Tsing'ano 25 - KITABU KITAKATIFU

¹ Yitsi ni tsing'ano tsya Solo moni, tsya avandu va Hezekia mwami wa Vayuda, va vugula kutsing'oda.

² Ubukumi bwa Nyasaye bu veye kuvisa kindu Navutswa ubukumi bwavami bu veye kwidera inkuva.

³ Kuli ligulu li veye mbwerefu, na lirova li veye mu luliva, Ni ndiyo mwoyo gwavami gu ta nyala kwiderwa.

⁴ U twulidze amandu ku if etha, Na ki la loleka kiju ku uyu museredze:

⁵ U twulidze avadamano imbiri womwami Na intebe yeye yobwami i la dinyeridzwa mu bulungi.

⁶ U tenenehidza imbiri womwami, Kandi u ta singira ku lugano lwavandu vanene:

⁷ Kigira livolerwa, Hamba ino imbiri, bu veye bulahi ku ive, Kuvita ligehidzwa imbiri womunene, Wetsimoni tsitsyo tsi mali kulola.

⁸ U ta tsia bwangu kuhing'ana nomundu, Gase u la vula kumanya, kya u li kola inyima, Lwa mutende wowo a ku legannyi.

⁹ U volerane nomutende wowo mwene, makuva gogo, Kandi u ta vuula inkuva ya viswa yomundu wundi;

¹⁰ Gase u hulira ive, a la ku nyega, Na makuva gogo madamano ga vule kutwula ku ive.

¹¹ Likuva li volangwa ku inyinga yalyo Li veye kuli makuyu gethahabu mu vihinda vyefetha.

¹² Kuli imingiri yomugutu yethahabu, na kiju kyethahabu indahi, Na ndiyo mwegidzi wobugeeri ku ugutu gu huliranga.

¹³ Kuli ubukindu bwelikonza mu inyinga yeligesa, Na ndiyo mutumwa musuuvirifu a veye ku yavo ava mu tumanga; Kigira a leminya mwoyo gwavanene veve.

¹⁴ Kuli malesi gembuudza ga ta veye nembula, Na ndiyo uyu wiidzominya mbubehi ku vihaanwa vivye.

¹⁵ Ku lyekudzira mwamehi a girunkanyanngwa, Na ululimi ludoto lu vunannya kigumba.

¹⁶ U loli ubwuki? Ulie ubu ku duka, Gase u liguta, na u la luka.

¹⁷ Kirenge kikyo ki ta va mu inyumba yomutende wowo hali kanyingi, Gase u la mu luhidza, naye a la ku dunyira.

¹⁸ Mundu u lolekidza agobubehi ku mutende wewe A veye inyundu yomusala, na kivavi, na mbano mwogi.

¹⁹ Kusuuvira mundu u ta li musuu virifu inyinga yekivi Ga veye kuli lino lyavunika, na kirenge kyateguka.

²⁰ Kuli uyu u navula ingubo inyinga yobukindu, na kuli isiki i vikeywi ku magadi, A veye ndiyo uyu yimbiranga womwoyo muliduhu tsinyimbu.

²¹ Musigu wowo na a veye nenzala, u mu he ubukima a lie Kandi na a veye nobuluhu, u mu he amadzi a nwe:

²² Kigira u la vungidza amanda gomuliru ku mutwe gwigwe, Na Yahova a la ku ha madanyi.

²³ Imbuudza ya kasikasini i letanga imbula: Ni ndiyo ululimi lwelihuudziridza li letanga mmoni mwobutima.

²⁴ Nobulahi kumenya ku kisegese, Kuvita kumenya mu inyumba ingalamu halala nomukali weli hing'ana.

²⁵ Kuli amadzi makindu ku uyu u veye nobuluhu, Na ndiyo amakuva malahi aga twulanga mu kivala kyehale.

²⁶ Kuli kisenukiru kyamadzi ga duvuka, na kuli mugera gwononywa, Ni ndiyo wobulungi a gwidzanga imbiri wavadamano.

²⁷ Si bu li bulahi kulia ubwuki bunyingi: Ni ndiyo ku arandu venyanga ubukumi bwavo avene bu veye ubudamano.

²⁸ Uyu womwoyo gwigwe gu ta veye neligaywa A veye kuli lidala li tsomwa hasi, na si li veye nelidigi.