Vahebraina 12 - KITABU KITAKATIFU

¹ Kunangwa kigira yaga, kwinye kandi kigira ku lola ku kumbiridzeywi nelilesi linene lyavalolekidzi, ku vike ha luvega imisigo gyosi miliduhu, nobwoni bu ku kumbiridza ligali, ku nyagule nobwikudziri ku ligerana li vikeywi imbiri wetu,

² ni ku henza ku Yesu mwimiri nomudukidzi welisuuvira lyetu, uyu kigira ubusangali bwa vikwa imbiri wewe, yekudzira ku musalaba, na a lega tsisoni, ni yikala ku mukono mulungi gwentebeyobwami ya Nyasaye.

³ Kigira yaga mu ganagane uyu wekudzira ku lihing'ana naye kuli yili lyavobwoni, mu vule kuluha, mu ta kudza myoyo gyenyu.

⁴ Mu kikiri kulwana nokuhing'ana nobwoni kuduka kutakidza masahi:

⁵ kandi mwiviriye limannywa li volerana nemwinye kuli navana, Mwana wange, u ta ganagana liha amageli lyo Mwami ni likekeke, Kinga u ta kudza mwoyo lwa a ku gondekera;

⁶ Kigira wo Mwami a yanza a mu hedzanga amageli, Nokukuya avana vosi ava a bugirira.

⁷ Ga veye kigira lihebwa amageli mwikudzira, Nyasaye a mu kolera kuli avana; kigira ha veye nomwana ki wa ise a vulanga kuha amageli?

⁸ Navutswa ni mu ta veye nelihebwa amageli, lyavandu vosi va koleywi avasangi, kunangwa mu veye avendasimba, si mu veye avana avene hango.

⁹ Na kandi kwa li navadada avemibiri gyetu kukuha amageli, na kwinye kwa va hulira: nasindi uyu Dada wa roho si ku legehidza ligali kuye nokuva mwoyo?

¹⁰ Kigira yavo ligali madiku makekeke va ku ha amageli kuli va lola; navutswa uyu kigira kyambeti kyetu, ku duke kuva avasangi mu butakatifu bwibwe.

¹¹ Amageli gosi genyinga ya kalunu si ga fwana kuva nobuyanzi navutswa nobuvereri; navutswa inyima ga leteranga ava nalidzeywi mugo amakuyu gemirembe, na gobulungi.

¹² Kigira yaga mu nyire makono madendeyu, namalu mafwogoyu;

¹³ kandi mu lombere virenge vyenyu tsinzira tsinungi, ki veye kilema ki vule kuvetwa, navutswa nu bulahi ki honnywe.

¹⁴ Navutswa mwenye kuva nemirembe ku vandu vosi, kandi mwenye ubutakatifu, mundu na a vula kuva nabwo, si a li lola Mwami mba:

¹⁵ mu henze bulahi gase a la va ho mundu kali mulala u geheye tsimbabasi tsya Nyasaye; gase kitinya kyobululu ki la sibuka nokumunyangidza, na ku yiki vanyingi va kolwe vadamano;

¹⁶ gase a la va ho u tsia mbakana, kinga u vula kutia Nyasaye, kuli Esau, uyu ku kvokulia kilala ya gamana miyandu gyigye gvomunene mu livulwa.

¹⁷ Kigira mu manya inyima, lwa venya kunyola ubugasu zana ya sulwa; kigira si ya lola hokweganira, kali ni yenya ligali namaliga.

¹⁸ Kigira si mu duki ku kigulu kyokudirwa, kyaaka muliru, noku lilesi limwamu, noku kisundi, noku kihudzudzi,

¹⁹ noku mwoyo gwekisiliva, noku mwoyo gwamakuva ogwa yava va hulira va goonya likuva lindi li ta volwa kuvo;

²⁰ kigira si va nyala kwikudzira kugo aga lagwa, Kali inyama ni i dira ku kigulu yekyo, i la laswa magina;

²¹ liloleka lya li nobutii kuduka Musa ya vola, Ubutii bu ng'umiye nelidegera.

²² Navutswa mwinye mu duki ku kigulu Zioni, noku lidala lya Nyasaye welivamwoyo, Yerusalemi lyomigulu, noku mahe ga ta valika getsingelosi,

²³ noku livugana linene lyavandu vosi, navo v a veye livugana lyavatanga kwivulwa, avameta gavo ga ng'odwa migulu, noku Nyasaye Mukalagi wa vosi, noku myoyo gyavandu valungi gya kolwa midukanu,

²⁴ noku Yesu mudukidzi welilagana lihya, noku masahi gufwa aga vola vilahi kuvita ga Habili.

²⁵ Mu henze bulahi mu tambakana u volanga. Kigira ni va vula kuhona avambakana uyu wa va mannya mu lirova, nasindi kwinye ku la vula kuhona ni kwiyahula kuye u ku mannyanga kutwula migulu:

²⁶ womwoyo gwigwe gwa degeridza lirova inyinga yeyo: navutswa kalunu u suuviridzi, na a vola, Inyinga yindi kandi nda degeridza, si li li lirova lyeng'ine, navutswa ligulu kandi.

²⁷ Kandi likuva yili, Inyinga yindi kandi, li lang'aminya lisundwa lyevindu vi degeridzwa, kuli vindu vya lombwa, vindu yivyo vi vuli kudegeridzwa vi menye.

²⁸ Kigira yaga, ni ku vugula ubwami bu ta nyala kudegeridzwa, ku ve netsimbabasi kutsyo ku duke kukolera Nyasaye, ubutumiki bwa mu yanzidza, nelitibwa nelyegehidza:

²⁹ kigira Nyasaye wetu a veye muliru gu sambanga.