Ruth 2 - KITABU KITAKATIFU

¹ Na Naomi ya li nomundu ku vamwavo vomusatsa wewe mundu wetsingulu nobutugi, mu viko va Elimeleki; lieta lilye lya langwa Boaz.

² Na Ruth wa Moabu ya volera Naomi, U ndeke ntsie mmulimi, ndole ving'aleywi mu luvuva, nonde inyima wa uyu wa nyola tsimbabasi imbiri wewe. Na Naomi ya mu volera, U tsie, mwana wange.

³ Naye ya tsia, na a duka na a dola ving'aleywi mmulimi inyima wa vagesi: na ga duka kuye kuduka mu kidieli kyomulimi gwa Boaz, wa li ku avenyumba ya Elimeleki.

⁴ Na henza, Boaz yadza na a twula Bethlehemu, na a volera avagesi, Yahova a ve halala na mwinye. Navo va tivula, Yahova a gasidze ive.

⁵ Ma Boaz ya volera mulindi wa avagesi, na a mu teva, Mukana wa bwaha uyu?

⁶ Na mulindi wa vagesi ya tivula, na a vola, A veye mukana wa Avamoabu, wirana halala na Naomi kutwula mu kivala kya Moabu.

⁷ Naye ya vola, U mbe munwa ndole, nku saala, nokuvungidza inyima wa vagesi hagati heviganda. Kunangwa yadza, na a honga ho kutwula mugamba kuduka kalunu, ni i ta li yikala mu inyumba hakekeke.

⁸ Kunangwa Boaz ya volera Ruth, U hulire, mwana wange? U ta tsia kudola mmulimi gundi, kandi u ta twula hano, navutswa u menye hano ligali halala navakana vange.

⁹ Tsimoni tsitsyo tsi henze ku mulimi yigu gwa va gesanga, na u la londa inyima wavo; na inze si nda gaya avasoleli va vule kukudira? Na lwa u veye nobuluhu, u tsie heviju vi veye, nokunwa ga vasoleli va dahi.

¹⁰ Naye ya gwa mammama, na yinama ku lirova, nokuvolera Boaz, kigira ki inze nyoye tsimbabasi imbiri wowo, kuduka u nzidzuliye, na inze mbeyemugeni?

¹¹ Na Boaz ya tivula, na a mu volera, Yaga gosi ga wa kolera navizala wowo kutwula likudza lyomusatsa wowo, ga vuleki ku inze; kandi kuli wa leka dada wowo na mama wowo, nekivala kya wivulwa mu, na u duki ku avandu ava u kikiri kumanya.

¹² Ku miyinzi gyigyo Yahova a ku he madanyi madukanu, Nyasaye wa Israeli wa wadzira mu tsimbaha tsitsye u duke kunyola lisuuvira.

¹³ Ma ya vola, U ndeke nyole tsimbabasi imbiri wowo, mwami wange; kigira u leminyanga mwoyo gwange, kandi kigira u volera inze mukana mutugwa wowo makuva malahi, kali ni nta veye kuli mulala ku avakana vatugwa vovo.

¹⁴ Kandi ku inyinga yelilia, Boaz ya volera Ruth, Hamba, u lagire ubukima, na u dongere ketonge kikyo mu isiki yiyi. Ma Ruth yikala himbi ku vagesi, navo va mu sundira ubuswage busambe, na ya lia, nokwiguta, na a leka vindi.

¹⁵ Kandi lwa ya vuka kudola, Boaz ya laga avasoleli veve, na a vola, Mu mu leke a dole kali hagati heviganda viboheywi, mu ta mu lemba mba.

¹⁶ Kandi mu twulidze vikekeke mu vya bofwa, mu mu lekere a duke kuvidola, mu ta mu gaya mba.

¹⁷ Kunangwa ya dola mu mulimi kuduka mgolova; na ya huula vya ya dola, na vya duka kihinda kilala kyashairi.

¹⁸ Naye yidwika, na a tsia mu lidala: na navizala wewe ya lola vya ya dola: kandi ya mu twulidzira vya tigala lwa yiguta, na ya mu ha.

¹⁹ Na navizala wewe ya mu teva, U doye haliha lero? Na wa kola haliha? A gasidzwe uyu u kwidzuliye. Naye ya vulira navizala wewe lieta lyomundu wa ya kola miyinzi halala naye, na a vola, Mundu wa nkoli naye miyinzi lieta lilye li veye Boaz.

²⁰ Na Naomi ya volera navizala wewe, Yahova a mu gasidze u vulanga kuleka kukolera ava veye mwoyo tsimbabasi, na kandi kuvo ava kudza. Na Naomi ya mu volera, Mundu uyu a veye ku aviko vetu, a veye mulala ku avenyumba yetu himbi.

²¹ Na Ruth Mumoabu ya vola Nyee, ya mbolera, U hambane ligali navasoleli vange, kuduka lwa va mala ligesa lyange lyosi.

²² Na Naomi ya volera Ruth navizala wewe, Nobulahi mwana wange, ive kutsia halala navakana veve, na va ta vugana nive mu mulimi gundi mba.

²³ Kunangwa ya hambana navakana va Boaz, kudola kuduka ku kiheri kyeligesa lyashairi neligesa lyengano; na a menya halala na navizala wewe.