Tsing'ano 7 - KITABU KITAKATIFU

¹ Mwana wange, u gumire makuva gange, Na u vike amalago gang halala na ive.

² U gumire amalago gange na u ve mwoyo; U gumire lilaga lyange kuli u linda indolero yemoni yoyo.

³ U ga bohe ku videte vivyo; U ga ng'ode ku kibao kyomwoyo gugwo.

⁴ U volere ubugeeri, Ive u veye mbotso wange; Na u lange limanya mukali womwiko wowo:

⁵ Ga duke kukulinda ku mukali mugeni, Ku mukali mugeni u kolanga makuva gege madoto.

⁶ Kigira ha lidirisha lyenyumba yange Nda li ni mbenzeranga mu lidirisha lyange;

⁷ Nda lola musoleli u ta li nobugeeri, Nda mu lola hagati ha vasiru, Musoleli u ta li nelimanya

⁸ A vitanga ku inzira himbi ku bwavukaniru bwenzira ha a menya; Na ya londa inzira kutsia mu inyumba uomukali uvu.

⁹ Inyinga ya bwiranga, inyinga yomgolova gwelidiku, Inyinga yobudiku hagati mu kisundi.

¹⁰ Na henza, mukali ya vugana naye Wevika tsingubo tsyamalaya, womwoyo gwobugadi.

¹¹ (A veye weliyoga na wobukyamu; Virenge vivye si vi menya mu inyumba yeye mba:

¹² Hali kanyingi a veye mu tsinzira, na hali kanyingi mu mahasi, Na a gonekanga mu bwavukaniru bwosi.)

¹³ Ma mukali ya mu gumira na a mbusa Naye ya li nommoni mu ta li netsisoni, na a mu volera:

¹⁴ Inze mbeye nevihaanwa vyemirembe; Lero ntungi vyelilagana lyange.

¹⁵ Kunangwa ndadza kuvugana na ive, Kwenya ligali mmoni mumwo, na mmali kukulola.

¹⁶ Mmali kwala ubugono bwange nevyokugonera vilahi, Na tsingubo tsyamagondo na katani indahi ya Egepeti.

¹⁷ Mbiki ku bugono bwange vya funya mwayu Manemane, na undi, na mudalasini.

¹⁸ Hamba kwigute ubuyanzi kuduka mugamba; Kwesangalidze avene neliyanzana.

¹⁹ Kigira musatsa mwene inyumba si a veye ho mba; U tsiye ulugendo lwe ihale:

²⁰ U tsiye nemuya yefetha; A ladza yengo inyinga yomweli gu kyera.

²¹ Na ya mu girunkannya namakuva manyingi malahi; Kandi namakuva madoto geminwa gyigye ya mu niga kutsia

²² Nonoho a mu londa Kuli ing'ombe i tsitsanga kumi gwa, Kinga kuli welibofwa nevivya a tsitsanga ku lyegidzwa lyobusiru;

²³ Kuduka lwo mbano gu mu tumita mu likudumane lilye; Kuli linyonyi li tsitsanga bwangu kwingira mu luginga, Na si a manya ga veye kudividza livamwoyo lilye.

²⁴ Kunangwa mwinye avana vange, mu mbulire Na mu linde amakuva gomunwa gwange.

²⁵ U ta bugirira mwoyo gugwo kuyeka ku tsinzira tsyomukali uyu; U ta gotera ku tsinzira tsitsye.

²⁶ Kigira u tsomi hasi avanyingi ava kindukidzwa: Yee, vosi aviitwa naye va veye lihe linene.

²⁷ Inyumba yeye i veye inzira ya Kihadisi, I sulungutanga kutsia mu inyumba yelikudza.