Matayo 9 - KITABU KITAKATIFU

¹ Ya nina mu liato, ni yambuka na a duka mu lidala lilye.

² Kandi henza, va mu letera mundu wa fwogoya na a gona ku kitali: na Yesu lwa ya lola lisuuvira lyavo ya volera wa fwogoya, U leme mwoyo, mwana wange, u sameheywi bwoni bubwo.

³ Kandi henza, avalala ku vang'odi va vola mmyoyo gyavo, Mundu uyu a nyeganga.

⁴ Yesu ya manya tsi ganagani tsyavo na a vola, Kigira ki mu ganagana ndi ubudamano mmyoyo gyenyu?

⁵ Li veye liangu ni li li ha, kuvola, Bwoni bubwo bu sameheywi; naho kuvola, Singira u gende?

⁶ Navutswa mu duke kumanya Mwana wa Adamu a veye netsingulu mu lirova kusameha ubwoni (hene yaho ya volera wa fwogoya), Singira, u vugule kitali kikyo u tsie yengo wowo.

⁷ Na a singira na a tsia yengo wewe.

⁸ Navutswa viduma lwa vya lola, va genya ni vidzominya Nyasaye wa ha avandu tsingulu kuli yitsi.

⁹ Yesu lwa ya vita kutwula yaho, ya lola mundu wa langwa Matayo ni yikaye ha va sololera ubushutu: ya mbolera, U nonde. Naye ya singira na a mu londa.

¹⁰ Lwa yikala kulia munyumba, henza, avasololi vobushutu vanyingi navoni vadza ni vikala halala na Yesu navegidzwi veve.

¹¹ Avafarisayo lwa va lola yaga va volera avegidzwi veve, Kigira ki Mwegidzi wenyu a lia halala navasololi vobu shutu navoni?

¹² Naye lwa ya hulira, ya vola, Avalamu si venya wetsinyasi, navutswa avalwaye veng'ini.

¹³ Navutswa mu tsie mweyegidze amakuva yaga; Nyenya tsimbabasi, si nyenya visyuviriru; kigira si ndadza kulanga avalungi navutswa kulanga avoni.

¹⁴ Hene yaho avegidzwi va Yohana vadza kuye ni va vola, Kigira ki kwinye na Vafarisayo ku honga lilia kanyingi, navutswa avegidzwi vovo si va honga lilia?

¹⁵ Yesu ya va volera, Avalina voserereywi si va nyala kulira lwa userereywi a veye halala navo? Navutswa madiku ga ladza userereywi lwa a li twulidzwa, kunangwa va la honga lilia.

¹⁶ Ka ndi si ha veye nomundu u nava kilave kyengubo imbisi kungubo i kunguhi; kigira yikyo kya vikwa kuhanera ki tandula i kunguhi, kunangwa litandula li daswa.

¹⁷ Kandi avandu si va tsuka iwaini impya mu tsimuya tsinkulu: ni va kola ndiyo tsimuya tsi tanduka ne iwaine ga sunduka, netsimuya tsyoneka: navutsu a va tsuka iwaini impya mu tsimuya tsimpya, na vyombi vi hona.

¹⁸ Lwa ya va volera amakuva yaga, henza, munene yadza kuye na a msigamira na a vola, Mkana wange u mali kukudza kalunu: navutswa hamba u vike kuye mkono gugwo ma a la va mwoyo.

¹⁹ Yesu ya singira na a mlonda halala navegidzwi veve.

²⁰ Kandi henza, mkali wa li na a lwala litadza masahi mihiga likumi negyiviri, yadza inyima na a mu dira ku lukigiti lwengubo:

²¹ kigira ya vola mkiritu, Ni ndira ku ingubo yeye vutswa, nda hona.

²² Navutswa Yesu yekevuka na a mlola, ya vola, Mkana wange, lema mwoyo, lisuuvira lilyo li ku honnyi. Mkali ya honnywa kutwula isaa yeyo.

²³ Yesu lwa ya duka mu inyumba yomunene, na a lola ava kupa visiliva, nekiduma ki kola liyoga,

²⁴ ya vola, Mwisunde: ki gira mkana si a kudzi mba navutswa a gona. Navo va mseka ni va mkolera kihenyahenye.

²⁵ Navutswa kiduma lwa kya twulidzwa, yingira na a mgumira mkono gwigwe; na mkana ya singira.

²⁶ Lukumi lwemiyinzi yikyi lwa landa mu kivala yikyo kyosi.

²⁷ Yesu lwa ya vita na a twula ho, avaboku vaviri va mu londa ni va lira, ni va vola, U ku vererere, ive Mwana wa Daudi.

²⁸ Lwa ya mala kwingira mu inyumba avaboku vadza kuye: na Yesu ya va volera, Mu suuvira inze nyala kukola yiki? Va mbolera, Yee, Mwami.

²⁹ Hene yaho ya dira tsimoni tsyavo, na a vola, Kuli lisuuvira lyenyu mu nyole.

³⁰ Na tsimoni tsyavo tsya kunulwa. Yesu ya veganehidza ligali na a va volera, Mu henze bulahi, mundu a ta manya kali mulala.

³¹ Navutswa va twula ni va kuminya amakuva gege mu kivala yikyo kyosi.

³² Lwa va twula ho, henza, va mu letera mundu idimbidi welidemone lya mu gumira.

³³ Lidemone lwa lya kungwa, idimbidi ya vola: na viduma vya genya ni vi vola, Si ga lolwa ndiyo mu Israeli.

³⁴ Navutswa Vafarisayo va vola, A twulidza amademone netsingulu tsyomwami wamademone.

³⁵ Yesu ya vodonkana mu madala gosi na mu tudala na yegidza mu masomero, ni yilwadza ivangeli yobwami, na a honnya tsinkudzo tsyosi nobudekeranu bwosi.

³⁶ Navutswa lwa ya lola viduma ya va vererera, kigira va li ni va damba ni va sala nnywa kuli magondi aga ta li nomwayi halala.

³⁷ Hene yaho ya volera avegidzwi veve, Ligesa ni linene navutswa avagesi va geha.

³⁸ Mu saale Mwami mwene ligesa, a hile avagesi mu ligesa lilye.