Tsing'ano 18 - KITABU KITAKATIFU

¹ Uyu weyahulanga ku wakye yenyanga lyenya lilye mwene, Naye a hing'ananga nobugeeri bwosi bweligali.

² Musiru si a lolanga ubuyanzi mu limanya, Navutswa mwoyo gwig ve gu duke kwelang'aminya.

³ Lwa mudamano yadzanga, kandi lilega lidza Na halala netsisoni lilegwa lidza.

⁴ Makuva gomunwa gwomundu ga veye kuli amadzi goluliva; Kisenukiru kyobugeeri ki veye kuli mugera gu gendanga.

⁵ Ukweridza mumoni mwomudamano si bu veye bulahi mba, Kinga kukyaminya mulungi mu likalaga.

⁶ Minwa gyomusiru gyingiranga mu lihing'ana, Na munwa gwigwe gu langanga maduya.

⁷ Munwa gwomusiru gu veye lidiva lilye, Na minwa gyigye gyi veye mitego gyomwoyo gwigwe.

⁸ Makuva ga uyu u monyanga ga veye kuli ubukima ubunolu, Nago gikanga kuduka munda mwimwe.

⁹ Uyu u veye mugata mu miyinzi gyigye A veye amwavo wa uyu mwononnyi.

¹⁰ Lieta lya Yahova li veye impinga yetsingulu; Mulungi yirukira muyo ma a hona.

¹¹ Ubutugi bwomutugi bu veye lidala lilye lyolugaga Kandi li veye kuli lidigi litambi mu liganagana lilye munene.

¹² Mwoyo gwomundu gu veye nobwigingiri imbiri wobwoneku; Na lyegehidza limiriranga lidzommywa.

¹³ Uyu u tivulira lwa a kikiri kuhulira, Ga veye ubusiru na tsisoni kuye.

¹⁴ Mwoyo gwomundu gu la ginga ubudedekere bwibwe Navutswa mwoyo gwoneka, ibwaha u nyala kwikudzira kugwo?

¹⁵ Mwoyo gwowobugeeri gu nyolanga limanya; Na ugutu gwa uyu mugeeri gwenyanga limanya.

¹⁶ Kihaanwa kyomundu ki mu lombera ubwiyangu, Na ki mu letanga imbiri wa avandu avanene.

¹⁷ Uyu a tanga kuvola makuva gege a loleka kuva mulungi; Navutswa mutende wewe yadza nokumwidera.

¹⁸ Ikura i heridzanga lihing'ana, Nayo yavukannyanga avanene yava na yava.

¹⁹ Amwavo u dunyiridzangwa, ubudinyu bwokumunyola kuvita kuvugula livugula lidala lyetsingulu; Na lihing'ana kuli yili li veye kuli miluguyu gyolugaga.

²⁰ Inda yomundu i lizula makuyu gomunwa gwigwe; A liguta limedeka lyeminwa gyigye.

²¹ Likudza na livamwoyo vi veye mu tsingulu tsyolulimi; Navo ava lu yanza va la lia makuyu galwo.

²² Ku vosi uyu u nyola mukali a nyola kindu kilahi, Naye a nyola ubulahi ku Yahova.

²³ Umudaka a tumikiranga ligoonya, Navutswa umutugi a tivilira makuva malulu.

²⁴ Uyu welomberanga avalina vanyingi a kola ku budivi bwibwe mwene; Navutswa a veye ho mulina u hambana kuvita amwavo.