Vahebraina 1 - KITABU KITAKATIFU

¹ Nyasaye, wa volera avaguga, tsinyinga tsya kale, ku tsinzira tsing'ano netsing'ano, ne minwa gyavaprofeti;

² kalunu mu madiku yaga, u voleye kwinye mu Mwana wewe, wa ya vika kuva wemiyandu gyevindu vyosi, kandi wa ya lomba naye tsinyinga tsyosi.

³ Uyu u veye bung'ering'anu bwobukumi bwibwe, nelifwana lyolugano lwilwe mwene, kandi u diranga vindu vyosi ku likuva lyetsingulu tsitsye, kandi lwa ya mala kulomba lyogidza lyobwoni, yikala ha mukono mulungi gwo Munene migulu;

⁴ wa gwa munene kuvita tsingelosi, kigira ne miyandu ya nyola lieta lya vita lyavo.

⁵ Kigira ya volera ingelosi u li ha tsinyinga tsyosi, Ive u veye Mwana wange, Inze lero nkwivuye? Kandi, Inze nda va Dada wewe Naye a la va Mwana wange?

⁶ Kandi lwa ya leta mu lirova wivulwa wokutanga ya vola, Tsingelosi va Nyasaye va msigamire.

⁷ Kandi ku getsingelosi a vola, U kolanga tsingelosi veve tsimbuudza, Kandi avatumwa veve kuva ulumemo lwomuliru.

⁸ Navutswa ku Mwana a vola, Intebe yoyo, O Nyasaye, i veye yemihiga nemihiga; Kandi impimbo yobulungi nempimbo yobwami bubwo.

⁹ U yanzi ubulungi, kandi u vihireywi ubwebaali; Kigira yaga Nyasaye, Nyasaye wowo, u ku vaki Maguta gobusangali kuvita avakyo.

¹⁰ Kandi, Ive, Mwami, mu litanga wa tema muse gwelirova, Kandi ligulu li veye miyinzi gyamakono gogo:

¹¹ Navyo vi la diva; navutswa ive u la hindira: Navyo vyosi vi la kunguha kuli ingubo;

¹² Kandi kuli ingubo yokwigulu u la vi linga, Kuli ingubo kandi vi la girunkanywa: Navutswa ive u veye kuli u veye, Nemihiga gyigyo si gyi la hera mba.

¹³ Navutswa ni bwaha ku tsingelosi wa ya volera tsinyinga tsyosi likuva yili, Wikala ha mukono mulungi gwange Kuduka mbike avasigu vovo kuva kisako kyevirenge vivyo?

¹⁴ Yavo vosi si va veye roho gyobutumwa, gyi tumangwa gyi duke kutumekira yava ava li lia miyandu gyobuhonnyi?