Vahebraina 6 - KITABU KITAKATIFU

¹ Kigira yaga ku leke likuva lyokutanga lya Kristo, kwisunde imbiri kuduka ku budukiru; ku ta tema kandi muse gundi gwelyeganira kutwula ku miyinzi mikudzo, nogwelisuuvira ku Nyasaye,

² nogwamegidzo gamabatidza, nogwelivika makono, nogwelisimuguka lyavakudzu, nogwelikalagira lyemihiga nemihiga.

³ Kandi yaga ku la kola, Nyasaye na a bugirira.

⁴ Kigira ku yavo ava lavidzeywi lulala, nokutsatsama kihaanwa kyomigulu, nokukolwa avasangi ku Roho Mutakatifu,

⁵ nokutsatsama likuva lilahi lya Nyasaye, netsingulu tsyetsinyinga tsidzanga,

⁶ ma kandi ni va gwa, si ga nyalika kandi kuviranya avahya va duke kweganira; kigira avene vebambiye Mwana wa Nyasaye hali kaviri, nokumulegannyira habulavu.

⁷ Kigira lirova li nwedzanga imbula i kupanga hali kanyingi kulyo, kandi li meranga tsingutsa tsi dukiranga yava ava limirangwa, li nyolanga ubugasu bwa Nyasaye;

⁸ navutswa ni li leta amafwa nolung'ereng'ani, li sulangwa kandi li veye himbi kulaamwa, lyekiheri kyalyo ki veye lisambwa.

⁹ Nawtswa, avayanze vetu, kali ni ku vola ndi, ku goonyerangwa vindu vilahi kuvita yaga ku mwinye, navyo vi veye vyobuhonnyi.

¹⁰ Kigira Nyasaye si a li nobudamano kuduka kwivirira miyinzi nobuyanzi bwenyu bwa mwa lang'aminya ku lieta lilye, ku litumekira avatakatifu, kandi mu va tumekiranga.

¹¹ Kandi kwenya mwinye sa mulala a lang'aminye ubugulu zana kuduka ku budukiru bwelisuuvira kuduka ku kiheri:

¹² mu ta va avagata, navutswa mu ue avegi ku yavo ava lia miyandu gyelisuuviridzwa kigira lisuuvira nobwikudziri.

¹³ Kigira lwa Nyasaye ya ha Abrahamu lisuuviridzwa, kigira si ha li nomunene wa mu vita wokwisuha, yeyisuha mwene,

¹⁴ na a vola, Ligali ligasidza nda ku gasidza, kandi limeda nda ku meda.

¹⁵ Kandi ndiyo inyima wobwikudziri bwibwe ya nyola lisuuviridza zana.

¹⁶ Kigira avandu visuhanga ku munene: kandi mu mahangali gavo lisuha li veye kiheri kuduka kulungikidza amakuva.

¹⁷ Ku likuva yili, Nyasaye ya lalira kumannya ligali kuvita avemiyandu ava li lia miyandu gyelisuuviridzwa, kuli amakuva gege ga ta veye neligirunkana, ya vika lyesuha hagati havo;

¹⁸ ku vindu viviri vi ta nyala kugirunkana, mu yivi si ga nyalika Nyasaye a vole ububehi, ku duke kunyola ubukonyi bwetsingulu, kwinye ava kwirukanga kunyagula kugumira lisuuviridzwa li vikeywi imbiri wetu.

¹⁹ Ku veye nalyo kuli kinanga kyomwoyo, lisuuviridzwa lilahi nelyetsingulu, kandi lingiranga kuduka nagati ha kingangwa;

²⁰ ha Yesu yingiye kigira kwinye, kuli mwimiriri wetu, u mali kugwa musalisi munene wemihiga nemihiga ku lugano lwa Melikizedeki.