, Sisera, munene welihe lya Jabin, halala namagari gege nobunyingi bwavandu veve; na nda mu vika mmukono gugwo.

⁸ Na Baraka ya volera mukali uyo, Ive nu u va nu u tsia halala ninze, hene yaho inze nda tsia; navutswa ive nu u va nu u vula kutsia ninze, inze si nda tsia mba.

⁹ Naye ya vola, Ligali inze nda tsia halala nive; navutswa, ulugenda lwa u tsitsanga ku si lu la ku ha ubukumi; kigira Yahova a la gulidza Sisera nokumuvika mu mukono gwomukali. Kunangwa Debora ya singira na a tsia Kedesh halala na Baraka.

¹⁰ Na Baraka ya vugannya halala avandu va Zebuloni na Nafitali va tsia Kedesh; navandu tsielfu likumi vanegira ha virenge vivye: na Debora yanegira halala naye.

¹¹ Na Heberi Mukeni yavukana kutwula ku Vakeni, kali kutwula ku avana va Hobabu mukwasi wa Musa, na yombaka lihema lilye ihale kuli ha kereremu kya Zaanaim, ki veye himbi Kedesh.

¹² Na va volera Sisera, Baraka mwana wa Abinoam u mali kwanegira mkigulu kya Taboru.

¹³ Kunangwa Sisera ya vungidza magari gege gosi halala, amagari tsimia tsitano na tsine agekivya, navandu vosi ava li halala naye, kutwula Haroshethu lya Tsihiri, kuduka ku mugera gwa Kishon.

¹⁴ Na Debora ya volera Baraka, Vuka; kigira ku lidiku yili Yahova u viki Sisera mmukono a gugwo: Yahova si ya tsia imbiri wowo? Kunangwa Baraka ya sulunguta kutwula mu kigulu kya Taboru, navandu tsielfu likumi va mu londa.

¹⁵ Na Yahova ya salannya Sisera, na magari gege gosi, nelihe lilye lyosi, nobwogi bwekivavi imbiri wa Baraka: na Sisera yika ku ligari lilye, na yiruka nevirenge.

¹⁶ Navutswa Baraka ya londerera magari zana, nelihe lilye, kuduka Haroshethu lya Tsihiri; nelihe lyosi lya Sisera lyayayuwa nobwogi bwekivavi: si ha tigala nomundu kali mulala.

¹⁷ Navutswa Sisera yiruka nevirenge vivye na a duka mu lihema lya Jaeli mukali wa Heberi Mukeni; kigira ha li nemirembe hagati ha Jabin mwami wa Hazoru, nenyumba ya Heberi Mukeni.

¹⁸ Na Jaeli ya twula kuvugana na Sisera, na ya mu volera, U girunkane, wingire, mwami wange, u girunkane wingire ahange; u ta tia kindu. Naye ya girunkana ni yingira ahehe mu lihema, naye ya mu huuma nengubo.

¹⁹ Naye ya mbolera, Mwadza, u mbe amadzi makekeke nwe; kigira mbeye nobuluhu. Naye ya kunula ichupa ya amaveere, na a mu ha a nwe, ma ya mu huuma kandi.

²⁰ Naye ya mbolera, Ive u singire mu kiliango kyelihema, na ga la va, ku vosi mundu ni yadza ku ive, nokukuteva, na a vola, A veye hano mundu ku vosi? Hene yaho u la tivula, Auwa, si a veye ho.

²¹ Hene yaho Jaeli, mukali wa Heberi, ya vugula kivambo kilala, na a vugula inyundu mmukono gwigwe, na ya tsia kuye galaha, na ya mu kupira kivambo zana mu lunyanyiru, nahyo kya vita buvu ni kingira hasi; kigira ya li mu tsindolo tsinene kigira ya luha; ma ya kudza.

²² Nu, henza, lwa Baraka ya londa Sisera, Jaeli ya tsia kuvugana naye, na ya mu volera, Hamba, nda ku mannya mundu wa wenyanga. Naye ya tsia kuye; henza, Sisera ya li na a goni ha zana na a kudzi, nikivambo kya li mu tsinyanyiru tsitsye.

²³ Kunangwa Nyasaye ya guuta Jabin mwami wa Kanani imbiri wa avana va Israeli ku lidiku yilyo.

²⁴ Na mukono gwavana va Israeli gwa li netsingulu ku Jabin mwami wa Kanani, kuduka lwa va dividza Jabin mwami wa Kanani.