Tsing'ano 6 - KITABU KITAKATIFU

¹ Mwana wange, nu u va nu u V kolera mutende wowo kihambiriru, Nu u va nu u hambana mu mukono gwomugeni;

² U tegeywi na makuva gomunwa gugwo, U vuguywi na makuva gomunwa gugwo

³ Kunangwa, kalunu, mwana wange, u kole yaga, wehonnye mwene, Kigira wingiye mu mukono gwowakyo: U tsie, wegehidze mwene, na u goonye wakyo;

⁴ U ta ha tsimoni tsitsyo tsindolo mba, Kandi u ta ha vigohe vivyo litengedza;

⁵ Wehonnye ive mwene kuli kisusu kyehonganga ku mukono gwo muhimi, Na kuli linyonyi li twula mu mukono gwomutegi.

⁶ U tsie ku viguguli, ive mugata; U ganagane tsinzira tsyakyo, u ve nobugeeri:

⁷ Vya vuli kuva nomunene, Kinga musingeriri, kinga mwami,

⁸ Navutswa vyevikira vyokulia inyinga yoluya, Nokuvungidza vyokulia vyakyo inyinga yeligesa.

⁹ U la gona kuduka inyinga ki, ive mugata? U la vuka inyinga ki kutwula mu tsindolo tsitsyo?

¹⁰ U ki gonanga hakekeke, nokutengedza hakekeke, Nokulinga makono mu tsindolo hakekeke:

¹¹ Na ndiyo ubudaka bubwo bu la duka ku ive kuli mwivi, Na lyegomba lilyo kuli mundu weviki vyobulwani.

¹² Umundu u ta konya kindu, mundu wobudamano, Ni uyu u tsitsanga nomunwa gwobukyamu

¹³ Uyu a simiranga vigohe vivye, nokuvola nevirenge vivye, Nokusima nevidete vivye;

¹⁴ Wobukyamu bu veye mu mwoyo gwigwe, Uyu u ganagana ubudamano kazozo, Uyu u taganga ubugutsa bwamahangali.

¹⁵ Kigira yaga kivi kikye ki la duka kuye nonoho; A la vunanywa nonoho, na si ha veye nenzira yokuhona.

¹⁶ Vi veye ho vindu vitano na kilala vya Yahova a dunyiranga; Yee, vitano na viviri vi veye vyokuvihiriridza kuye:

¹⁷ Navyo vi veye, tsimoni tsyokwigingira, na lulimi lwobugadi; Na makono ga tahidzanga masahi ga ta li nekindu;

¹⁸ Mwoyo gu ganagananga tsigana gani tsindamano, Virenge vi nyaguliranga ubuda mano,

¹⁹ Muloli wobugadi u volanga ububehi, Na uyu u taganga ubugutsa bwamahangali hagati havamwavo.

²⁰ Mwana wange, u gumire amalago ga dada wowo, Na u ta leka lilaga lya mama wowo:

²¹ U ga bohe ku mwoyo gugwo kazozo; U ga hambidze migoti lilyo.

²² Lwa u genda ga la kwimirira; Na lwa u gona tsindolo ga la ku linda; Na lwa u vuka ga la volerana na ive.

²³ Kigira lilaga li veye itaya; na lyegidza li veye ubulavu; Na lyegidzwa lyeligondokirwa li veye inzira yelivamwoyo:

²⁴ Kukulinda ku mukali mudamano a vule kukunyola Nokukuhonnya ku budoto bwolulimi lwomugeni.

²⁵ U ta kayirwa ubulahi bwibwe mu mwoyo gugwo; Kandi u ta bugirira a ku tege nevigohe vyetsimoni tsitsye.

²⁶ Kigira ku mukali wamalaya mundu a dukidzwa ku lidonye lyobukima; Na mukali muheyi a himanga livamwoyo lyobulahi bunene.

²⁷ Mundu a nyala kuvugula amanda mu kiritu kikye, Na tsingubo tsitsye tsi vule kuhya?

²⁸ Kinga mundu a nyala kugenda ku amanda gomuliru, Na tsinduvatiru tsitsye tsi vule kuhya?

²⁹ Ni ndiyo a veye uyu wingiranga ku mukali womutende; Ku vosi u dira mukali uyu, si a la vula kukalagirwa.

³⁰ Avandu si va leganga mwivi, ni yiba A duke kwigutidza mwene lwa a veye nenzala:

³¹ Navutswa na a va na a nyoleka a la tunga hali katano na kaviri; A la haana vyosi vyenyumba yeye.

³² Uyu u heyanga nomukali si a veye nobugeeri: U kolanga yaga yenya kudividza mwoyo gw gwe.

³³ A la nyola tsing'oma na lilegwa; Na tsisoni tsitsye tsi la vula kweywa ligali.

³⁴ Kigira imbodoka i veye ubutima bwomundu; Naye si a la va netsimbabasi ku lidiku lyokuvanza kisalya.

³⁵ Si a la bugirira kutungwa mitungu; Kandi a la vula kulemera, kali nu u mu ha vihaanwa vinyingi.