Ruth 4 - KITABU KITAKATIFU

¹ Ma Boaz ya tsia ha kiribwa kyelidala, ni yikala ho: na henza, wenyumba ya himbi, wa Boaz ya vola makuva gege, ya vita ha zana; naye ya mu volera, Ive, hamba wikale hano. Naye ya tsia ho, ni yikala.

² Na Boaz ya vugula avandu likumi ku avakulundu velidala, na a va volera, Mwikale hano. Navo vikala.

³ Naye ya volera wenyumba ya himbi, na a vola, Naomi, wirana kutwula mu kivala kya Moabu, a gulidzanga kidieli kyomulimi, gwa li gwa Elimeleki amwavo wetu:

⁴ na inze nda ganagaml nobulahi kukuvulira, nokukuvolera, U gule mulimi zana imbiri wetsimoni tsya yavo avikaye hano, imbiri wa avakulundu va avandu vange. Nu u va nu u yanza kugugula, u gule: navutswa nu u ta yanza kugugula, hene yaho u mbolere, nduke kumanya; kigira si ha li nowundi kugugula navutswa ive, na inze mbeye inyima wowo. Naye ya vola, Nda gu gula.

⁵ Kunangwa Boaz ya mu volera, Lidiku lya u gula mulimi ku mukono gwa Naomi, ga ku dukira kugugula ku Ruth Mumoabu, mukali wa uyu wa kudza, u duke kusingeridza lieta lilye ku miyandu gyigye.

⁶ Na uyu wenyumba ya himbi ya vola, Inze si nyala kuvugula inze mwene, gase ndononnya miyandu gyange: ive u vugule ubwiyangu bwange kugugula; kigira inze si nyala kugugula.

⁷ Na yigyi ni miima gya Avaisraeli inyinga ya kale mu makuva geligula mmakuva gelikirannya, gya li ndi kudinyeridza vindu vyosi: mundu ya twulidzanga kilatu kyikye, nokukihaana ku wakye: na ndiyo va dinyeridza vindu mu Israeli.

⁸ Hene yaho uyu wenyumba ya himbi ya volera Boaz, Wegulire ive mwene. Naye ya twulidza kilatu.

⁹ Na Boaz ya volera avakulundu, na vandu vosi na a vola, Mwinye mu veye avaloli lero, inze mmali kugula vyosi vya li vya Elimeleki, na vyosi vya li vya Kilioni na Mahaloni, ku mukono gwa Naomi.

¹⁰ Kandi mmali kugula Ruth Mumoabu, mukali wa Mahaloni, kuva mukali wange, nokusingeridza lieta lya uyu wa kudza ku miyandu gyigye, lieta lya uyu wa kudza li vule kugota mu vamwavo veve, nomu kiribwa kyikye: mwinye mu ve avalolekidzi lero.

¹¹ Na avandu vosi va li mu kiribwa, navakulundu va vola, Kwinye ku veye avalolekidzi. Yahova a kole umukali uyu wingira mu inyumba yoyo a ve kuli Raheli na kuli Leah, avakali yavo vaviri avombaka inyumba ya Avaisraeli: na ive u kole bulahi mu Efarata, na u ve munene mu Bethlehemu:

¹² nenyumba yoyo i ve kuli inyumba ya Pereze, wa Tamaru yivulira Yuda, mu visukululwi vya Yahova a la ku ha vyomukali uyu.

¹³ Kunangwa Boaz ya vugula Ruth, naye ya duka kuva mukali wewe: na ya li halala naye, na Yahova ya mu ha livereka, na yivula mwana muyai.

¹⁴ Na avakali va volera Naomi, Yahova a gasidzwe, wa vula kuleka ive lero u vule kuva nowenyumba ya himbi, lieta lilye lidzominywa mu Israeli.

¹⁵ Naye a la va ku ive wirannya liva mwoyo, nowokuhenza ubukeere bubwo; kigira navizala wowo, u ku yanzanga, wa duka ive kuvita avana vayai vatano na navaviri, u mwivuye.

¹⁶ Na Naomi ya vugula mwana, na ya mu vika ku kiritu kyikye, na a va muleri wewe.

¹⁷ Na avakali avatende veve va mu gulika lieta, ni va vola, Naomi wivuleywi mwana muyai; va mu gulika lieta lilye Obedi: uyu niye ise wa Jesse, ise wa Daudi.

¹⁸ Na yivi ni visukululwi vya Pereze: Pereze yivula Hezron,

¹⁹ na Hezron yivula Ramu, na Ramu yivula Aminadabu,

²⁰ na Aminadabu yivula Nashono, na Nashono yivula Salmona,

²¹ na Salmona yivula Boaz, na Boaz yivula Obedi,

²² na Obedi yivula Jesse, na Jesse yivula Daudi.