Vahebraina 9 - KITABU KITAKATIFU

¹ Kunangwa kali lilayana lyokutanga lya li namalago gobutumwa bwedini, na hatakatifu halyo, hatakatifu ku lugano lwelirova yili.

² Kigira ha li nelihema lya lombwa, lyokutanga lya li mu nekyokuginga itaya, nemeza, nobukima bwokumannyira: lya langwa Hatakatifu.

³ Kandi inyima wengubo yokukinga i kola kaviri, lihema lya langwa Hatakatifu hobutakatifu;

⁴ li veye nobwali bwekimuli bwethahabu, nelisanduku lyelilagana lya kunikwa ithahabu hosi, lya li mu nekikopo kyethahabu kya li mu namana, nempimbo ya Haruni ya sebukd, nevibao vyamalago;

⁵ kandi igulu ku lisanduku, makerubi gobukumi ga kunika kisako kyetsimbabasi kiriri; vya ku ta nyala kuvola amakuva gavyo sekilala kalunu,

⁶ Kunangwa inyinga vindu yivi vya lombwa ndiyo, avasalisi vingira kazozo mu lihema lyokutanga, kukola ubutumwa bwedini,

⁷ navutswa mu lihema lya kaviri, musalisi munene yingira yeng'ine, ku muhiga inyinga indala, si yingira bugira masahi, aga yehaanira mwene, na kigira mahyolo ga avandu.

⁸ Roho Mutakatifu ya lang'aminya ku likuva yili, inzira yokwingira mu hatakatifu i kikiri kulang'aminywa, inyinga lihema lyokutanga li ki singiye;

⁹ li veye lugano olwenyinga ya kalunu; mu lugano yilu tsisadaka nevisyuviriru vi haanangwa ivi ta nyala kukola mwoyo gwa u sigamiranga kuva mudukiru,

¹⁰ kigira vi veye mu butumwa bwoku lugano lwomubiri vutswa (mu vyokulia nomu vyokunwa nomu lisava luganolugano), vi nigangwa kuduka inyinga yeligiru nkanywa kuva vihya.

¹¹ Navutswa Kristo uudzi musalisi munene wevindu vilahi vi lidza, ku lihema li veye linene kuvita, kandi li veye nobudukiru kuvita, li ta lombwa namakono, ga veye kuvola, si li veye lyelilombwa yili,

¹² naho si li veye ku masahi getsimbuli nagevimoli, navutswa ku masahi gege mwene, yingira inyinga indala eng'ine hatakatifu, u nyoye ubutungiri bwemihiga nemihiga.

¹³ Kigira ni i va amasahi getsimbuli, nagetsigiriki, neligoke lyeroli vyufwa ku vadamano, vi va takasa kuduka kulavidza mubiri:

¹⁴ nasindi masahi ga Kristo ga duka ndi, wehaana ku Roho wemihiga nemihiga, bugira kindu kuye, ni yeha Nyasaye, si ga la takasa myoyo gyenyu kuleka miyinzi mikudzu kuduka kutumekira Nyasaye welivamwoyo?

¹⁵ Kandi kigira yaga, a veye muhambannyi w elilagana lihya, li mali kuvaho likudza ku litungira mahyolo aga li ku lilagana lyokutanga, yavo ava langwa va nyole lisuuviridzwa lyemiyandu gyemihiga nemihiga.

¹⁶ Kigira ha li veye lilagana lyemiyandu, ga dukanga kuvaho likudza lya uyu wa li leta.

¹⁷ Kigira lilagana lyemiyandu li veye netsingulu belikudza li veye: kigira madiku gosi si li veye netsingulu inyinga uyu wa li lomba a veye mwoyo.

¹⁸ Kigira yaga lyokutanga si lya tangwa bugira masahi.

¹⁹ Kigira inyinga Musa ya mala kuvolera avandu vosi amalago gosi, kuli lilaga, ya vugula masahi gevimoli nagetsimbuli, halala namadzi, bwoya bwakanyu, nehusupo, ni yuha ku kitabu kyene noku vandu vosi,

²⁰ na a vola, Yaga namasahi gelilagana lya Nyasaye ya mu laga.

²¹ Kandi yuha ndiyo masahi ku lihema noku viju vyosi vyemiyinzi.

²² Kandi ku lilaga nyala kuvola vi veye himbi vindu vyosi vi takaswi namasahi, kandi bugira lisunduka lyamasahi si ha li ha veye nobusamehi.

²³ Kunangwa lya li nelinigwa vifwananyi vyevindu vyomigulu vi takaswe nevisyuviriru yivi; navutswa vindu vyomigulu vyene vi takaswe nevisyuviriru vi vita yivi.

²⁴ Kigira Kristo si yingira mu hatakatifu ha lombwa namakono, kuli lifwana lya heligali; navutswa mu ligulu lyene, kalunu a loleke imbiri wa Nyasaye kigira kwinye:

²⁵ navutswa si ya li yehaana mwene hali kanyingi, kuli musalisi munene yingiranga mihiga gyosi mu hatakatifu, namasahi aga ta li agege;

²⁶ kandi ga va ndiyo nkano ga mu dukira kusalira hali kanyingi kutwula inyinga lirova lya lombwa muse: navutswa kalunu u lang'aminyeywi inyinga indala, mu budukiru bwetsinyinga, kutwulidza ubwoni ku lyehaana mwene.

²⁷ Kandi kuli avandu va vikirwa likudza inyinga indala, kandi inyima li la duka likalagirwa;

²⁸ kandi ndiyo Kristo u mali kuhaanwa inyinga indala a duke kuhila ubwoni bwavandu vanyingi, inyinga ya kaviri a la loleka ku yavo ava mu lindirira nobwizamiri, kuduka ku buhonnyi, ni yelehi ubwoni.