Vahebraina 7 - KITABU KITAKATIFU

¹ Kigira Melikizedeki uyu, mwami wa Salemi, musalisi wa Nyasaye U Veye Igulu ku Vyosi, waganira Abrahamu lwa ya twula kwiita avami, na a mu gasidza,

² wa Abrahamu ya gavulira vindu vyosi nokumuha kidieli kyelikumi (kutanga ligirunkanywa lyago ya langwa, Mwami wobulungi, kandi Mwami wa Salemi, livola lyago li veye Mwami wemirembe;

³ si a veye na ise, si a veye na mama, si a veye nameta gavaguga, si a veye nelitanga lyamadiku gege, si a veye nekiheri kyelivamwoyo lilye, nawtswa ya fwananywa no Mwana wa Nyasaye), ya hindira kuva musalisi mihiga nemihiga.

⁴ Kunangwa, mu henze kuli womundu uyu ya li munene, wa Abrahamu, mukulundu munene, ya mu ha kidieli kyelikumi kyevindu vinene vya ya lanya.

⁵ Kandi yava ava twula ku vana va Levi, ava duka kunyola ubunene bwobusalisi, va veye nomunwa gwokuvugula kidieli kyelikumi ku vandu kuli lilaga, livola li veye avamwavo vavo avene, kali ni va veye ava twula mu kikenge kya Abrahamu:

⁶ navutswa uyu wameta gavaguga veve ga vula kuvalidzwa, ga twula kuvo, u vuguye kidieli kyelikumi kya Abrahamu, kandi u gasidze uyu welisuuviridzwa.

⁷ Navutswa si li nyala kwambakanwa, munene a gasidzanga mukekeke.

⁸ Kandi hano avandu ava li velikudza va vugulanga kidieli kyelikumi; navutswa yeyo mulala, wa lolekidzwa a veye mwoyo ya ki vugula.

⁹ Kandi, kuli kuvola ku Abrahamu, Levi u vugula kidieli kyelikumi ya tunga kidieli kyelikumi;

¹⁰ kigira ya li na a kikiri mu kikenge kya ise, inyinga Melikizedeki ya mwaganira.

¹¹ Kunangwa niva ubudukiru bwa nyolekira ku busalisi bwa Levi (kigira avandu va nyoye lilaga kubwo), ha veye nelyenya ki kandi musalisi wundi a singire ku lugano lwa Melikizedeki, u vula kuvolwa ku lugano lwa Haruni?

¹² Kigira inyinga ubusalisi bu girunkanywa, ga dukira lilaga li girunkanywe kandi.

¹³ Kigira uyu wevindu yivi vi volwa kuye a veye musangi wehiri yindi, i ta veye nomundu wa tumika mu bwali.

¹⁴ Kigira ga manyekana Mwami wetu ya twula mu Yuda, ihiri ya Musa ya vula kuvola ku kindu kali kilala mu vindu vyobusalisi.

¹⁵ Kandi yaga ga ku volanga ga manyekani ligali kuvita, na a va na a singira musalisi wundi u veye kuli Melikizedeki,

¹⁶ u vuli kukolerwa musalisi ku lugano lwomunwa gwelilaga lyomubiri, navutswa ku tsingulu tsyelivamwoyo li ta li nekiheri:

¹⁷ kigira ga lolekidzwa kuye, Ive u veye musalisi mihiga nemihiga Ku lugano lwa Melikizedeki.

¹⁸ Kigira li veye nelisulwa lilaga lya tanga, kigira ubudedekere bwalyo kandi livula kukonya lyalyo

¹⁹ (kigira lilaga si lya dukidza kindu ku vyosi), kandi liletwa kulyo lisuuviridza li veye lilahi kuvita lyagira kwisunda himbi ku Nyasaye.

²⁰ Kandi kigira si ya kolwa musalisi bugira lyesuha

²¹ (kigira ligali yavo va kolwa avasalisi bugira lyesuha; navutswa uyu ya kolwa nelyesuha ku uyu wa mu volera, Mwami yesuha, kandi si a la girunkana Ive u veye musalisi mihiga nemihiga);

²² Kandi kigira livita yili, Yesu ya gwa kihambiriru kyelilagana lilahi kuvita.

²³ Yavo kandi va kolwa vasalisi vanyingi, kigira likudza li vambakannya va ta hindira:

²⁴ navutswa uyu, kigira a hindiranga mihiga nemihiga, a veye nobusalisi bwibwe bu ta girunkanywa.

²⁵ Kigira yaga a nyala kuhonnya ligali yava avisunda ku Nyasaye kuvita ku uyu, kigira a veye mwoyo tsinyinga tsyosi kuvasaalira.

²⁶ Kigira musalisi kuli uyu a duka kwinye, mutakatifu, u ta li nobudamano, u ta veye nekigugunyu, wahulwa ku voni, wa vikwa weligulu;

²⁷ u ta li nelyenya kazozo, kuli avasalisi vanene yavo, va tange kwihaanira visyuviriru kigira ubwoni bwavo avene, na kandi kigira ubuoni bwavandu: kigira ya kola yili inyinga indala vutswa, lwa yehaana mwene.

²⁸ Kigira lilaga li viki avandu ava veye nobudedekere va ve avasalisi avanene: navutswa likuva lyelyesuha lya duka inyima welilaga, li tovola Mwana u veye mudukiru mihiga nemihiga.