Tito 3 - KITABU KITAKATIFU

¹ Vidzulitse vegehidze ku vanene, noku avami, nokuhulira, kandi vetegeke ku miyinzi gyosi milahi,

² va ta nyega mundu kali mulala, va ta va avakupani, navutswa va ve avahokya, nokulang'aminya ubuhooma bwosi ku avandu vosi.

³ Kigira kwinye kandi ku matsyambiri kwa li bugira limanya, kwa vula kuhulira, kwa gadwa, kwa tumekira likayirwa lidamano nelyeyanzidza lidamano tsing'ano netsing'ano, kwa menya mu imbodoka nomu likendeka, avavihiriridzi, avavihiriranwi avene navene.

⁴ Navutswa ubulahi bwa Nyasaye Muhonnyi wetu nobuyanzi bwibwe bwa a yanza avandu lwa bwa lang'ama,

⁵ si ku li ku miyinzi gyobulungi gya kwa kola kwinye avene, navutswa ya ku honnyira ku tsimbabasi tsitsye, nelyogidza lyelivulwa lihya nokukolwa ubuhya kigira Roho Mutakatifu,

⁶ wa ya tsuka ku kwinye kukzra kigira Yesu Kristo Muhonnyi wetu;

⁷ ku duke kuvolwa kuva nobulungi kigira tsimbabasi tsitsye, ku duke kukolwa ava lia miyandu kuli lisuuviridzwa lyelivamwoyo li ta hera mba.

⁸ Livola yili li veye lyokusuuvirwa, kandi ku vindu yivi inze nyenya ive u luvirire kuvola, kuduka yava ava suuvira Nyasaye va guluhe kumenya mu miyinzi milahi. Vindu yivi vi veye vilahi kandi avandu va nyola vyambeti kuvyo:

⁹ navutswa welehe ku mateva gobusiru, noku meta gamakula, noku mahangali, noku lihing'ana ku lilaga; kigira si vi veye nevyambeti kandi vi veye vya vutswa.

¹⁰ Mundu mukyamu nu u mali kumweganehidza lwokutanga nolwa kaviri, u mu sule;

¹¹ kigira u manya mundu kuli uyu u girunkana nokukola ubwoni, u duki kwekalagira kivi mwene.

¹² Inyinga ntuma Ariteme ku ive kinga Tukiko, kola ubugulu kuudza kulolana ninze Nikopoli; kigira mmali kulalira kumenya ho inyinga yobukindu.

¹³ Zena, mwegidzi wemiima na Apolo, u va lombere ulugendo lwavo nobugulu, va ta duka kudaka kindu kali kilala.

¹⁴ Kandi avandu vetu va duke kweyegidza kwimenya mu miyinzi milahi gyenyangwa, va ta duka kudaka makuyu.

¹⁵ Vosi va veye ninze halala va ku chelidza. U chelidze ava ku yanza mu lisuuvira. Tsimbabasi tsi ve nemwinye mwosi.