Vahebraina 8 - KITABU KITAKATIFU

¹ Kalunu mu yaga aga ku volanga likuva linene ni yili: Ku veye nomusalisi munene lugano yilu, uyu wikalanga ha mukono mulungi gwekisako kyo Munene migulu,

² mutumiki wa hatakatifu, nowelihema lyeligali, lyo Mwami yombaka, si a li mundu wa lyombaka.

³ Kigira musalisi munene sa mulala a vikangwa a twulidze vihaanwa halala nevisyuviriru: kunangwa ga dukiranga musalisi munene uyu kandi a ve nekindu kya a twulidza.

⁴ Kalunu na va wa li ku lirova, nkano si ya va musalisi mba, kigira va veye ho yavo ava twulidzanga vihaanwa ku lugano lwelilaga;

⁵ yavo ava tumekiranga kifwananyi nekiriri kyevindu vyomigulu, kuli Nyasaye ya mannya Musa inyinga yenya kulomba lihema: kigira a vola, Henza, u lombe vindu vyosi kuli ku lugano lwa wa mannywa mu kigulu.

⁶ Navutswa kalunu Kristo ya nyoye ubutumwa ubulahi kuvita, ku kigero kya a veye mudukidzi welilagana lilahi, kuvita aga volwa ku lisuuviridzwa lilahi kuvita.

⁷ Kigira lilagana lilyo lyokutanga lya va lya vula kuva nobugeheru, nkano lya kaviri si lya lyenyerwa ubugono.

⁸ Kigira mu livola ubugeheru kuvo, a vola, Henzi, amadiku gadzanga, Mwami a vola, Ga inze nda lombera inyumba ya Israeli nenyumba ya Yuda, lilagana lihya;

⁹ Si ga la va kuli lilagana lya nda kola halala navadada vavo Mu lidiku lya nda gumira amakono gavo kuvemirira va twule mu kivala kya Egepete; Kigira si va menya mu lilagana lyange, Na inze nda va lola si va veye kindu, Mwami a vola.

¹⁰ Kigira yili nilyo lilagana lya ndi kolera inyumba ya Israeli Inyima wa madiku yago, Mwami a vola; Nda vika lilaga lyange mu myoyo gyavo, Kandi nda li ng'oda mu myoyo gyavo: Na inze nda va kuvo Nyasaye, Navo va la va ku inze avandu

¹¹ Kandi si va legidzana mundu sa mulala nowakye, Kandi mundu sa mulala na amwavo wewe, a vole, Manya Mwami Kigira vosi va la manya inze, Kutwula ku mukekeke kuduka ku munene kuvo.

¹² Kigira nda va netsimbabasi ku budamano bwavo, Kandi si ndidzulira ubwoni bwavo mba.

¹³ Mu livola ndi, Lilayana lihya, u koli agokutanga kuva amakulu. Navutswa yaga aga gwiye amakulu nokwoneka, ga veye himbi kutwulidzwa.