Tsing'ano 17 - KITABU KITAKATIFU

¹ Kitonge kikaya halala nobwehodzeridzi ki veye kilahi Kuvita inyumba yizuye lilia halala nelihing'ana.

² Mutumekiri u kolanga nobugeeri a lameha ku mwana wetsisoni, Na a la va nekidieli mu miyandu hagati ha avamwavo.

³ Ludavo lu veye lwefetha, na mahiga gethahabu; Navutswa Yahova a geridzangamyoyo.

⁴ U kola ubudamano a huliranga minwa gyobudamano; Umbehi a tegidza matu kuhulira ululimi lwobutindi.

⁵ Ku vosi u kolera mudaka kihenyahenye a leganga Mulombi wewe; Na uyu u sangalira budivi si a la vula kukalagirwa.

⁶ Avana va avana va veye itaji yavasakulu; Na ubukumi bwavana bu veye avadada vavo.

⁷ Makuva manene si ga dukana nomusiru; Nasindi minwa gyobubehi si gyi dukana nomunene.

⁸ Kihaanwa ki veye kuli ligina lyobuguli budinyu imbiri wetsimoni tsya uyu u veye nakyo; Hosi ha ki girunkananga ki gasidzangwa.

⁹ Uyu u kunikanga lihyolo yenyanga ubuyanzi; Navutswa uyu u hongera kuvola inkuva, yavukannya avayanzani veligali.

¹⁰ Ligondoka li ingiranga uyu u veye nelimanya Kuvita maduya mia ku musiru.

¹¹ Mudamano yenyanga lihing'ana lyeng'ine: Kigira yaga mutumwa mululu a la tumwa kuye.

¹² Iduba i nyagwa avana vayo ni i nyola mundu, Bu veye bulahi kuvita a vugane nomusiru mu busiru bwibwe.

¹³ Ku vosi uyu u tunga ubudamano mbugono bwobulahi, Ubudamano si bu la twula mu inyumba yeye.

¹⁴ Litanga lyelihing'ana li veye kuli mundu a hudulanga ha amadzi ga veye: Kunangwa mu leke lihangalidzana lwa li kikiri kuva ubulwani.

¹⁵ Uyu u hedzanga avadamano ubulungi, na uyu u vikanga lihyolo ku mulungi Vombi halala va veye livihiriridza ku Yahova.

¹⁶ Kigira ki musiru a veye nekyokugula ubugeeri mu mukono gwigwe Kigira si a li nelimanya?

¹⁷ Mulina a yanzanga madiku gosi; Na amwavo wivuleywi kukonya mu kivi.

¹⁸ Mundu u ta li nelimanya a ha mbannya makono A duke kuva nekihambiriru mmoni mwo mutende wewe.

¹⁹ U yanzanga lihyolo a yanza lihing'ana: Na uyu u ginganga kiribwa kikye, yenyanga ubudivi.

²⁰ Uyu u veye nomwoyo gwobukyamu si a nyola ubulahi mba; Na uyu u vedzanga nolulimi lwokugirunkana a gwidzanga mu lidiva.

²¹ Uyu wivulanga musiru a veye ku buvereri bwibwe mwene; Na dada womusiru si a veye nobusangali mba.

²² Mwoyo gwobusangali gu veye lunyasi lulahi; Navutswa mwoyo gwoneka gwuminyanga vigumba.

²³ Mundu mudamano a vugulanga kikuikula mu kiritu A kyaminye tsinzira tsyelikalaga.

²⁴ Ubugeeri bu veye imbiri wommoni mwa u veye nelimanya; Navutswa tsimoni tsyomusiru tsi veye ku kiheri kyelirova.

²⁵ Mwana musiru a veye liverera ku dada wewe Nobululu ku uyu wa mwivula.

²⁶ Kandi kuha mulungi amageli si bu veye bulahi, Kandi si bu veye bulahi kukuya avagoosi kigira ubulungi bwavo.

²⁷ Uyu u gehidza makuva gege a veye nelimanya; Na uyu u veye nomwoyo gwa galaha a veye mundu welimanya.

²⁸ Kali musiru lwa a kiring'ana a validzwa kuva mugeeri; Na lwa a kunika minwa gyigye a ralidzangwa kuva wetsiganagani tsindahi.