Vakalagi 2 - KITABU KITAKATIFU

¹ Ma, ingelosi wa Yahova yanegira kutwula Gilgali kutsia Bokim. Naye ya vola, Nda mwanegiridza kutwula mkivala kya Egepeti, na mali kumuleta kuduka mu kivala kya ndisuhira avaguga venyu; nda vola, Ligali si ndononnya lilagana lyange lya nda lagana nemwinye, mihiga nemihiga:

² na mu ta lomba lilagana navandu vekivala yiki; mu la sambulannya ubwali bwavo. Navutswa si mwa hulira mwoyo gwange: kigira ki mu kola yaga?

³ Kunangwa inze nda vola, Si nda va kunga imbiri wenyu; navutswa va la va kuli amafwa mu tsimbalu tsyenyu, navanyasaye vavo va la va mutego ku mwinye.

⁴ Ma, lwa ingelosi wa Yahova ya volera avana va Israeli vosi makuva yaga, hene yaho avandu va ginga myoyo gyavo, ni va lira.

⁵ Na va gulika ha zana Bokim: na va haanira ha zana vihaanwa ku Yahova.

⁶ Na lwa Joshua ya haana munwa, avandu va tsie, avana va Israeli va tsia sa mulala ku miyandu gyigye kugumira kivala.

⁷ Navandu va tumekira Yahova madiku gosi ga Joshua, na madiku gosi gavakulundu ava tigala madiku gavo inyima wa Joshua, ava lola miyinzi minene gyosi gya Yahova ya kolera lsraeli.

⁸ Na Joshua mwana wa Nuni, mutumekiri wa Yahova, ya kudza, naye ya duka mihiga mia nelikumi.

⁹ Navo va mu ta mu lwako lwemiyandu gyigye mu Timinathu-heresu, mu kivala kyevigulu kya Efiraim, ku luvega lwa kasikasini wekigulu kya Gaashu.

¹⁰ Na avandu velikula yilyo vosi va vungidzwa ku vaguga vavo: nelikula lindi lya singira inyima wavo, lya vula kumanya Yahova, kandi si va manya likola lya ya kolera Israeli.

¹¹ Navana va Israeli va kola budamano imbiri wa Yahova, na va tumekira Vabaal;

¹² ni va leka Yahova, Nyasaye wa vaguga vavo, wa va leta kutwula mkivala kya Egepeti, na va londa vanyasaye vandi, ku vanyasaye vavandu ava va kumbiridza, na vinamira vanyasaye yavo: na va vihiriridza Yahova kuduka na a vihirirwa.

¹³ Na va leka Yahova, ni va tumekira Baal na Ashitarothu.

¹⁴ Nobutima bwa Yahova bwaaka ku Israeli, na ya va vika mmakono ga yavo ava va lanya; na ya va gulidza na ya va vika mmakono gavasigu vavo ava li ku tsimbega tsyavo, si va nyala kandi kusingira imbiri wavasigu vavo.

¹⁵ Hosi ha va tsia, mukono gwa Yahova gwa li kuvo nobudamano, kuli Yahova ya vola, na kuli Yahova yisuha kuvo: navo va nyankana ligali.

¹⁶ Na Yahova ya singeridza avakalagi, ava va honnya ku makono ga yavo ava vononnya.

¹⁷ Halala na yaga si va hulira avakalagi vavo; kigira va londa inzira yobuheyi ku vanyasaye vandi nokwinama imbiri wavo: ni va girunkana bwangu nokuleka inzira ya vaguga vavo va londa ku, lwa va huliranga amalago ga Yahova; navutswa va vula kukola ndiyo.

¹⁸ Na lwa Yahova ya va singeridzira avakalagi, hene yaho Yahova ya li halala nomukalagi, na a va honnya ku mukono gwavasigu vavo madiku gosi agomukalagi uyu: kigira Yahova yeganira kigira likenya lyavo kigira yavo ava va kupidza kivi na va va dambidza.

¹⁹ Navutswa ga duka, lwa mukalagi uyu ya kudza, va girunkana kutsia inyima, na va kola ubugadi kuvita vaguga vavo, mu lilonda avanyasaye vandi kuvatumekira, nokuvinamira: si va leka likola lyavo, nenzira yavo yobudinyu bwomwoyo.

²⁰ Nobutima bwa Yahova bwaaka ku Israeli; na ya vola, Kigira ihiri yiyi yononnyi lilagana lyange lya nda laga avaguga vavo, na si va hulira mwoyo gwange;

²¹ inze kandi kutwula kalunu, si nda kunga kandi imbiri wavo avetsihiri tsya Joshua ya leka lwa ya kudza;

²² nduke kugeridza Israeli navo, ni va va ni va gumira inzira ya Yahova kugenda muyo, kuli avaguga vavo va gi gumira, naho.

²³ Kunangwa Yahova ya leka tsihiri yitsyo, si ya va kunga bwangu; kinga si ya va vika mmukono gwa Joshua.