Vagalatia 3 - KITABU KITAKATIFU

¹ Mwinye Avagalatia ava ta li nobugeeri, ibwaha wa mu loga kuduka si mwa hulira ageligali, mwinye ava Yesu Kristo ya vikwa habulavu imbiri wetsimoni tsyenyu u bambeywi?

² Nyenya kuhulira ku mwinye kindu kilala, Mwa vugula Roho ku vikolwa vyelilaga, naho ku lihu lira lyelisuuvira?

³ Ubusiru bwe nyu bu duka ndi? Mwa tanga mu Roho, kalunu mu dukidzirwa mu mubiri?

⁴ Mu saliridzwe vindu vinyingi vya mu gwira vutswa? Ni ga va ni ga veye ga vutswa ligali.

⁵ Kunangwa uyu u hedzanga mwinye Roho, nokukola vyokugennya mu mwinye, ga veye ku vikolwa vyelilaga, naho ga veye ku lihulira lyelisuuvira?

⁶ Kuli Abrahamu ya suuvira Nyasaye, ni ga validzwa kuye kuva bulungi.

⁷ Kunangwa mu manye, yavo ava veye nelisuuvira yava nivo avana va Abrahamu.

⁸ Kandi ma ng'oda ga tanga kulola Nyasaye a la vola ku ve Tsihiri ubulungi kigira lisuuvira, ga tanga kwilwadzira Abrahamu ivangeli, ni ga vola, Tsihiri tsyosi tsi la gasidzirwa ku ive.

⁹ Kuduka yavo ava li nelisuuvira va luha va gasidzwa halala nomusuuvirifu Abrahamu.

¹⁰ Kigira ku yavo ava veye mu vikolwa vyelilaga va veye mu lilaamwa: kigira ga ng'odwa, Ku vosi u ta menya mu vindu vyosi vya ng'odwa mu kitabu kyelilaga a vi kole, a laamangwa.

¹¹ Ga veye habulavu si ha veye nomundu u volangwa kuva nobulungi imbiri wa Nyasaye mu lilaga: kigira, Wobulungi a la va mwoyo kigira lisuuvira;

¹² kandi lilaga si li veye lyelisuuvira; navutswa, Uyu u kolanga lilaga a la va mwoyo kuyo.

¹³ Kristo ya ku honnya mu vilaamu vyelilaga inyinga ya laamwa kigira kwinye; kigira ga ng'odwa, Ku vosi u sungangwa ku musala u laameywi:

¹⁴ ubugasu bwa Abrahamu mu Yesu Kristo bu duke ku ve Tsihiri; ku duke kunyola lisuuviridzwa lya Roho kigira lisuuvira.

¹⁵ Avamitu, mbola kuli avandu: Kali ga veye amalagano gavandu ni ga mali kusingeridzwa si ha veye nogononnya, kinga kugameda kindu.

¹⁶ Kalunu lisuuviridzwa lya volwa ku Abrahamu nekisukululwi kikye. Si a voye, Visukululwi kuli vi veye vinyingi; navutswa kuli ki veye kilala, Nekisukululwi kikyo, nakyo ni Kristo.

¹⁷ Kalunu mbola yaga: Amalagano ga Nyasaye ya tanga kusingeridza, lilaga lya duka inyima imihiga ni gyi viti tsimia tsine namakumi gavaka, si li nyala kwononnya, kuduka kuzangalalidza lisuuviridzwa.

¹⁸ Kigira miyandu ni gyi veye kigira lilaga si gyi veye kigira lisuuviridza kandi: navutswa Nyasaye ya ha Abrahamu kigira lisuuviridza.

¹⁹ Kunangwa lilaga li veye kindu ki? Lya medwa kigira lihyolo, kuduka lwe kisukululwi yiki kya hebwa lisuuviridzwa ki li duka; kandi ga singeridzirwa ku tsingelosi mu makono gomuhambannyi.

²⁰ Navutswa muhambannyi si a li womulala yeng'ine; navutswa Nyasaye a veye mulala.

²¹ Kunangwa lilaga li hing'ana nelisuuviridzwa lya Nyasaye? Auwa, ligali: kigira lilaga ni li va ni lya haanwa li nyala kuleta livamwoyo nkano ubulungi bu veye ku lilaga.

²² Navutswa mang'oda ga boha vindu vyosi ku bwoni, ava suuvira va duke kuhebwa lisuuviridzwa li twulanga ku lisuuvira li veye ku Kristo.

²³ Navutswa lisuuvira li kikiri kuduka, kwa li ni ku lindangwa mu lilaga, avabohe kigira lisuuvira li li lang'aminywa lwenyima.

²⁴ Kunangwa lilaga ya li mwegidzi wetu kukuleta ku Kristo, ku duke kuvalidzwa kuva nobulungi kigira lisuuvira.

²⁵ Navutswa lisuuvira li mali kuduka, si ku veye kandi ku mwegidzi.

²⁶ Kigira mwinye mwosi mu veye avana va Nyasaye, kigira lisuuvira mu Kristo Yesu.

²⁷ Kigira ku mwinye ava batidzwa ku Kristo, mweviki Kristo.

²⁸ Si ha li no Muyuda kinga Mugreki, kinga mutugwa, kinga muboholole, kinga mu satsa kinga mukali; kigira mu veye mulaia mu Kristo Yesu.

²⁹ Ni mu veye ava Kristo, hene yaho mu veye visukululwi vya Abrahamu, avemiyandu gyelisuuviridzwa.