Vakalagi 13 - KITABU KITAKATIFU

¹ Kandi avana va Israeli va kola budamano kandi imbiri wa Yahova; na Yahova ya va vika mmukono gwa Vafilisiti mihiga makumi gane.

² Mundu mulala ya li ho wa Zora wehiri ya Vadan, wa langwa Manoa; mukali womundu uyu ya li mugumba, na si yivula arana.

³ Na ingelosi wa Yahova ya loleka ku mukali uyu, na a mu volera, Henza, ive kalunu u veye mugumba, na wa vula kwivula arana; navutswa u la vereka, na u livula mwana muyai.

⁴ Kunangwa kalunu u gelihe, mwadza, u vule kunwa iwaini kinga kyokunwa kilulu, kandi u ta lia kidamano:

⁵ kigira, henza u la vereka, na u livula mwana muyai; nolugembe lu vule kuduka ku mutwe gwigwe ligali; kigira mwana uyu a la va Munazari wa Nyasaye kutwula munda: naye a la tanga kuhonnya Israeli kutwula mukono gwa Vafilisiti.

⁶ Hene yaho mukali zana ya tsia kuvolera musatsa wewe, na a vola, Mundu wa Nyasaye ya duka ku inze, neligondo lilye lya li kuli ligondo lyengelosi wa Nyasaye, lya li lyokutihidza ligali; na si nda li kumuteva wa a twula, kinga si ya mbolera lieta lilye mba:

⁷ navutswa ya mbolera, Henza, u la vereka, na u livula mwana muyai; na kalunu u vule kunwa iwaini, kinga kyokunwa kilulu, kandi u ta lia kindu ku vyosi ki veye kidamano; kigira mwana zana a la va Munazari wa Nyasaye kutwula munda kuduka ku lidiku lyelikudza lilye.

⁸ Hene yaho Manoa ya saala Yahova, na a vola, O, Mwami Nyasaye, nku goonya, ngano mundu wa Nyasaye uyu wa wa tuma, u duke ku kwinye kandi, nokukwegidza aga ku dukiranga ku kolere umwana u livulwa.

⁹ Na Nyasaye ya nulira mwoyo gwa Manoa; nengelosi wa Nyasaye ya tsia ku mukali kandi lwa ya li ni yikaye mmulimi: navutswa Manoa musatsa wewe si ya li ho halala naye mba.

¹⁰ Kunangwa mukali uyu ya tsia bwangu, tsimbiru, na a volera musatsa wewe, na a vola, Henza, mundu musatsa u loleki ku inze, uyu wa duki ku inze ku lidiku li viti.

¹¹ Na Manoa ya singira, na a londa mukali wewe, na a duka ku mundu musatsa zana, na a mu teva, Nive mundu musatsa wa volerana nomukali uyu? Naye ya vola, Yee ninze.

¹² Na Manoa ya vola, Kalunu makuva gogo ga duke: miima gyomwana uyu gyi la va ki, ku la mu kola ndi?

¹³ Nengelosi wa Yahova ya volera Manoa, Mu vyosi vya nda volera mukali uyu, a gelihe.

¹⁴ Si a veye nomunwa kulia kindu ki twula ku muzibibu, kandi a ta nwa iwaini kinga kyokunwa kilulu, kinga kulia kindu kidamano; gosi aga nda mu laga a ga linde.

¹⁵ Ma Manoa ya volera ingelosi wa Yahova, nku goonya, ku ku lindidze ku duke kukulombera kimeme kyembuli.

¹⁶ Nengelosi wa Yahova ya volera Manoa, Kali nu u va nu u nindidza, si nda lagira ku ubukima bubwo; na nu u va nu u tegeka kihaanwa kyokusambwa, ga ku dukira kuhaana ku Yahova. Kigira Manoa si a manya uyu a veye ingelosi wa Yahova.

¹⁷ Manoa ya teva ingelosi wa Yahova, Lieta lilyo ni bwaha, lwa makuva gogo ga duka, ku duke kukukuminya?

¹⁸ Ingelosi wa Yahova ya mu volera, Kigira ki untevanga lieta lyange, kali li veye lyokugenya?

¹⁹ Ma Manoa ya vugula kimeme kyembuli halala nekihaanwa kyobusie, na a haana ku Yahova ku lwanda: na ingelosi ya kola kyokugenya; Manoa nomukali wewe va henza.

²⁰ Kigira nonoho, lumemo lwa lwa nina mwigulu, kutwula ku bwali, ingelosi wa Yahova ya ninira mu lumemo lwobwali: na Manoa nomukali wewe va henza; na va gwa mammama.

²¹ Navutswa ingelosi wa Yahova si ya loleka kandi ku Manoa, kinga ku mukali wewe. Hene yaho Manoa ya manya ya li ingelosi wa Yahova.

²² Na Manoa ya volera mukali wewe, Ligali kwinye ku la kudza, kigira ku loli Nyasaye.

²³ Navutswa mukali wewe ya mu volera, Yahova a va wenyi kukwiita, ngano si a bugiriye kihaanwa kyokusambwa, kinga kyobusie mmakono getu, kandi ngano si a ku mannyi makuva yaga gosi, kandi ngano si a ku voleye makuva kuli yaga inyinga yiyi.

²⁴ Nomukali yivula mwana muyai, na a mu gulika Samsoni: nomwana ya viruka na Yahova ya mu gasidza.

²⁵ Na Roho wa Yahova ya tanga kumuvukidza mu Mahanedan, hagati ha Zora na Eshitaoli.