Vafeso 4 - KITABU KITAKATIFU

¹ Kunangwa, inze muhambe mu Mwami, mmu goonya mu gende kuli ga mu dukira mu lilangwa lyenyu lya mwa langwa,

² nobwegehidzu bwomwoyo bwosi nobuhooma, kandi nobwikudziri, mwikudzirane avene navene mu buyanzi;

³ mwiguluhidze kulinda ubuhambani bwa Roho mu liboha lyemirembe.

⁴ Ha veye nomubiri mulala, kandi Roho mulala, kuli mwinye kandi mwa langwa mu lisuuviridzwa lilala lyelilangwa lyenyu;

⁵ Mwami mulala, nelisuuvira lilala, nelibatidza lilala,

⁶ Nyasaye mulala, naye a veye Dada wa vosi, u veye igulu ku vyosi, no mu vyosi, kandi mu vyosi.

⁷ Navutswa kwa hebwa sa mulala tsimbabasi kuli kigero kyekihaanwa kya Kristo.

⁸ Kigira yaga a vola, Lwa yanegira ya lanya lilanya, Na a ha avandu vihaanwa.

⁹ (Kunangwa likuva yili, Yanegira li veye ndi ni li ta li, yika ni yingira mugati mwelirova?

¹⁰ Uyu wika, niye wanegira igulu ligali kuvita ligulu lyosi, a duke kwizulitsa vindu vyosi.)

¹¹ Naye ya ha avalala va ve avatumwa; navandi, avaprofeti; navandi, avilwadzi vevangeli; navandi, avayi navegidzi;

¹² ku budukiru bwavatakatifu, kuduka ku miyinzi gyobutumwa, ku lyombaka lyomubiri gwa Kristo:

¹³ kwosi ku luhe ku duke ku buhambani bwelisuuvira, nobwokumanya Mwana wa Nyasaye, kali kuduka kuva mundu mudukiru, kali kuduka ku kigero kyobunene bwelizula lya Kristo:

¹⁴ ku ta va kandi avana vadoto ava viting'anywa yiyi neyiyi nokuvodonkanywa netsimbuudza tsyosi tsyamegidzo, ku busegetiri bwavandu mu bugeeri bwobugadi, ku lilonda ubugadi bwobugotidzi.

¹⁵ Navutswa mu livola ageligali mu buyanzi, mu du ke kuviruka mu uyu mu vindu vyosi, u veye mutwe, naye ni Kristo;

¹⁶ kutwula kuye mubiri gwosi gu hambanyeywi bulahi kandi gu nywereridzeywi halala kigira kyungu sa kilala, ki leta kuli miyinzi gyekidieli sa kilala, ki leta kigero kyakyo, i ndinangwa mubiri gu virukidzangwa ku lyombaka lyagwo mu buyanzi.

¹⁷ Kunangwa mbola yaga, kandi ndolekidza mu Mwami, mwinye mu ta genda kandi kuli Avetsihiri va gendanga, mu tsiganagani tsyavo tsya vutswa,

¹⁸ limanya lyavo li koleywi kisundi, va sundeywi hale nelivamwoyo lya Nyasaye, kigira livula kumanya li veye muvo, kigira myoyo gyavo gyi koleywi midinyu;

¹⁹ ava mali kugwa linagandi vitwulidza avene ni vehila mu kifwabwi, va duke kuyinzira ubudamano bwosi nelikayirwa lyosi.

²⁰ Navutswa mwinye si mweyegidza ndiyo Kristo mba.

²¹ Ni mba ni mu mu hulira nokwegidzwa muye, kuli ageligali ga veye mu Yesu:

²² ku lugano lwe vindu vyelimenya lya kale, mu twulidze mundu wa kale, wonekanga kigira likayirwa lyobugadi;

²³ kandi mu kolwe avandu avahya mu roho gwobugeeri bwenyu,

²⁴ mwevike mundu muhya wa lombwa ku lugano lwa Nyasaye mu bulungi nomu butakatifu bwageligali.

²⁵ Kigira yaga mu sule ububehi, sa mulala a volere wakye ageligali: kigira ku veye vivero avene navene.

²⁶ Mu vihirirwe, kandi mu ta kola ubwoni; mu ta leka liuva li yere ni mu veye nobutima:

²⁷ kandi mu ta ha Setani ubwiyangu.

²⁸ Uyu wiba a tiba kandi: navutswa nubulahi a didikane, a yinzire namakono gege, a kole kindu ki veye kilahi, a duke kuva nekindu kyokuha uyu u veye nobudaka.

²⁹ Likuva lidamano kali lilala li ta twula minwa gyenyu, navutswa yili li veye lilahi ku lyombaka, kuli lyenya li veye, kandi li duke kuha yava ava hulira liverererwa.

³⁰ Kandi mu ta vereridza Roho Mutakatifu wa Nyasaye wa mwa vikirwa ku muhuri, mu luhe mu duke ku lidiku lyelitungirwa.

³¹ Ubululu bwosi, nobutima, nelivihirirwa, neliyoga, namanyego, vi twu lidzwe ku mwinye, halala nembodoka yosi:

³² mu ve nobuhooma avene navene, nokuvererana tsimbabasi, nokusamehana avene navene, kuli Nyasaye ya sameha mwinye mu Kristo.