Vakalagi 21 - KITABU KITAKATIFU

¹ Kunangwa avasatsa va Israeli va li va mali kwisuhira ha Mizipa, ni va vola, Si ha ve nomundu ku vosi ku kwinye u nyala kuserera mukana wewe ku Benjamini.

² Navandu yavo va duka Beth-eli, na vikala yo imbiri wa Nyasaye kuduka mgolova, navo va ginga myoyo gyavo nokulira ligali.

³ Ni va vola, O Yahova, Nyasaye wa Israeli, kigira ki inkuva yiyi i veye mu Israeli, lero ndi ihiri indala i vuli mu Israeli?

⁴ Ma ga duka mugamba, avandu yavo va vuka mabwebwe, nokwombaka ubwali ha zana, na va haana vihaanwa vyokusambwa nevihaanwa vyemirembe.

⁵ Navana va Israeli va vola, Mu tsihiri tsyosi tsya Israeli ni yi li ha ya vula kuduka mu livugana kwisunda ku Yahova? Kigira va li ni va mali kuvika lyesuha linene ku uyu u vula kwisunda ku Yahova ku Mizipa, ni va vola, Ligali uyu a liitwa.

⁶ Navana va Israeli veganira kigira amwavo wavo Benjamini, ni va vola, Ihiri indala i mali kukalagwa ku Israeli lidiku yili.

⁷ Ku la kola ndi kuduka kunyolera avatigala yava avakali, kigira ku mali kwisuha ku Yahova ku la vula kuserera kuvo avakana vetu?

⁸ Navo va vola, Ni yi li ha ku tsihiri tsya Israeli ya vula kuduka imbiri wa Yahova ha Mizipa? Kandi, henzi, si ha li nomulala wa Jabesh-gileadi u duki mu hokusosa ku livugana.

⁹ Kigira lwa avandu va validzwa, si ya li ho kali mundu mulala ku vamenyi Jabesh-gileadi.

¹⁰ Ma livugana lya tuma avandu tsielfu likumi na tsiviri ku yavo avaluviriri, na va laga, ni va va volera, Mu tsie mu kuye avandu va menya Jabesh-gileadi nobwogi bwekivavi, halalanavakalinavana.

¹¹ Ninkuva ya mu kola ni yiyi, mu la dividza avasatsa vosi ligali, navakali vosi wa gona nomusatsa.

¹² Na va nyola hagati vamenyi ha Jabesh-gileadi avakana vagima tsimia tsine, ava kikiri kumanya musatsa; na va va leta mu hokusosa ha Shilo, li veye mu kivala kya Kanani.

¹³ Nelivugana lyosi lya tuma avandu kuvolera avandu va Benjamini ava veye ha lwanda lwa Rimon, nokulandidza kuvo mirembe.

¹⁴ Ma Benjamini yirana inyinga yeyo; na va haana kuvo avakana va va leka mwovo mu vekiliali va Jabesh gileadi: navutswa si va va duka mba.

¹⁵ Navandu veganira ku Benjamini, kigira Yahova ya li na a mali kukola lwasa mu tsihiri tsya Israeli.

¹⁶ Hene yaho avakulundu velivugana va vola, Ku kola ndi ku duke kunyolera avatigala yava avakali, kigira avakali va dividzwa mu Benjamini?

¹⁷ Ni va vola, Ga dukanga kuva miyandu kigira yavo ava Benjamini ava hona, ihiri i vuli kweywa mu Israeli.

¹⁸ Navutswa si ku nyala kuvaserera avakana vetu; kigira avana va Israeli va li va mali kwisuha, nokuvola, A laamwe uyu u li ha Benjamini mukali.

¹⁹ Kandi va vola, Henza, lilia lya Yahova li veye ho muhiga nomuhiga ha Shilo, li veye ku luvega lwa kasikasini lwa Beth-eli, ku luvega lwevugwi lwelihasi lyanegiranga kutwula Beth-eli kutsia Shekem, li veye ku luvega lwa kusini lwa Lebona.

²⁰ Na va laga avana va Benjamini, ni va vola, Mu tsie kugoneka mu milimi gyemizabibu;

²¹ na mu la lola, henze, avakana va Shilo ni va va ni va twula va duke kukina mu bukino, hene yaho mu twule mu milimi gyemizabibu, na sa mulala a gumire mukali wewe ku avakana va Shilo; ma mwirane mkivala kya Benjamini.

²² Na ga la va, lwa vadada vavo, kinga avabotso vavo va duka kuyala, kwinye ku la va volera, Mu vere kwinye tsimbabasi; kigira si kwa vugulira sa mulala mukali wewe mbulwani, kandi si mwa va serera; ni ga ta li ndiyo mwinye kalunu nkano mu veye namahyolo.

²³ Navana va Benjamini va kola ndiyo, navenyolira avakali, kuli livalidzwa lyavo, mu yavo ava kinanga, ava va vugula ni va tsia navo: na virana ku miyandu gyavo, na vombaka madala, nokumenya mu.

²⁴ Navana va Israeli inyinga yeyo va senduka, sa mulala va tsia ku ihiri yeye, no ku viko veve, na va twula ho va tsia sa mulala ku miyandu gyigye.

²⁵ Mmadiku yago si ha li nomwami mu Israeli: mundu sa mulala ya kola aga veye malahi imbiri wetsimoni tsitsye mwene.