Vakalagi 15 - KITABU KITAKATIFU

¹ Navutswa ga duka lwenyima, inyinga ya ligesa lyengano, Samsoni ya tsia kulola mukali wewe nokumuhilira kimeme kyembuli; na ya vola, Ndingira mu inyumba ku mukali wange. Navutswa ise womukana si a mu leka yingire.

² Ise womukana ya vola, Ligali inze nda ganagana u mali kumudunyira ligali; kigira yaga nda mu serera ku wakyo: muke uyu si a veye mulahi kuvita iye? Mwadza, u vugule uyu mbugono bwibwe.

³ Samsoni ya va volera, Inyinga yiyi nda va bugira kindu ku Vafilisiti, lwa ndi va kolera budamano.

⁴ Na Samsoni ya tsia na a gumira vibwe tsimia tsivaka, ma ya vugula viyayi vyomuliru, na a hambannya mikira gyevibwe, na a vika kiyayi kyomuliru hagati hemikira gyombi.

⁵ Na lwa ya mala kuhambidza umuliru ku viyayi, ya leka vibwe zana vingire mu ingano ya Vafilisiti ya li nisingiye, nokusamba vitumi halala nobuswage bu kikiri kugeswa, na kandi milimi gyemizeituni.

⁶ Hene yaho Vafilisiti va teva, Ibwaha u koli yaga? Na va vola, Ni Samsoni, navizala wa Mutimina, kigira ya vugula mukali wewe, na a mu serera ku wakye. Ma Vafilisiti vanegira nokusamba mukana uyu na ise wewe nomuliru.

⁷ Na Samsoni ya va volera, Ni mu va ni mu koli kuli yaga ligali ndevanzira kisalya ku mwinye, na lwenyima nda leka.

⁸ Naye ya va kuya litango nevadzwa, nobwiiti bunene Jigali: naye ya sulunguta na a menya mu lubwa lwolwanda lwa Etam.

⁹ Hene yaho Vafilisiti vanegira, ni va singeridza amahe gavo mu Yuda, na velandidza mu Lehi.

¹⁰ Na vasatsa va Yuda va vola, Kigira ki mwanegiye kulwana ne kwinye? Na va vola, Kwanegiye ku duke kuboha Samsoni, ku duke kumukolera kuli a ku koleve.

¹¹ Ma avasatsa va Yuda tsielfu tsivaka va sulunguta ku lubwa lwolwanda lwa Etam, na va volera Samsoni, Si u manya Vafilisiti nivo avamehanga ku kwinye? Ni inkuva ki yiyi ya u ku koleye? Naye ya va volera, Kuli va nkolera, mba koleye ndiyo.

¹² Navo va mbolera, Ku sulunguti ku duke kukuboha nokukuvika mmakono ga Vafilisiti. Na Samsoni ya va volera, Mu nzisuhire, mwinye avene mu la vula kugwa ku inze.

¹³ Va mu mbolera, na va vola, Auwa; navutswa kwinye ku la ku boha ligali, nokukuvika mmukono gwavo: navutswa ligali kwinye si ku la kwiita. Ma va mu boha nemigoye gyiviri mihya, na va mwanegiridza kutwula ku lwanda.

¹⁴ Lwa ya duka Lehi, Vafilisiti va hanzuka lwa va vugana naye: na Roho wa Yahova ya duka kuye netsingulu, nemigoye gya li ku makono gege gya gwa kuli katani yomuliru gu sambi, na vikundikiru vyagyo vya twula ku makono gege.

¹⁵ Naye ya lola kigumba kihya kyolusaya lwesukiri, na a nyira mukono gwigwe, na a ki gumira, na ya kuya avandu elfu nakyo.

¹⁶ Na Samsoni ya vola, Nekigumba kyolusaya lwesukiri, kitume ku kitume, Nekigumba kyolusaya lwesukiri nkuye avasatsa elfu.

¹⁷ Na ga duka, lwa ya mala kuvola makuva yaga, ya ta kigumba kyolusaya kya twula ku mukono gwigwe; na ha zana ha langwa Ramathu-lehi.

¹⁸ Naye ya li nobuluhu ligali, na yanira ku Yahova, na a vola, Ive u ku heye ubuhonywi yibu bunene ku mukono gwomutumekiri wowo; na kalunu nda kudza nobuluhu, nokugwa mmukono gwa yavo ava ta kevwa.

¹⁹ Navutswa Yahova ya tannya ubwina bu veye mu Lehi, namadzi ga twula mu: na lwa ya mala kunwa, roho gwigwe gwirana kuye, na a simuguka: kigira yaga ha zana ha langwa En-hakore, ha zana ha veye mu Lehi, kuduka lero.

²⁰ Naye ya kalaga mu Israeli mu madiku ga Vafilisiti mihiga makumi gaviri.