Vakalagi 10 - KITABU KITAKATIFU

¹ Na inyima wa Abimeleku ya vuka Tola mwana wa Pua, mwana wa Dodo, mundu wa Isakari, kuhonnya Israeli; naye ya menya Shamiru mu kivala kyevigulu kya Efiraim.

² Naye ya kalaga makuva mu Israeli mihiga makumi gaviri na gyivaka, na a kudza, na a tebwa mu Shamiru.

³ Na inyima wewe Jairo ya vuka, Mugileadi; naye ya kalaga makuva mu Israeli mihiga makumi gaviri na gyiviri.

⁴ Na ya li navana avayai makumi gavaka ava ninanga ku vimoli vyetsisukiri makumi gavaka, na va li namadala makumi gavaka, aga langangwa Havothu-jairo kuduka lero, nago ga veye mu kivala kya Gileadi.

⁵ Na Jairo uyu ya kudza, na a tebwa Kamon.

⁶ Navana va Israeli va kola ubudamano kandi imbiri wa Yahova, na va tumekira Vabaal, na Ashitarothu, navanyasaye va Siria, navanyasaye va Sidone, navanyasaye va Moabu, navanyasaye vavana va Amon, navanyasaye va Vafilisiti; na va leka Yahova, va vula kumutumekira.

⁷ Ubutima bwa Yahova bwaaka ku Israeli, na ya va gulidza na a va vika mmakono ga Vafilisiti, nomu makono n gavana va Amon.

⁸ Navo va va n nyankidza ni va dambidza avana va i Israeli mihiga yigyo: va dambidza avana va Israeli vosi ava li engereka ya Yordani mu kivala kya Vaamori, nakyo ni kivala kya Gileadi, mihiga likumi na gyitano na gyivaka.

⁹ Navana va Amon vambuka Yordani kulwana na Yuda, nokulwana na Benjamini, nenyumba ya Efiraim; ni ndiyo Israeli ya nyankidzwa ligali.

¹⁰ Navana va Israeli vanira Yahova, ni va vola, Ku koli ubwoni ku ive, kigira ku leki Nyasaye wetu, nokuturnekira Vabaal.

¹¹ Na Yahova ya volera avana va Israeli, Si nda honnya mwinye ku Vaegepeti, noku Vaamori noku avana va Amon, noku Vafilisitii

¹² Kandi Vasidone, na Vaamaleki, na Vaamon va mu dambidza; na mwanira ku inze, na inze nda mu honnya mu makono gavo.

¹³ Navutswa mwa ndeka, na mwa tumekira avanyasaye vandi kigira yaga si nda mu honnya kandi mba.

¹⁴ Mu tsie mwanire avanyasaye va mwa tovola; va mu honnye inyinga yokunyakana kwenyu.

¹⁵ Navana va Israeli va volera Yahova, Ku koli ubwoni: u ku kolere gosi aga u lolanga kuva malahi; navutswa u ku honnye, ku ku goonya, lidiku lya lero.

¹⁶ Navo va twulidza vanyasaye vageni ava li hagati havo, na va tumekira Yahova: nomwoyo gwigwe gwa verera kigira kivi kya Israeli.

¹⁷ Inyinga yeyo avana va Amon va vugana halala, ni va singeridza mahema gavo ha Gileadi. Navana va Israeli vevungidza avene halala, na va singeridza mahema gavo ha Mizipa.

¹⁸ Navandu, avanene va Gileadi, va volerana avene navene, Ni mundu u li ha u li tanga kulwana navana va Amon? Uyu a la va umutwe ku avandu vosi va Gileadi.