Nehemia 5 - KITABU KITAKATIFU

¹ Hene yaho lya tanga lilira linene lyavandu na lyavakali vavo, ku vamwavo vavo Vayuda.

² Kigira va li ho avalala va vola, Kwinye na vana vetu avayai navakana, ku veye avanyingi: kwenyolere ubuswage, ku lagire kuva mwoyo.

³ Va li ho avandi kandi ava vola, Kwinye mi limi gyetu, na milimi gyetu gyami zabibu, netsinyumba tsyetu: kwenyo lere ubuswage kigira inzala yiyi.

⁴ Va li ho avandi kandi va vola, Kwinye ku mali kuhamba kiveti if etha i veye yekodi yomwami, na ku koli milimi gyetu kihambiriru, nemilimi gyetu gyamazabibu.

⁵ Navutswa kalunu mubiri gwetu gu veye kuli mubiri gwavamwavo vetu, navana vetu kuli avana vavo: na, henza, ku viki avana vetu avayai navakana mbutugwa va gwe avatugwa, nava lala ku avakana vetu va mala kuvikwa mbutugwa kutwula inyinga yeyo: kandi si ku veye nekya ku nyala ga ve lugano lundi; kigira avandi vandu va veye nemilimi gyetu, nemi limi gyetu gyamazabibu.

⁶ Na lwa nda hulira lilira lyavo na makuva gavo, nda vihirirwa ligali.

⁷ Hene yaho nda lomba makuva inze mwene, nda hangalidzana navanene na vamehi, na nda va volera, Mwinye mu tungidzanga vyambeti, mundu sa mulala ku wakye. Na nda vu gannya livugana linene ku avandu yavo.

⁸ Na nda va volera, Kwinye kuli bunyali bwetu ku tungiye avamwavo vetu Vayuda, yavo ava gulidzwa ku vetsihiri; na mwinye kalunu nkano mwa gulidza avamwavo venyu, va gulidzwe na kwinye ku va gule? Hene yaho va kiring'ana, va vula kuva nekya va vola.

⁹ Kandi nda vola, Inkuva ya mu kolanga yiyi si i veye indahi mba: si ga mu dukira kugenda mu litibwa lya Nyasaye wetu, kigira amanyego aga vetsihiri avasigu vetu?

¹⁰ Kandi inze, navamwavo vange, navatumekiri vange, ku va hambidzanga kivete ifetha nobuswage. Mwadza, mmu goo nyanga ku leke kutungidza vyambeti.

¹¹ Mwadza, lero mwirannye kuvo mi limi gyavo, nemilimi gyamizabibu, nemilimi gyemizeituni, netsinyumba tsyavo, kandi halala na yaga mwira nnye kidieli kya mia kyefetha, nekyobuswage, nekyewaini, nekyamaguta, vya mwa va tungidza.

¹² Ma va vola, Ku la viranyira, na si ku la teva kindu kali kilala kuvo mba; ku la kola ndiyo, kuli u volanga. Ma nda langa avasalisi, na nda visuhidza, va duke kukola kuli lisuuviridza yili.

¹³ Kandi nda sung'usa ingubo yange, ni mbola, Nyasaye a mu sung'use ndiyo mundu sa mulala, u vula ku dukidza lisuuviridza yili, a twule mu inyumba yeye, nomu miyinzi gyigye; a sung'uswe ndiyo, nokukolwa vutswa. Navandu yava avelivugana lyosi va vola, Amini, na vidzominya Yahova. Kandi avandu va kola kuli lisuuviridza lyavo.

¹⁴ Kuvita yaga, kutwula inyinga ya nda vikwa kuva mwamehi wavo mu kivala kya Yuda, kutwula ku muhiga gwa makumi gaviri gwelyame ha lyomwami Aritashashita, kuduka ku muhiga gwa makumi gavaka na gyiviri gwelyameha lilye, li vola li veye mihiga likumi na gyiviri, inze navamwavo vange si ku lagiye ubukima bwomwamehi.

¹⁵ Navutswa avamehi avimira imbiri wange va li avandu va tungangwa, navo va vugula ubukima bwavandu, newaini, halala netsishe keli amakumi gane tsyefetha; yee, kali avatumekiri vavo veyamehidza ku vandu: navutswa inze si nda kola ndiyo mba, kigira nda tia Nyasaye.

¹⁶ Yee, nda hongera mu miyinzi gyelidigi, na si kwa gula mulimi kali mulala: na avatumekiri vange vosi va vugana ho ku miyinzi.

¹⁷ Halala na yaga va li ha meza yange, ku Vayuda noku vamehi, avandu mia na makumi gatano, kuvita yavo ava duka ku kwinye ava twula mu vetsihiri ava nyoleka ku tsimbega tsyetu.

¹⁸ Kunangwa vyokulia vya lombwa ku lidiku lilala, vya li ing'ombe indala namagondi gatano neli lala amalahi ligali; kandi tsingoko tsya lomberwa inze, kandi inyinga indala ku madiku likumi akiba ye iwaini yetsing'ano tsyosi ya letwa: navutswa kali ni ga li ndiyo gosi, si nda vanza vyokulia vyomwamehi, kigira ubu tumekiri bwa li buliduhu ku avandu yavo.

¹⁹ O Nyasaye wange, u nzidzulitsira ku bulahi, bwosi bwa nkoleye avandu yava.