Tsing'ano 11 - KITABU KITAKATIFU

¹ Tsiratili tsyobugadi tsi veye livihiriridzwa ku Yahova; Navutswa kigero kyetsiratili tsi nungi ki mu yanzidza.

² Lwa uluyai lu duka, tsisoni kandi tsi dukanga. Navutswa ubugeeri bu veye halala na vegehidzi.

³ Ubudukiru bwa avobulungi bu la vimirira; Navutswa ubukyamu bwa avetsimbemba bu la va dividza.

⁴ Ubutugi si bu konya kindu mu lidiku lyobutima; Navutswa ubulungi bu honnyanga ku likudza.

⁵ Ubulungi bwomudukiru bu la mwimirira ku inzira yeye; Navutswa mudamano a la gwa mu ubudamano bwibwe mwene.

⁶ Ubulungi bwavobulungi bu la va honnya; Navutswa avetsimbemba va la gumirwa mu bugadi bwavo avene.

⁷ Lwa mudamano a kudza, lihenzerera lilye li la hera; Na lisuuviridza lyobudamano li la diva.

⁸ Wobulungi a honnyangwa mu kivi, Na umudamano a duka mu ubugono bwibwe.

⁹ Umundu u vula kutia Nyasaye, a dividza wakye nomunwa gwi gwe; Navutswa mulungi a la hona kigira limanya.

¹⁰ Lwa avalungi va nyola ubulahi lidala li sangala; Na lwa avadamano va kudza, ha veye nesango.

¹¹ Lidala li kuminyangwa nobugasu bwavalungi; Navutswa li kingulangwa nomu nwa gwavadamano.

¹² Uyu u leganga wakye, si a veye nobugeeri; Navutswa mundu welimanya a kiring'ana.

¹³ Uyu u tsitsanga yiyi na yiyi netsimbemba a vuulanga aga viswa; Navutswa uyu u veye nomwoyo musuuvirifu a kunika inkuva.

¹⁴ Ha ta li nelimirira lyobugeeri, avandu va gwidza, Navutswa mu bunyingi bwavalungikidzi ha veye nelyelemeridza.

¹⁵ Uyu u kolera mugeni kihambiriru a la salira kukyo; Navutswa uyu u dunyira kihambiriru a veye nekilema mwoyo.

¹⁶ Mukali mugoosi a nyola lidzominywa Na avandu avalulu va nyola ubutugi.

¹⁷ Wetsimbabasi yekolera mwene ubulahi; Navutswa uyu wekirage yehilanga mu kivi mwene.

¹⁸ Mudamano yenyolera madanyi gobugadi Navutswa uyu u midzanga bulungi a veye namadanyi geligali.

¹⁹ Uyu u dinyahga mbulungi a la duka ku livamwoyo; Na uyu u londanga ubukyamu, yehila mu likudza mwene.

²⁰ Yavo avobukyamu bwomwoyo va veye livihiriridza ku Yahova; Navutswa avobudukiru mu tsinzira tsyavo va mu yanzidza.

²¹ Kali makono ni ga hambana, mudamano si a la vula kukalagirwa; Navutswa kisukululwi kyomulu ngi ki la hona.

²² Kuli imingiri yethahabu mu amolu gempidzi, A veye ndiyo mukali weligondo lilahi u ta li nobugeeri.

²³ Lyenya lyomulungi li veye bulahi bwere; Navutswa lihenzerera lyomudamano li veye ubutima.

²⁴ Ha veye nowelisalannya, navutswa vivye vi medeka; Kandi ha veye na u kolanga ubwimani, navutswa bu leta ubudaka.

²⁵ Mwoyo gwobuhaani gu la komeridzwa; Na uyu u samanga amadzi, naye a la nwehidzwa.

²⁶ Uyu wimananga ubuswage, avandu va la mu laama; Navutswa uyu u gulidzanga ubuswage, ubugasu bu la va ku mutwe gwigwe.

²⁷ Uyu wenyanga ubulahi nobugulu yenyanga tsimbabasi; Navutswa uyu wenyanga ubudamano, bu ladza kuye.

²⁸ Uyu u suuviranga ubutugi bwibwe a la gwa; Navutswa avalungi va la mera kuli litu livisi.

²⁹ Uyu u dambidzanga inyumba yeye a la nyola miyandu gyembuudza; Na musiru a la va mutugwa wa uyu u veye nomwoyo gwobugeeri.

³⁰ Amakuyu gavalungi ga veye musala gwelivamwoyo; Uyu wobugeeri a nyolanga myoyo gyavandu.

³¹ Henza, avalungi va la tungwa mu lirova: Nasindi avadamano na avoni.