Nehemia 2 - KITABU KITAKATIFU

¹ Na ga duka ku mweli gwa Nisan, mu muhiga gwa makumi gaviri gwelyameha lyomwami Aritashashita, lwa iwaini ya li imbiri wewe, nda vugula iwaini, nokuha mwami. Na inze si nda li ku nobuverereri imbiri wo mwami ku matsyambiri mba.

² Ma mwami ya nteva, Kigira ki mmoni munwo mu loleka kuva nobuverereri na ive si u veye mulwaye mba? Yibu nobuverereri bwomwoyo, si ki veye kindu kindi mba. Hene yaho nda tia ligali.

³ Na nda volera mwami, Mwami a hindire mihiga nemihiga; kigira ki mmoni mwange mu vule kuva nobuverereri, inyinga lidala yilyo lya ha vilindwa vyava guga vange, li veye kyanyi, neviribwa vyalyo vi sambeywi nomuliru?

⁴ Hene yaho mwami ya nteva, Lyenya lilyo lya wenyanga li veye ki? Ma nda saala Nyasaye womigulu.

⁵ Ni mbolera mwami, Mwami na a va na a yanza, na inze mutumekiri wowo ni nyoye liverererwa imbiri wowo, a mbile ntsie Yuda, kuduka ku lidala lyevilindwa vyavaguga vange, nduke kulyombaka.

⁶ Nomwami ya nteva (mwami wekikali wa li ni yikaye ahimbi naye), Lugenda lulwo lu la va lwa madiku ganga? Na u lirana inyinga ki? Ma mwami ya yanza kuntuma; na inze nda mu volera inyinga.

⁷ Halala na yaga nda volera mwami, Mwami na a va na a yanza, mbebwe tsibaruwa tsya mbilira avamehi va veye engereka wo Mugera, va ndeke mbite kuduka Yuda;

⁸ na mbebu e ibaruwa kumbi lire Asafu mulindi womulitu gwo mwami, a duke kumba misala ku lomba vikongo vyeviribwa vyolugaga lwa hambana nenyumba, kandi vyelidigi lyelidala, nenyumba ya inze nyingira mu. Kandi mwami ya mbe tsibaruwa, kuli mukono mula hi gwa Nyasaye wange gu veye ku inze.

⁹ Hene yaho nda duka ku avamehi va veye engereka wo Mugera, na nda va ha tsibaruwa tsya twula ku mwami. Kunangwa mwami ya leta avanyampara avelihe navo va nina ku tsiparasi halala ninze.

¹⁰ Kandi lwa Sanbalati Muhoron, na Tobia mutumekiri weue, Muamon, va hulira makuva, likuva yili lya va vereridza ligali, kigira mundu yadza ni yenya va gasidzwe avana va Israeli.

¹¹ Ma nda duka Yerusalemi, ni mba yo madiku gavaka.

¹² Na nda vuka mbudiku, inze navandu vakekeke halala ninze; na si nda volera mundu kali mulala ga Nyasaye wange ya vika mu mwoyo gwange kukolera Yerusalemi; na si nda li nemitugu halala ninze, ni gu ta li yigu mulala gwa nda nina ku.

¹³ Nda tsia kyova mbudiku, nda twulira mu kiribwa kyomwivona, ku luvega lu henza ku kidaho kyoguyoka, na kiribwa kyamandu, na nda henza amadigi ga Yerusalemi, aga sambu lwa, neviribwa vyalyo vya sambwa nomuliru.

¹⁴ Ma ndesunda imbiri kuduka ku kiribwa kyekidaho noku vita ku lidavalia lyomwami: navutswa si ha li nobwiyangu bwokuvitidza umutugu gwa li isi wange.

¹⁵ Ma ndanegira haluvega lwomugera mbu diku, nokuhenza lidigi, na ndirana, nokwingira kandi mu kiribwa kya mwivona, nokwiranira ku inzira zana.

¹⁶ Na avanene si va manya ha nda tsia, kinga ga nda kola, Kandi si nda volera Vayuda, kinga avasalisi, kinga avanene, kinga avamehi, kinga ava ndu avakoli vemiyinzi.

¹⁷ Hene yaho nda va volera, Mu lola kivi kya ku veye nakyo, kuli Yerusalemi i veye kyanyi, neviribwa vyalyo vi sambwa nomuliru: gendi kwombake kandi lidigi lya Yerusa lemi, ku vule kuva kandi amanyego.

¹⁸ Kandi nda va volera amakuva gomukono mulahi gwa Nyasaye ugwa li ku inze nobulahi, na makuva gomwami, aga ya volera inze. Navo va vola, Genda, ku vuke, kwombake. Ma va vika ubugulu mmakono gavo ku miyinzi milahi.

¹⁹ Navutswa Sanbalati Muhoron, na Tobia mutu mekiri wewe, Muamon, na Geshem Muarabu, lwa va hulira makuva yaga, va ku seka kuduka ni va ku kola kihenyahenye, nokukulega, nokuvola, Mwinye mu kolanga ki? Mu lebaala ku mwami?

²⁰ Ma nda tivula, nokuvavolera, Uyu Nya saye womigulu, a la ku gasidza kigira yaga kwinye avatumekiri veve ku la vuka nokwombaka: navutswa mwinye si mu veye nekidieli, kinga kindu, kinga lidzulitswa mu Yerusalemi.