Tsing'ano 30 - KITABU KITAKATIFU

¹ Makuva ga Aguru mwana wa Jakeh; ubutumwa. Mundu a volera Ithieli, a volera Ithieli na Ukali:

² Ligali mbeye kuli inyama kuvita mundu ku vosi Na si mbeye nelimanya lyomu ndu;

³ Na mbula kwega ubugeeri, Kandi si mbeye nelimanya lya uyu Mutakatifu.

⁴ Ibwaha wanegira migulu, nokusulunguta kandi? Ibwaha wa vungidza imbuudza mu mukono gwigwe? Ibwaha wa boha amadzi mu ingubo yeye? Ibwaha wa singeridza viheri vyosi vyelirova? Lieta lilye ni bwaha, na lieta lyomwana wewe ni bwaha, nu u va nu u manya?

⁵ Makuva gosi ga Nyasaye ga geridzwa: A veye ingavo ku yavo avevisanga muye.

⁶ U ta meda ku makuva gege, Gase a la ku gondokera, na u la loleka kuva mbehi.

⁷ Ntevi ku ive vindu viviri; U ta nyima yivi lwa nkikiri kukudza:

⁸ U hile hale ku inze ubugadi na ububehi; U ta mpa ubudaka kinga ubutugi; U ndageridze nevyokulia vi ndu kira:

⁹ Gase ndiguta, nokwambakana ive, nokuvola, Yahova ni bwaha? Kinga nda va mudaka ligali, gase nda va mwivi, Nokutumekira vutswa lieta lya Nyasaye wange.

¹⁰ U ta huudzeridza mutugwa ku munene wewe Gase a la ku nyega, na u la loleka kuva nelihyolo.

¹¹ Ha veye nelikula lya nyega dada wavo Na va vula kugasidza mama wavo.

¹² Ha veye nelikula lyelolanga avene kuva vanifu Navutswa si va singwa ubudamano bwavo.

¹³ Ha veye nelikula, lyeginga lyetsimoni tsyavo li duka ndi Na vigohe vyavo vya gingwa.

¹⁴ Ha veye nelikula lyamino gavo ga veye kuli vivavi, na magego kuli mibano Kulia avadaka va twule mu lirova, na avadambi va twule hagati ha avandu.

¹⁵ Impininia i veye navakana vaviri, ava volanya, U ku he, u ku he. Vi veye ho vindu vivaka vi vula nga kwiguta ligali Yee, vi veye ho vindu vine vi vulanga kuvola, Ga duki.

¹⁶ Kilindwa; na mugumba; Lirova li vula kwiguta amadzi; Na muliru gu vula kuvola, Ga duki.

¹⁷ Imoni i sekanga dada wewe, Nokulega lihulira mama wewe, Amajikolo gomwivona ga la gi somola, Na viminyo vyendidzu vi la gi lia.

¹⁸ Ha veye ho nevindu vivaka vyokugenya vyokuvita inze, Yee, vine vya nta manya:

¹⁹ Inzira yendidzu mbwerefu; Inzira yenzoka ku lwanda; Inzira yobwato mu inyanza; Na inzira yomundu halala nomu kana.

²⁰ Ni ndiyo inzira yomukali muheyi i veye; A litsanga, ma yeya munwa, Na vola, Si nkoli kindu kidamano.

²¹ Lirova li degera kigira vinduvivaka Kandi kigira vine vya li ta nyala kwikudzira ku, navyo ni yivi;

²² Mutumekiri lwa a duka kuva mwami; Na musiru lwa yiguti vyokulia;

²³ Na umukali u dunyerangwa, lwa a sererwa; Na mukana mutugwa u veye wemiyandu gyomukali munene wewe.

²⁴ Vi veye ho vindu vine vikekeke mu lirova, Navutswa vi veye nobugeeri ligali;

²⁵ Viguguli vi veye avandu ava ta li netsingulu, Navutswa vyelombera vyokulia vyavyo inyinga yekimeyu;

²⁶ Makinieli ga veye avandu vadede kere, Navutswa gelombera tsinyumba tsyago mu tsinyanda;

²⁷ Tsisigi si tsi veye nomwami, Navutswa tsyosi tsi gendanga viduma;

²⁸ Lisyagali li gumiranga na makono galyo, Navutswa li menyanga mu tsinyumba tsyobwami tsyavami.

²⁹ Vi veye ho vibaka vyolugendo lulahi, Yee, vine vyolugendo lulahi:

³⁰ King'ang'a ki veye netsingulu kuvita tsinyama tsyosi Na si ki girunkana kulekera inyama yindi inzira;

³¹ Na imbwa ya ng'era mundakandi ikole; Na mwami wamahyolo ga ta veye kuye.

³² Ive nu u va u koli agobusiru mu lyegingira mwene, Kinga u ganagani vidamano, U vike mukono gugwo ku munwa gugwo.

³³ Kigira mu lisadza amaveere ama guta ga loleka, Na mu limina amolu amasahi ga twulanga; Na ndiyo mu livukidza ubutima lihing'ana li loleka.