Vahebraina 2 - KITABU KITAKATIFU

¹ Kigira yaga ga ku dukira ku huliridze ligali kuvita amakuva aga hulirwa, gase ku la ga ng'aala.

² Kigira niva likuva lyetsingelosi va vola lya li netsingulu, kandi mahyolo gosi nobwebaali bwa nyola madanyi gabwo gobulungi,

³ kwinye ku la hona ndi ni ku va ni ku legeridza ubuhonnyi ubunene ndi? Bwo Mwami ya tanga kuvola, kandi bwa yava ava bu hulira va bu kola bwetsingulu ku kwinye;

⁴ Nyasaye kandi ya lolekidza halala navo, ku vilolekidzu, noku vyokugenya, noku tsingulu tsinyingi, noku vihaanwa vya Roho Mutakatifu kuli ubulaliri bwibwe.

⁵ Kigira si yamehidza tsingelosi mu lirova liidzanga lya ku vola amakuva galyo.

⁶ Navutswa mulala u lolekidzi ahandi, na a vola, Mundu a veye ikindu ki u duke kumwidzulitsa? Kinga mwana womundu a veye ikindu ki u duke kumuhenza?

⁷ Wa mu kola mugeheru inyinga inkekeke ku tsingelosi; Wa mu vika itaji yobukumi nevelidzominywa, Nokumwamehidza ku mivinzi gyamakono gogo:

⁸ Nokumuvikira vindu vyosi isi wevirenge vivye. Kigira mu limuvikira vindu vyosi isi ewe, si ya leka kindu kya vula kuvikwa isi wewe. Navutswa kalunu ku kikiri kulola vindu vvosi kuvikwa isi wewe.

⁹ Navutswa ku lola Yesu, uyu w a kolwa mugeheru inyinga inkekeke ku tsingelosi, kigira ubusaliri bwelikudza, u vikeywi itaji yobukumi neyelidzominywa, ku tsimbabasi tsya Nyasaye a duke kutsatsama likudza kigira avandu vosi.

¹⁰ Kigira bwa li bulahi kuye, wa lomberwa vindu vyosi kandi wevindu vyosi vyadzira kuye mu lileta avana vanyingi va duke mu bukumi, ma a mu kole mudukiru kigira ubusaliri, uyu munene wobuhonnyi bwavo.

¹¹ Kigira uyu u takasanga kandi yava ava takasangwa va twula mu mulala: kigira yaga si a la v a isoni kuvalanga avamitu,

¹² a vola, Ndilwadzira avamitu lieta lilyo, Mu livugana nda kwimbira lidzominya lilyo.

¹³ Na kandi, Inze nda mu suuvira. Na kandi, Henza inze navana va Nyasaye ya mpa.

¹⁴ Kunangwa kigira avana va veye avasangi mu masahi nenyama, kandi mwene ndiyo ya vugula ku vya zana; ku likudza a duke kwononnya uyu u veye netsingulu tsyelikudza, naye a veye Setani;

¹⁵ a duke kuboholola yava vosi ava li avatugwa vobutii bwelikudza mu limenya lyavo lyosi.

¹⁶ Kigira ligali si yehaana kuva ubukonyi ku tsingelosi, navutswa yehaana ku visukululwi vya Abrahamu.

¹⁷ Kunangwa ga mu dukira kufwananywa navamwavo veve mu vindu vyosi, a duke kuva musalisi munene wetsimbabasi, musuuvirifu mu vindu vya Nyasaye, a lombe kyokwisayasayira kyobwoni bwavandu.

¹⁸ Kigira mwene u saliye mu ligeridzwa, a veye netsingulu kukonya yava nva geridzwa.