Tsing'ano 8 - KITABU KITAKATIFU

¹ Yee, ubugeeri si bu kupanga lwanga, Na limanya si li twulidzanga mwoyo gwalyo?

² Igulu wa hadiguluku himbi nenzira, Ha bwaganiru bwetsinzira, niho ha a singiranga;

³ Himbi neviribwa, ha bwingiriru bwelidala, Ha bwingiriru bwemiliango a kupanga lwanga:

⁴ Ku mwinye, O avasatsa, nanganga; Na mwoyo gwange gu veye ku avana va vandu.

⁵ O mwinye ava ta manya, mu manye ubugeeri; Na mwinye avasiru, mu ve nomwoyo gwelimanya.

⁶ Mu hulire, kigira nda vola makuva manene Na likunula lyeminwa gyange li la va lyevindu vilungi.

⁷ Kigira munwa gwange gu la vola ageligali; Na ubudamano bu veye livihiriridzwa ku minwa gyange.

⁸ Amakuva gosi gomunwa gwange ga veye ubulungi; Si ha veye nekindu kyobukyamu kinga vyokuvoyonkana mugo.

⁹ Gosi ga veye havulavu ku uyu u manyanga, Na agobulungi ku yava ava nyolanga limanya.

¹⁰ U vugule megidzo gange, na u ta vugula ifetha; Na u vugule limanya kuvita ithahabu indahi.

¹¹ Kigira ubugeeri bu veye bulahi kuvita magina makanyu gobuguli budinyu; Na vyosi vyenyangwa si vi nyala kuleng'anywa nabwo.

¹² Inze ubugeeri nkoli limanya kuva hokumenya hange, Na nyola limanya vindu vyobugeeri.

¹³ Litia Yahova li veye kudunyira ubudamano: Luyai, na lyegingira, na inzira indamano, Na umunwa gwobukyamu, ndunyiranga yivi.

¹⁴ Livola malungi li veye lyange, na ubugeeri ubudukiru: Inze mbeye limanya; mbeye nobunyali.

¹⁵ Avami vamehanga kigira inze, Na avanene va kalaganga agobu lungi.

¹⁶ Avanene vamehanga kigira inze, Na avakuminywa kali avakalagi vosi velirova.

¹⁷ Nyanzanga yavo ava yanza inze; Navo avenyanga budinyu va la nyola inze.

¹⁸ Ubutugi na lidzominywa vi veye halala na inze; Yee, ubutugi bwokuhindira na ubulungi.

¹⁹ Amakuyu gange ga veye malahi kuvita ithahabu, yee, kuvita ithahabu indahi; Na limedeka lyange li veye lilahi kuvita ifetha indahi.

²⁰ Inze ng'endanga nevirenge mu inzira yobulungi Hagati hetsinzira tsyelikalaga lilungi;

²¹ Nduke kulihidza yavo ava nyanzanga miyandu, Nduke kukola ubutugi bwavo bwizule.

²² Yahova ya li ninze mu litanga lyenzira yeye, Imbiri wemiyinzi gyigye gya kale.

²³ Inze nda singeridzwa kale, mu litanga, Lwa lirova li kikiri kuva ho.

²⁴ Ha li bugira ululiva, inze ndivulwa; Lwa visenukiru vi kikiri kwizula amadzi.

²⁵ Lwa vigulu vi kikiri kusingeridzwa, Na lwa tugulu tu kikiri, inze ndivulwa;

²⁶ Lwa a kikiri kulomba lirova, kinga milimi, Kinga litanga lyolugukyi lwelirova.

²⁷ Lwa ya singiridza migulu, inze nda li ho: Lwa ya vika ulwako mmoni mwo luliva.

²⁸ Lwa ya dinyiridza ubwerefu igulu, Lwa visenukiru vyoluliva vya nyola tsingulu

²⁹ Lwa ya vika ulwako lwenyanza, Amadzi ga vule kwononnya lilaga lilye Lwa ya laga imise gyelirova:

³⁰ Hene yaho nda li halala naye kuli musidza; Nda li ubuyanzi bwibwe madiku gosi Nda sangala imbiri wewe kazozo.

³¹ Nda sangalira lirova lilye lya avandu va menya mu; Na ubuyanzi bwange bwa li halala na avana va avandu.

³² Kunangwa kalunu, mwinye avana vange, mu hulire inze; Kigira va gasidzeywi yavo ava lindanga tsinzira tsyange.

³³ Mu hulire lyegidzwa, na mu ve nobugeeri, Mu ta li sula mba.

³⁴ A veye nobugasu mundu u huliranga inze, U lindanga madiku gosi mu viliango vyange U lindanga ha maliva geviliango vyange.

³⁵ Kigira ku vosi uyu u nyolanga inze a nyolanga livamwoyo, Na a la nyola tsimbabasi tsya Yahova.

³⁶ Navutswa uyu u nkolera ubwoni, yononnya mwoyo gwigwe mwene: Vosi ava ndunyiranga, yava va yanzanga likudza.