Vahebraina 5 - KITABU KITAKATIFU

¹ Kigira musalisi munene sa mulala u vugulwa ku vandu, u vikeywi kigira avandu, mu vindu vi yeka ku Nyasaye, a duke kuhaana vihaanwa netsisadaka kigira ubwoni.

² A nyala kwikudzira nobuhooma yava ava vula kumanya nava gota, kigira mwene u kumbiridzeywi nobudedekere.

³ Kigira yaga ga mu dukira kuli a kolera vandu kandi yekolera ku mwene, a haana visyuviriru kigira ubwoni.

⁴ Kandi si ha veye nomundu wevugulira lidzominywa yili mwene, navutswa uyu wa Nyasaye a mu langa, kuli Haruni.

⁵ Kandi ndiyo Kristo si yiidzominya mwene a kolwe musalisi munene, navutswa uyu wa mu volera, Ive u veye Mwana wange, Lero nkwivuye;

⁶ Kuli a vola ahandi, Ive u veye musalisi imihiga nemihiga, Ku lugano lwa Melikizedeki.

⁷ Uyu mu madiku gege gomubiri lwa ya twulidzira uyu u nyalanga kumuhonnya mu likudza, lisaala nelihomba halala nelilira lyetsingulu namaliga, ya hulirwa kigira ubutii bwibwe bwa ya tia Nyasaye,

⁸ kali ya li Mwana, navutswa yeyegidza kuhulira ku vindu vyobusaliri bwa mu gwira,

⁹ lwa ya kolwa mudukiru ya gwa mulombi wobuhonnyi bwemihiga nemihiga, ku vosi ava mu huliranga,

¹⁰ wa Nyasaye ya gulika musalisi munene ku lugano lwa Melikizedeki.

¹¹ Wa ku veye namakuva manyingi agokuvola, agelilungika lyago li veye nobudinyu, kigira mu gwiye ava amatu madinyu.

¹² Kigira lwa ga mu dukira kuva avegidzi kigira tsinyinga tsi viti, mwinye mu veye nelyenya mulala a mwegidze vindu vyokutanga vyamang'oda ga Nyasaye; mu gwiye avenya maveere, si mu ueye arenya vyokulia vidinyu.

¹³ Kigira ku vosi u nwedzanga maveere a veye mundu u ta manya ligali likuva lyobulungi; kigira a veye mwana mudoto.

¹⁴ Navutswa vyokulia vidinyu vi veye vya vandu va duki, yavo kigira litumekira ubugeeri bwavo bu nalidzeywi kwavukannya ubulahi nobudamano.