Tsing'ano 21 - KITABU KITAKATIFU

¹ Mwoyo gwomwami gu veye mmukono gwa Yahova kuli migera: A gu girunkannyanga hosi ha yenya.

² Tsinzira tsyosi tsyomundu tsi veye tsindahi mu tsimoni tsitsye mwene; Navutswa Yahova a geranga myoyo ku iratili.

³ Kukola agobulungi na agelikalaga Ga yanzidza Yahova kuvita kihaanwa.

⁴ Tsimoni tsyokwegingira, na mwoyo gwoluyai Kali itaya yavekirage, vi veye ubwoni.

⁵ Tsiganagani tsya avagulu tsi henzanga ku bunyingi bweng'ine; Navutswa sa mulala u hyuhyukananga a duka mu budaka bwere.

⁶ Linyola lyobutugi bwolulimi lwobubehi Li veye lilumbe li hungudzangwa yiyi na yiyi na yavo avenyanga likudza.

⁷ Kirage kyavadamano ki la va hila mu budivi, Kigira va sula kukola likalaga lilungi.

⁸ Inzira ya uyu wamahyolo ga mminanga i veye inkyamu ligali; Navutswa ku uyu wobunifu, miyinzi gyigye gyi veye milungi.

⁹ Nobulahi kumenya ku kisegese, Kuvita kumenya mu inyumba ingalamu halala nomukali welihing'ana.

¹⁰ Mwoyo gwomudamano gwenya nga ubudamano: Mutende wewe si a veye mulahi mu tsimoni tsitsye.

¹¹ Lwa wekihenyahenye a kalagirwa, musiru a nyolanga ubugeeri; Na lwa mugeeri yegidzwa a nyola limanya.

¹² Mundu mulungi u ganagananga inyumba yomudamano, Kuli avadamano va tung'aminyangwa kuduka mu budivi.

¹³ Uyu u hananga amatu gege ku lilira lyomudaka, Naye a la lira, na a la vula kuhulirwa.

¹⁴ Kihaanwa kya makiriri ki hodzeridza ubutima; Na madanyi mu kiritu ga hodzeridza ubutima bululu.

¹⁵ Bu veye ubuyanzi bwavalungi kukola likalaga lilungi; Navutswa bu veye ubudivi ku ava kolanga ubudamano.

¹⁶ Mundu u voyavoyanga kutwula ku inzira yelimanya A la menya mu livugana lyavakudzu.

¹⁷ Uyu u yanzanga uluyai a la va mudaka: Uyu u yanzanga iwaini na maguta si a la va mutugi mba.

¹⁸ Mudamano a veye mutungu gwomulungi; Na uyu muzami a ladza mu bugono bwomulungi.

¹⁹ Kumenya mu kyangalangwi bu veye bulahi, Kuvita kumenya nomukali welihing'ana na kivihiri.

²⁰ Akiba yobuguli budinyu na yamaguta vi veye mu bumenyo bwavageeri; Navutswa wobusiru a vi miranga.

²¹ Uyu u londanga ubulungi na tsi mbabasi A nyola livamwoyo, na ubulungi, na lidzominywa.

²² Mundu wobugeeri a ninanga mu lidala lyavetsingulu, Nokwikidza hasi tsingulu tsyobuluviriri bwalyo.

²³ Ku vosi uyu u gayanga munwa gwigwe na ululimi lwilwe Yelinda mwoyo gwigwe ku lidambidzwa.

²⁴ Woluyai, na welyegingira, lieta lilye li veye kihenyahenye; A kolanga mu butima bwoluyai lwilwe.

²⁵ Lyenya lyomugata li mwiitanga; Kigira makono gege ga sula ku kola miyinzi.

²⁶ A veye ho mwimani u kayirangwa mbasu bei; Navutswa mulungi a haananga na a vula kwimana.

²⁷ Kihaanwa kyomudamano ki veye livihiriridza: Nasindi, lwa a ki letanga nomwoyo mudamano

²⁸ Muloli wobubehi a la diva; Navutswa mundu u huliranga a la dinyeridza livola lilye.

²⁹ Mundu mudamano a dinyiridza mmoni mwimwe; Navutswa ku makuva gomulungi a dinyiridza tsinzira tsitsye.

³⁰ Si ha veye nobugeeri, kinga limanya, Kinga makuva ga nyala kusingira ku Yahova.

³¹ Iparasi i lombangwa kwetegeka ku lidiku lyobulwani; Navutswa liguuta li veye lya Yahova.