Tsing'ano 23 - KITABU KITAKATIFU

¹ Lwa wikala kulia halala nowameha U henze ligali uyu a veye imbiriwowo;

² Na u vike mbano ku lidundu lilyo, Nu u va nu u veye mundu u yanza kulia.

³ U ta kayirwa vindu vivye vinolu; Kigira vi veye vyokulia vyobugadi.

⁴ U teluhidza mu lyenya ubutugi; U leke ubugeeri bubwo mwene.

⁵ U tumika tsimoni tsitsyo ku yiki ki ta li kindu, Kigira ligali ubutugi bwekolera tsimbaha, Kuli indidzu i bulukanga kutsia migulu.

⁶ U ta lia ubukima bwa uyu wemoni imbi, Kinga kukayirwa vindu vinolu vivye:

⁷ Kigira kuli yeganagananga mwene a veye ndiyo: A ku volera, U lie na u nwe; Navutswa mwoyo gwigwe si gu veye mulungi ku ive.

⁸ Kitonge kya u liye u la ki luka kandi, Na makuva gogo manolu ga la gota.

⁹ U ta vola mu lihulira lyomusiru; Kigira a la lega ubugeeri bwamakuva gogo.

¹⁰ U ta twulidza kiloleru kyolwako lwa kale; Kandi u tiingira mu milimi gya avabisandu:

¹¹ Kigira Umutungi wavo a veye wetsingulu; A la vanza likuva lyavo ku ive.

¹² U vike mwoyo gugwo kuhulira lyegidzwa, Na amatu gogo kuhulira makuva gelimanya.

¹³ U ta gaya lyegidzwa ku mwana; Nu u va nu u mu kuya nolusah, si a la kudza mba.

¹⁴ U la mu kuya nolusala, Nokuhonnya mwoyo gwigwe ku Kihadisi.

¹⁵ Mwana wange, mwoyo gugwo ni gu veye nobugeeri, Mwoyo gwange gu la sangala, yee, kali gwange.

¹⁶ Yee, mwoyo gwange gu la sangala, Lwa minwa gyigyo gyi voh makuva malahi.

¹⁷ Mwoyo gugwo gu ta kendeka ku avetsimbi; Navutswa u ve mu litia Yahova mbasu bei:

¹⁸ Kigira ligali ga veye ho madanyi; Na lisuuvira lilyo li la vula kukalagwa.

¹⁹ Mwana wange, u hulire, na u ve wobugeeri, Wimirire mwoyo gugwo ku inzira.

²⁰ U ta va mu yavo ava nwedzanga amalwa; Kinga mu yavo ava huvala ku tsimyama:

²¹ Kigira umuhambiki na muhuvali vombi va la duka mu bu daka; Na tsindolo tsinyingi tsi la boha mundu amadali.

²² U hulire dada wowo wa kwivula, Na u ta lega mama wowo lwa a veye mukeere.

²³ U gule ageligali, u ta ga gulidza mba; Yee, kali ubugeeri, na lyegidzwa, na limanya.

²⁴ Dada womulungi a la sangala ligali; Na uyu wivula mwana wobugeeri a la sangala kuye.

²⁵ U sangalidze dada wowo na mama wowo, Na uyu wa kwivula a sangale ligali.

²⁶ Mwana wange, mpe mwoyo gugwo; Na tsimoni tsitsye tsi sangale mu tsinzira tsyange.

²⁷ Kigira wamalaya a veye mugerera munene; Na mukali mugeni a veye ubogo bunyerere.

²⁸ Yee, uyu a setanga kuli munuuli, Naye a medanga avobugadi hagati ha avandu.

²⁹ Ni bwaha u kupanga luvi? Ni bwaha u volanga bayaye? Ni bwaha u veye nelihing'ana? Ni bwaha u veye nelikenya? Ni bwaha u veye netsingoma bugira kivune? Ni bwaha wakanya tsimoni?

³⁰ Ni yavo ava hongera kunwa amalwa; Ni yavo ava tsitsanga kwenya vyokunwa vya yengwa.

³¹ Ive u ta henza iwaini ni i veye inzakanyu, Lwa li lolekanga mu kikombe, Lwa li tulukanga inzaku:

³² Ku kiheri i lumanga kuli inzoka, Nokusaleridza kuli kihirigoma.

³³ Tsimoni tsitsyo tsi la lola vindu vigeni, Na mwoyo gugwo gu la vola vindu vikyamu

³⁴ Yee, u la va kuli uyu u gonanga hagati henyanza, Kinga kuli uyu u tengedzanga ku isonga yomulage gweliato.

³⁵ U la vola, Va nkuyi na si nsaliye mba; Va nkuyi, na si mbuliye likuywa: Nda vuka inyinga ki? Nda genya kandi.