Tsing'ano 1 - KITABU KITAKATIFU

¹ Tsing'ano tsya Solomoni mwana wa Daudi, mwami wa Israeli

² Kumanya ubugeeri nelyegidzwa; Na kulola makuva gelimanyeridza;

³ Kuvugula lyegidzwa mu likola lyobugeeri, Mu ubulungi na mu likalaga na ubulahi;

⁴ Kuha avasiru ubugeeri, Nokuha musoleli limanya nelimanyeridza:

⁵ Mundu wobugeeri a hulire, nokumeda limanya; Na mundu welimanya a duke kumanyeridza makuva madukanu:

⁶ Kumanya lugano na ligirunkanywa lyalwo; Amakuva ga avobugeeri, na livola lyavo lyaviswa.

⁷ Litia Yahova li veye litanga lyelimanya; Navutswa avasiru va lega ubugeeri na lyegidzwa.

⁸ Mwana wange, u tegidze ugutu ku lyegidza lya dada wowo Na u ta leka lilaga lya mama wowo:

⁹ Kigira ameyidzo yaga ga la va igudwa yobulahi ku mutwe gugwo, Na minyoro mwigoti mumwo.

¹⁰ Mwana wange, avobwoni ni va ku sona, U ta bugirira mba.

¹¹ Ni va vola, Hamba, u tsie na kwinye Ku goneka kunyola masahi; Ku kolere u ta veye nelihyolo, iluku;

¹² Ku va mire ni va veye mwoyo kuli Kihadisi, Nokuvamira ni va veye avagima, kuli yavo avikanga mbogo;

¹³ Ku la nyola miyandu gyosi gyobuguli budinyu; Ku lizulitsa tsinyumba tsyetu na vilanye;

¹⁴ U vike lira lilyo halala nekwinye; Na ku la va nemuya indala:

¹⁵ Mwana wange, u ta genda ku inzira halala navo; U gaye kirenge kikyo ki vule kugenda ku inzira yavo:

¹⁶ Kigira virenge vyavo vi nyaguliranga ubudamano, Navo va kola bwangu kusundula masahi.

¹⁷ Kigira ga veye vutswa kutega busagala Havulavu mu tsimoni tsyelinyonyi:

¹⁸ Na yavo va setera masahi gavo avene; Va gonekira livamwoyo lyavo avene.

¹⁹ Ni ndiyo tsinzira tsyomundu sa mulala u kayirangwa ubutugi; Bu hilanga livamwoyo lya va veye nalyo.

²⁰ Ubugeeri bu kupanga lwanga mu lihasi; Bu kupanga mwoyo gwabwo mu halang'amu;

²¹ Bu kupanga lwanga halang'amu hokuvugana; Hokwingira mu viribwa, Mu lidala bu volanga makuva gabwo:

²² Mwinye avasiru, mu la yanza busiru kuduka inyinga ki? Avekihenyahenye va sangalira kihenyahenye kyavo, Na avasiru va dunyira limanya kuduka inyinga ki?

²³ Mwegirunkannye kigira ligondoka lyange: Henza, nda mu tsukira roho wange Nda mu mannya makuva gange.

²⁴ Kigira nangi, na mwinye mu suye, Nyiye mukono gwange, na si ha veye nomundu wa vika mu mwoyo gwigwe;

²⁵ Navutswa mu legi makuva gange gosi, Na si mu bugiriye ligondoka lyange:

²⁶ Inze kandi nda seka mu lidiku lyekivi kyenyu; Nda kola kihenyahenye lwa ubutii bwenyu bu duka;

²⁷ Lwa ubutii bwenyu bu duka kuli kihi, Na kivi kyenyu kidzanga kuli kihudzudzi, Na lidambidzwa lyenyu na ubusaliri bwenyu vi duka ku mwinye.

²⁸ Hene yaho va lanira inze, navutswa si nda va tivulira; Va la nyenya ligali, navutswa si va la nyola:

²⁹ Kigira va dunyira limanya, Na si va tovola ubutii bwa Yahova:

³⁰ Si va bugirira makuva gange; Na va lega ligondoka lyange lyosi.

³¹ Kunangwa va la lia makuyu genzira yavo avene, Na va lizula makuva gavo avene.

³² Kigira lirana inyima lyavasiru li la viita, Na ligadahala lyavasiru li la va dividza.

³³ Navutswa ku vosi uyu u huliranga inze a la menya bulahi, Naye a la va nemirembe bugira ubutii bwobudamano.