Nahum 1 - KITABU KITAKATIFU

¹ Yili ni likuva liliduhu lya Nineve. Kitabu kyamalola ga Nahum Muelikoshi.

² Yahova a veye Nyasaye welikendeka nowelivanza kisalya; Yahova a vanza kisalya nokwizula ubutima; Yahova a vanza kisalya ku avahing'ana naye, kandi a vikira avasigu veve ubulima.

³ Yahova a veye wagalaha ku butima, na a veye munene mu bunyali, si a la kola uyu u veye nekindu kuye kuva ougira mahyolo mba: Yahova a veye nenzira yeye mu kihudzudzi nomu kihi, amalesi ga veye lugukyi lwevirenge vivye.

⁴ A gondokiranga inyanza, na a gi kaminyanga, kandi a kaminyanga migera gyosi: Bashan va nialanga, na Karimeli; nekimuli kya Lebanon ki nialanga.

⁵ Vigulu vi degera imbiri wewe, na tugulu tu yenguka; na lirova li gingangwa igulu mbiri wewe, yee, lirova na vosi va menyanga mulyo.

⁶ Bwaha u nyala kusingira imbiri wobutima bwibwe? Ni bwaha u nyala kumenya mu bululu bwobutima bwibwe? Butima bwibwe bu tsukeywi kuli muliru, tsinyanda tsya tannyeywi na uyu.

⁷ Yahova a veye mulahi, a veye impinga ku lidiku lyekivi; a manya yava ava suuvira kuye.

⁸ Navutswa a la heridza hango hehe ligali nolugaga lwa madzi, na a la londerera avasigu veve kuduka mkisundi.

⁹ Mwinye mu saavira ki ku Yahova? A la heridza ligali; kivi si ki la vuka hali kaviri mba.

¹⁰ Kigira kali ni va veye kuli amafwa ga di ndana, nokuhambika kuli mu linwa lyavo, va sambwa ligali kuli mavivi amumu.

¹¹ Mulala u twuli hagati hoho, u saaviye ubudamano ku Yahova, a volanga makuva gobudamano.

¹² Yahova a vola: Kali ni va veye netsingulu tsindukanu, kali ni va veye avanyingi, va la kalagwa ndiyo, na a la gota. Kali nku dambidzi, si nda ku dambidza kandi mba.

¹³ Na kalunu nda vunannya inira yeye i twule ku ive, na nda kalannya vibohero vivyo.

¹⁴ Na Yahova u lagi ku ive, ha ta simikwa kandi kali mulala welieta lilyo: nda twulidza kifwananyi kyokuvadzwa nekifwananyi kyokwelongwa vi twule mu inyumba yavanyasaye vovo; nda ku yavira kilindwa kikyo, kigira ive u legangwa ligali.

¹⁵ Henza, ku vigulu virenge vya uyu u letanga makuva malahi vi veye ho, uyu u landidzanga makuva gemirembe O Yuda, u linde madiku ga malia, u kole malagano gogo; kigira mudamano si a la vita hagati hoho kandi mba; a twulidzwa ligali.