Tito 2 - KITABU KITAKATIFU

¹ Navutswa ive, u vole vindu vi dukananga namegidzo gobulamu.

² Wegidza avakulundu va ve avadukanu, avobugoosi, avobugeeri obwere avalamu mu lisuuvira, nomu buyanzi nomu bwikudziri:

³ kandi avakali avakulundu va ve ndiyo, va ve neligenda li dukananga nobutakatifu, va ta va avahudziridzi, kinga avatugwa vewaini inyingi, va ve avegidzi avevindu vilahi;

⁴ va duke kugerehidza avakali vanyerere va yanze avasatsa vavo, na kandi va yanze avana vavo,

⁵ avobugeeri obwere, navanifu ava kolanga miyinzi mu inyumba avagasu, navegehi dzira avasatsa vavo avene, likuva lya Nyasaye li vule kunyegwa.

⁶ Kandi avasoleli ndiyo u va tsuve va ve nobugeeri obwere.

⁷ Ku vindu vyosi welang'aminye u ve kyokuhenzera ku kyemiyinzi milahi; mu megidzo gogo u lang'aminye aga tonekanga nobugoosi,

⁸ livola lyobukonyi ii ta nyala kuvolwa ku kindu; uyu u hing'ananga a duke kulegannywa, kigira si a veye nekya a vola ku kwinye kidamano.

⁹ Wegidze avatugwa vegehidze avene ku vanene vavo, va va yanzidze ku vindu vyosi; va ta va namahangali;

¹⁰ va ta va averondehidzi, navutswa va lang'aminye ubusuuvirifu bulahi bwosi: va duke kusiaha amegidzo ga Nyasaye Muhonnyi wetu ku vindu vyosi.

¹¹ Kigira tsimbabasi tsya Nyasaye tsi mali kuloleka, tsi letanga ubuhonnyi ku vandu vosi,

¹² nokwegidza kwinye, kuduka kwinye kwambakane ubudamano nelikayirwa lyevyelirova, ku menye nobugeeri obwere, nobulungi nelitibwa, lya Nyasaye mu inyinga yiyi;

¹³ ku henzerere lisuuviridzwa lyobugasu, nelilang'ama lyobukumi bwa Nyasaye munene no Muhonnyi wetu Yesu Kristo;

¹⁴ wehaana kigira kwinye, a duke kutungira kwinye ku twule mu bwebaali bwosi, mwene ya siiya avandu va ve avandu veve mwene avagulu ku miyinzi milahi.

¹⁵ U vole amakuva yaga, weganehidze, wambakannye netsingulu tsyosi. U ta leka mundu kali mulala a ku lege.